ខេត្តតាកែវ ៖ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក កាលពីថ្ងៃទី២៦ ខែមករានេះ បានអញ្ជើញចូលរួមក្នុងពិធីចែកអំណោយជូនគ្រួសារជួបការលំបាកជនពិការ និងសិស្សានុសិស្ស ស្ថិតក្នុងវិទ្យាល័យសំរោងពន្លៃ ឃុំពន្លៃ ស្រុកអង្គរបុរី ខេត្តតាកែវ ។
លោក ហ៊ុន ម៉ាណែត បានថ្លែងបញ្ជាក់ថា ការចែកអំណោយដល់ប្រជាពលរដ្ឋ និងសិស្សក្រីក្រសំខាន់គ្រួសារជនពិការដែលជួបការលំបាកនាឱកាសនេះ គឺដើម្បីចែករំលែកនូវស្នាមញញឹម និងសេចក្តីស្រឡាញ់ក្នុងនាមជាមហាគ្រួសារខ្មែរមិនថា បងប្អូនខ្មែរនៅក្នុងប្រទេស ឬនៅឯក្រៅប្រទេសនោះទេ ។
ឧត្តមសេនីយ៍ឯក ហ៊ុន ម៉ាណែត បានបញ្ជាក់បន្ថែមថា សុខសន្តិភាព សុខសប្បាយ និងលទ្ធភាពដែលធ្វើឲ្យជីវភាពរស់នៅល្អប្រសើរកំពុងផ្តល់ឱកាសឱ្យបងប្អូនប្រជាពលរដ្ឋនៅតាមគ្រួសារនីមួយៗ នៅទូទាំងប្រទេសបានជួបជុំកម្សាន្តសប្បាយរីករាយ និងចែករំលែកការសប្បាយ ក្នុងឱកាសបុណ្យទានតូចធំផ្សេងៗ ។ ជាក់ស្តែងការជួបជុំគ្នានៅទីនេះ គឺកើតចេញពីការរួមចិត្ត រួមគ្នាធ្វើ ដើម្បីចែករំលែកស្នាមញញឹម និងសេចក្តីស្រឡាញ់ដោយមានការចូលរួមរបស់បងប្អូនខ្មែរដែលមានសមានចិត្តមកពីក្រៅប្រទេស , សមាគមក្នុងស្រុក, អាជ្ញាធរដែនដីគ្រប់ជាន់ថ្នាក់, ប្អូនៗយុវជនស្ម័គ្រចិត្ត និងសប្បុរសជននានា ដើម្បីជួយសម្រាលបន្ទុកការលំបាករបស់លោកយាយលោកតាអ៊ំពូមីងទាំងអស់ ។
លោក ហ៊ុន ម៉ាណែត ក៏បានថ្លែងអំណរគុណចំពោះសមាគមបេះដូងបងស្រី (Sisters’ Heart) មកពីសហរដ្ឋអាមេរិក, សមាគមចលនាយុវជនកម្ពុជា ក្រុម ១៥៧, សមាគម OCC, ក្រុមមិត្តរួមចិត្តអតីតសិស្សខេត្តបាត់ដំបង និងបងប្អូនប្រជាពលរដ្ឋសប្បុរសជន ដែលរស់នៅសហរដ្ឋអាមេរិក, អូស្ត្រាលី, បារាំង, កាណាដា និងអង់គ្លេស ដែលបានរួបរួមគ្នាធ្វើសកម្មភាពសប្បុរសធម៌ដ៏ថ្លៃថ្លានេះ ជាការរួមចិត្តតែមួយរួមសកម្មភាពតែមួយ ដោយមានការចូលរួមរបស់បងប្អូនខ្មែរយើងមកពីគ្រប់ទិសទីទាំងក្នុង និងក្រៅប្រទេស ដើម្បីជួយចែករំលែកដល់ប្រជាពលរដ្ឋ ទោះតិចក្តី ច្រើនក្តី ។ លោកបានសង្កត់ធ្ងន់ថា សកម្មភាពរួមទាំងទឹកចិត្តសប្បុរសទាំងអស់នោះ គឺអាចបញ្ជាក់បាន អំពីស្មារតីរួមរបស់យើងក្នុងការជួយប្រទេសជាតិ ជួយប្រជាពលរដ្ឋ តាមរយៈកម្លាំងកាយចិត្ត និងធនធានថវិកាដែលយើងមាន ហើយនេះជាស្មារតីរួមពិតប្រាកដ សូមរួបរួមគ្នាតទៅទៀត ជួយគ្នាតទៅទៀត ក្នុងនាមជាមហាគ្រួសារខ្មែរយើង។
យ៉ាងណាក៏ដោយឧត្តមសេនីយ៍ឯក ហ៊ុន ម៉ាណែត បានថ្លែងអំណរគុណដល់សន្តិភាព ដែលមាននៅគ្រប់ទីកន្លែងទូទាំងប្រទេស និងដែលជារបស់យើងទាំងអស់គ្នា ។ លោកថា សន្តិភាពនេះធ្វើឱ្យមានថ្ងៃនេះ និងបង្កើតក្តីសង្ឃឹមក្នុងជីវភាពបន្តទៅមុខរួមទាំងឱកាសក្នុងការចូលរួមចែករំលែកជួយគ្នាដូចពេលនេះ ហើយក៏ជាសន្តិភាពសម្រាប់កូនចៅដែលកំពុងមានជីវិតរស់នៅក្នុងការរីករាយទទួលផលពីផ្លែផ្កានៃសន្តិភាព ។
នាឱកាសនោះដែរ លោក ហ៊ុន ម៉ាណែត ក៏មិនភ្លេចថ្លែងនូវការកោតសរសើរ និងសូមអរគុណប្រជាពលរដ្ឋឃុំពន្លៃ ស្រុកអង្គរបូរី ដែលកន្លងមកតែងបានគាំទ្រ សម្តេចអគ្គមហាសេនាបតី តេជោ ហ៊ុន សែន, ជឿទុកចិត្តលើការដឹកនាំរបស់សម្តេច ដែលនាំមកនូវសន្តិភាព និងការអភិវឌ្ឍរីកចម្រើន មានមន្ទីរពេទ្យ មានសាលារៀន មានផ្លូវ មានទឹក មានភ្លើង ហើយ ដែលនឹងមានការបន្តកសាងជា ជំហានៗទៅមុខទៀត ៕
ចែករំលែកព័តមាននេះ