រាជធានីភ្នំពេញ ៖ ចាប់តាំងពីកម្ពុជាក្លាយជាព្រះរាជាណាចក្រកម្ពុជា ឬចាប់តាំងពីមានការបោះឆ្នោតតំណាងរាស្ត្រអាណតិ្តទី១ក្នុងឆ្នាំ ១៩៩៣មក បានជំរុញអោយវិនិយោគិនពីបរទេសមកដាក់ទុនផ្ទាល់វិនិយោគនៅកម្ពុជា និងបានធ្វើអោយការវិនិយោគផ្ទាល់ពីបរទេសមានកំណើនឡើងជាបន្តបន្ទាប់ ។ បើគិតជាទឹកប្រាក់វិនិយោគផ្ទាល់ពីបរទេសពីឆ្នាំ១៩៩៣ រហូតដល់ឆ្នាំ ២០១៩ កម្ពុជាទទួលការវិនិយោគផ្ទាល់ពីបរទេសមានទឹកប្រាក់ ប្រមាណ ៣៣ពាន់លានដុល្លារអាមេរិក ដែលក្នុងនោះគឺមហាអំណាចចិននាំមុខគេ
បង្អស់ ។
យោងតាមរបាយការណ៍របស់ធនាគារជាតិនៃកម្ពុជាចេញផ្សាយកន្លងមកនេះ បានអោយដឹងថា ការវិនិយោគផ្ទាល់បរទេសនៅគម្ពុចា ភាគច្រើនមានប្រភពមកពីប្រទេសក្នុងតំបន់អាស៊ីភាគខាងកើត រួមមាន ចិន មានច្រើនជាងគេដែលមានអត្រារហូតដល់២៩ភាគរយ កូរ៉េខាងត្បូង១១ភាគរយ ហុងកុង ៩ភាគរយ វៀតណាម៧ភាគរយ សិង្ហបុរី ៦ភាគរយ ជប៉ុន៦ភាគរយ តៃវ៉ាន់ ៦ភាគរយ ម៉ាស៊ីឡេស៊ី ៥ភាគរយ ថៃ ៥ភាគរយចក្រភពអង់គ្លេស ៣ភាគរយ និងប្រទេសផ្សេងៗទៀត មាន១៤ភាគរយ ។
របាយការណ៍ក៏បានលម្អិតពីចំនួនទឹកប្រាក់ដែលប្រទេសនីមួយៗបានដាក់ទុនវិនិយោគផ្ទាល់នៅកម្ពុជា ក្នុងរយៈពេលជាង២៧ឆ្នាំមកនេះផងដែរ ក្នុងនោះ ចិន បានដាក់ទុនវិនិយោគផ្ទាល់នៅកម្ពុជាប្រមាណ ៩,៤ពាន់លានដុល្លារអាមេរិក ភាគច្រើនទៅលើវិស័យកម្មន្តសាល បន្ទាប់មកប្រទេស កូរ៉េខាងត្បូងបានដាក់ទុនប្រមាណ ៣,៧ពាន់លានដុល្លារអាមេរិក រយៈពេល២៧ឆ្នាំមកនេះ ដែលផ្ដោតទៅលើវិស័យ អចលនទ្រព្យ ប្រទេសហុងកុងបានដាក់ទុនប្រមាណ២,៩ពាន់លានដុល្លារអាមេរិក ភាគច្រើនទៅលើវិស័យកម្មន្តសាលដូចចិនដែរ ហើយប្រទេសវៀតណាមបានវិនិយោគផ្ទាល់នៅកម្ពុជា ប្រមាណ២,៣ពាន់លានដុល្លារ ដែលភាគច្រើនទៅលើវិស័យកសិកម្ម ដែលមានរហូតដល់៧០ភាគរយនៃការវិនិយោគសរុបរបស់ខ្លួននៅកម្ពុជា ។
ប្រភពដដែលបានបញ្ជាក់ថា ចំណែកប្រទេសសិង្ហបុរីវិញ ក៏បានដាក់ទុនប្រមាណ២ពាន់លានដុល្លារអាមេរិក រយៈពេល២៧ឆ្នាំមកនេះ ដោយផ្តោតទៅលើវិស័យហិរញ្ញវត្ថុ ប្រទេសជប៉ុនវិនិយោគ២ពាន់លានដុល្លារែរទៅលើវិស័យហិរញ្ញវត្ថុដូចគ្នា ។ បន្ទាប់មកទៀតតៃវ៉ាន់បានដាក់ទុនវិនិយោគប្រមាណ១,៩ពាន់លានដុល្លារនៅកម្ពុជារយៈពេល២៧ឆ្នាំមកនេះ ដោយផ្ដោតទៅលើវិស័យកម្មន្តសាល ខណៈម៉ាឡេស៊ីបានដាក់ទុនវិនិយោគផ្ទាល់នៅកម្ពុជាប្រមាណ ១,៦ពាន់លានដុល្លារអាមេរិកទៅលើហិរញ្ញវត្ថុក្នុងរយៈពេល២៧ឆ្នាំកន្លងមកនេះ ។
កម្ពុជានូវតែស្វាគមន៍រាល់ការវិនិយោគពីគ្រប់ទិសទី នៅកម្ពុជា ដើម្បីបង្កើតការងារដល់ប្រជាពលរដ្ឋនិងជំរុញកំណើនសេដ្ឋកិច្ចជាតិផងដែរ ។ រាជរដ្ឋាភិបាលបានប្រកាសបើកចំហររាល់ការវិនិយោគពីគ្រប់ប្រទេសហើយរាជរដ្ឋាភិបាលក៏បានលើកទឹកចិត្តដល់វិនិយោគទាំងក្នុងនិងក្រៅប្រទេសដើម្បីបន្តដាក់ទុនវិនិយោគបន្ថែមទៀត ជាក់ស្ដែងរាជរដ្ឋាភិបាល បានរៀបចំនូវវេទិការសាធារណៈរវាងវិស័យឯកជន និងរាជរដ្ឋាភិបាលដើម្បីអោយវិនិយោគិនបានលើពីបញ្ហាកង្វល់របស់ខ្លួនទៅកាន់ថ្នាក់ដឹកនាំដើម្បីដោះស្រាយជូនភ្លាមៗនិងបន្តបន្ទាប់ ។
តាមសេចក្តីប្រកាសរបស់ក្រសួងសេដ្ឋកិច្ចនិងហិរញ្ញវត្ថុ បានអោយដឹងថា ប្រមុខរាជរដ្ឋាភិបាលសម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រី បានកំណត់យកថ្ងៃទី០១ ខែមេសា ឆ្នាំ ២០២០ ដើម្បីរៀបចំវេទិការាជរដ្ឋាភិបាល និងផ្នែកឯកជននៅ ដើម្បីជួបជាមួយបណ្ដាវិនិយោគិនធុរជន ដែលកំពុងដាក់ទុននិងធ្វើអាជីវកម្មនៅក្នុងប្រទេសកម្ពុជា ៕ កែសម្រួលដោយ ៖ សុឃាក់
ចែករំលែកព័តមាននេះ