ខេត្តប៉ៃលិន ៖ ការដើរលេងកំសាន្តរបស់ភ្ញៀវទេសចររយ:ពេល៣ថ្ងៃ ចាប់ពីថ្ងៃទី២៥-២៦ និង២៧ ខែមករា ឆ្នាំ២០២០ នាឱកាសបុណ្យចូលឆ្នាំប្រពៃណីចិន-វៀតណាមនេះ ហាក់ដូចជាមានការធ្លាក់ចុះបើប្រៀបធៀបទៅនឹងឆ្នាំ២០១៩កន្លងមក ។…
ខេត្តប៉ៃលិន ៖ ការដើរលេងកំសាន្តរបស់ភ្ញៀវទេសចររយ:ពេល៣ថ្ងៃ ចាប់ពីថ្ងៃទី២៥-២៦ និង២៧ ខែមករា ឆ្នាំ២០២០ នាឱកាសបុណ្យចូលឆ្នាំប្រពៃណីចិន-វៀតណាមនេះ ហាក់ដូចជាមានការធ្លាក់ចុះបើប្រៀបធៀបទៅនឹងឆ្នាំ២០១៩កន្លងមក ។ ចំណែកមូលហេតុនៃការធ្លាក់ចុះនេះ មានអ្នកខ្លះលើកឡើងថា ដោយសារតែភ្ញៀវភាគច្រើនធ្វើដំណើរទៅលេងតាមបណ្តាខេត្តនានាដូចជាខេត្តសៀមរាប ព្រះសីហនុ ខេត្តរតនគីរី ជាដើម ។ ចំណែកអ្នកខ្លះទៀត លើកឡើងថា ដោយសារតែនៅតាមរមណីយដ្ឋាននីមួយៗមិនទាន់មានអ្វីប្លែកដើម្បីទាក់ទាញភ្ញៀវទាំងនោះឱ្យចូលមកលេង រីឯផ្លូវទៅលេងកម្សាន្តនៅកន្លែងខ្លះក៏មានការលំបាកផងដែរ ។
តាមប្រភពព័ត៌មានបានឱ្យដឹងថា នៅទូទាំងខេត្តប៉ៃលិនមានកន្លែងដើរលេងកំសាន្តជាច្រើនដូចជា រមណីយដ្ឋានប្រវត្តិសាស្ត្រភ្នំយ៉ាត, រមណីយដ្ឋានទឹកធ្លាក់អូរតាវ៉ៅ ហៅភ្នំខៀវ, រមណីយដ្ឋានចំការខ្នុរ, រមណីយដ្ឋានចំការសាវម៉ាវ, កន្លែងលេងទឹកស្ពានតារៀប, រមណីយដ្ឋានរហាត់ទឹក និងអាងជីងចក់ ព្រមទាំងកន្លែងលេងផ្សេងៗជាច្រើនទៀត ។ ប៉ុន្តែក្នុងចំណោមកន្លែងលេងកម្សាន្តទាំងនេះ នៅកន្លែងខ្លះទៀត មិនទាន់មានការអភិវឌ្ឍឱ្យមានការរីកចម្រើននៅឡើយទេ ។ ចំណែកទឹកធ្លាក់មួយកន្លែងទៀត នៅក្បែរក្រុងប៉ៃលិន ដូចជាទឹកធ្លាក់បរហ៊ុយជាដើម ដែលមិនទាន់អាចធ្វើដំណើរទៅដល់ ដោយសារអត់មានផ្លូវចូល ។ បើនៅថ្ងៃខាងមុខ មានការអភិវឌ្ឍ អាចនឹងមានភ្ញៀវចូលទៅលេងច្រើនជាក់ជាមិនខាន ជាពិសេសម្ហូបអាហារ ត្រូវតែលក់ក្នុងតម្លៃសមរម្យ ការមើលថែរក្សា ការពារយានជំនិះ ត្រូវតែមានសុវត្ថិភាព ។
ចំណែកភ្ញៀវទេសចរណ៍ម្នាក់ ឈ្មោះ ប៊ុន ធឿន បានលើកឡើងថា ការដែលអត់សូវមានភ្ញៀវក្នុងស្រុកដើរលេងកំសាន្តច្រើន ក៏អាចពាក់ព័ន្ធនឹងសេដ្ឋកិច្ចគ្រួសារ ខណ:ធ្វើស្រែចម្ការមិនសូវបានផល តម្លៃទីផ្សារធ្លាក់ចុះ ទិន្នផលបានទាប ទើបអត់សូវមានថវិកាដើរលេងកំសាន្ត ។ មួយផ្នែកទៀត ប្រជាពលរដ្ឋដែលមានថវិកាច្រើន គេមានរថយន្តខ្លួនឯង បើកបរទៅលេងខេត្តឆ្ងាយៗ ទើបធ្វើឱ្យខេត្តប៉ៃលិន មានការស្ងាត់ភ្ញៀវបែបនេះ ។
ពាក់ព័ន្ធនឹងបញ្ហាខាងលើនេះ លោក លឹម វាសនា ប្រធានមន្ទីរទេសចរណ៍ខេត្តប៉ៃលិន បានឱ្យដឹងថា ភ្ញៀវទេសចរជាតិមានចំនួន១៥,៥៧៥នាក បើប្រៀបធៀបទៅនឹងឆ្នាំ២០១៩ មានចំនួន១៧,១៨១នាក់ មានការថយចុះ-៩,៣៤% ហើយភ្ញៀវទេសចរអន្តរជាតិ មានចំនួន៦៩នាក់ បើប្រៀបធៀបនឹងឆ្នាំ២០១៩មានចំនួន៩៤នាក់ មានការថយចុះចំនួន-២៦,៥៩% ។ លោកបន្តទៀតថា ភ្ញៀវទេសចរសរុបមានចំនួន១៥,៦៤៤នាក់ បើប្រៀបធៀបនឹងឆ្នាំ២០១៩ មានចំនួន១៧,២៧៥នាក់ មានការថយចុះចំនួន-៩,៤៤% ។ ចំនួនដែលទទួលភ្ញៀវទេសចរទៅលេងកម្សាន្តមានចំនួន៩កន្លែង ក្នុងនោះមាន ១-រមណីយដ្ឋានភ្នំយ៉ាត ២- រមណីយដ្ឋានទឹកធ្លាក់ភ្នំខៀវ ៣-តំបន់លំហែកាយ អូរឈើក្រំ ៤-រមណីយដ្ឋានចំការខ្នុរ ៥- រមណីយដ្ឋានម្លប់សាវម៉ាវ និង៦-រមណីយដ្ឋានស្ទឹងត្រជាក់ចិត្ត ។
លោកបញ្ជាក់ទៀតថា ខាងលោកក៏មិនទាន់ដឹងពីមូលហេតុ ដែលភ្ញៀវទេសចរមានការថយចុះនេះដែរ ខណ:លោកពេលនេះកំពុងសម្រាកព្យាបាលជម្ងឺនៅរាជធានីភ្នំពេញ ដោយសារគ្រោះថ្នាក់ចរាចរណ៍កើតឡើងកាលពីប៉ុន្មានខែមុន ៕ (កែសម្រួលដោយ ៖ ធីតា)
ចែករំលែកព័តមាននេះ