រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍ស៊ីអិនស៊ី កាលពីថ្ងៃអាទិត្យទី២៦មករា កីឡាករកម្ពុជាពីររូបបានធ្វើឱ្យអ្នកគាំទ្ររបស់ខ្លួនពេញចិត្តយ៉ាងខ្លាំងតាមរយៈការយកឈ្នះគូប្រកួតដែលជាកីឡាករបរទេសរៀងៗខ្លួន។ កីឡាករ ហ៊ឹម សេរី មកពីក្លិបតាព្រហ្មមានជ័យ បានធ្វើឱ្យកីឡាករថៃ ណុកត្រាក់ធីប ស៊ីត ផអ៊ែត បោះបង់ការប្រកួតត្រឹមទឹកទី២ ខណៈកីឡាករ អេ ណារ័ត្ន មកពីក្លិបអេភូថងកីឡាបានយកឈ្នះកីឡាករអ៊ូសបេគីស្ថាន Tulabaev Kobilbek ដោយពិន្ទុ ។
ឈុតឆាកប្រកួតរវាងកីឡាករ ហ៊ឹម សេរីនិងកីឡាករថៃ ណុកត្រាធីប ពិតជាធ្វើឱ្យអ្នកតាមដានការប្រកួតមានការចាប់អារម្មណ៍យ៉ាងខ្លាំង ដោយសារតែកីឡាករកម្ពុជាម្នាក់នេះប្រើក្បាច់ប្រយុទ្ធពិសេសៗវាយលុកទៅលើគូប្រកួតយ៉ាងសាហាវតាំងពីបើកឆាកប្រកួតនៅក្នុងទឹកទី១ម៉្លេះ។ ឯកីឡាករថៃក៏មិនធម្មតានោះដែរ គេបានវាយបកសងវិញភ្លាមៗសំដៅផ្ទៃមុខហ៊ឹម សេរី តែត្រូវហ៊ឹម សេរី បារ៉ាសជាប់រហូត ។
ស្នៀតជើងរបស់ហ៊ឹម សេរី មិនបង្អង់ទុកយូរឡើយ បានទាត់សន្ធាប់ទៅលើគោលដៅសំខាន់ៗ ដូចជាកណ្ដៀតក្អមនិងកញ្ចឹងកប៉ុន្តែនៅតែមិន អាចធ្វើអីកីឡាករថៃបាន ។ គ្រាន់តែចូលដល់ទឹកទី២ភ្លាម ហ៊ឹម សេរី បានសម្រុកចូលវាយលុកទៅលើកីឡាករថៃ ជាបន្តទៀត ដោយប្រើស្នៀតជើងទាត់ផ្ទួនៗត្រូវដើមដៃខាងឆ្វេងកីឡាករថៃបណ្ដាលឱ្យរងរបួសជាទម្ងន់មិនអាចប្រកួតតទៅទៀតបានត្រូវលោកអាជ្ញាកណ្ដាលបញ្ឈប់លែងឱ្យប្រកួតតែម្ដង ។
ក្រឡេកមើលការប្រកួតរវាងកីឡាករ អេ ណារ័ត្ន ជាមួយកីឡាករអ៊ូសបេគីស្ថានវិញក៏មិនអន់ប៉ុន្មានដែរ ធ្វើឱ្យអ្នកទស្សនាផ្ទាល់ស្រែកហ៊ោកងរំពងពេញសង្វៀនតែម្ដងព្រោះពួកគេទាំងពីរបានប្រើស្នៀតពិសេសៗវាយសម្រុករកគ្នាដើម្បីយកឈ្នះរៀងខ្លួន ។ គូនេះចាប់ផ្ដើមវាយសម្រុកតាំងពីទឹកទី១ ក្នុងពេលកីឡាករ អ៊ូសបេគីស្ថាន មានកម្លាំងខ្លាំងជាង រីឯល្បិចប្រកួតវិញចាញ់អេ ណារ័ត្នដាច់តែម្ដង ។
ដូច្នេះហើយបានជាចូលដល់ទឹកទី៤គេសង្កេតឃើញកីឡាករ អ៊ូសបេគីស្ថានស្ថានរាងធ្លាក់ដៃបន្តិចធ្វើឱ្យកីឡាករ អេ ណារ័ត្នមានឱកាសវាយយកឈ្នះដោយពិន្ទុ។
ចំណែកគូប្រកួតមិត្តភាពវិញ កីឡាករ ពុទ្ធ ភារិន្ទ មកពីក្លិបពុទ្ធសេរីវង្សពោធិសែនជ័យ បានយកឈ្នះកីឡាករ លាភ សំណាង មកពីក្លិបកងពលតូចលេខ៧០ដោយពិន្ទុ និងកីឡាករ ទេស បូរី មកពីក្លិបកងពលតូចលេខ៧០ចាញ់ពិន្ទុកីឡាករ ភាព ផាសេង មកពីក្លិបរាហូកីឡាខេត្តបាត់ដំបង ៕ (កែសម្រួលដោយ ៖ បុប្ផា)
ចែករំលែកព័តមាននេះ