មណ្ឌលគិរី ៖ ក្នុងឱកាសបុណ្យចូលឆ្នាំថ្មីប្រពៃណីចិន-វៀតណាម ក្នុងរយៈពេល៣ថ្ងៃ គិតចាប់ពីថ្ងៃទី២៤-២៦ ខែមករានេះ មានចំនួនជាង២ម៉ឺននាក់ នេះបើតាមរបាយការណ៍របស់មន្ទីរទេសចរណ៍ខេត្តមណ្ឌលគិរី នៅព្រឹកថ្ងៃទី២៧ ខែមករានេះ ។
លោក ងិន សុវិមាន ប្រធានមន្ទីរទេសចរណ៍ខេត្តមណ្ឌលគិរីបានបញ្ជាក់ថា ភ្ញៀវទេសចរដែលមកទស្សនានៅខេត្តមណ្ឌលគិរីក្នុងឱកាសបុណ្យចូលឆ្នាំចិន-វៀតណាម ឆ្នាំ២០២០ សរុបប្រមាណចំនួន២១.៦២៥នាក់ ក្នុងនោះទេសចរណ៍ជាតិប្រមាណ២១.៣៣៨នាក់ ទេសចរណ៍អន្តរជាតិប្រមាណ ២៨៧នាក់ ធៀបនឹងរយៈពេលដូចគ្នាឆ្នាំ២០១៩ សរុបប្រមាណចំនួន១៩.៥២៨នាក់ ក្នុងនោះទេសចរណ៍ជាតិប្រមាណ១៩.២១៦នាក់ ទេសចរណ៍អន្តរជាតិប្រមាណ ៣១២នាក់ កើន១០,៧៣% ទេសចរណ៍ជាតិកើន១១,០៤% ទេសចរណ៍អន្តរជាតិថយចុះ ៨,០១% ហើយចំពោះស្ថានភាពសន្តិសុខ សុវត្ថិភាព និងសណ្តាប់ធ្នាប់សាធារណៈល្អប្រសើរ ។
លោកប្រធានមន្ទីរទេសចរណ៍ខេត្តបានឱ្យដឹងថា កត្តាដែលធ្វើឱ្យភ្ញៀវទេសចរមកទស្សនានៅខេត្តមួយនេះ មានការកើនឡើងជារៀងរាល់ឆ្នាំ គឺដោយសារប្រទេសជាតិមានសុខសន្តិភាព ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងការខិតខំប្រឹងប្រែងរបស់ឯកឧត្តម ស្វាយ សំអ៊ាង អភិបាលខេត្ត និងមានការចូលរួមពីស្ថាប័ននានាក្នុងការរួមចំណែកធ្វើឱ្យខេត្តមណ្ឌលគិរី មានការអភិវឌ្ឍន៍រីកចម្រើនពីមួយឆ្នាំទៅមួយឆ្នាំ ។
លោកបន្ថែមថា បច្ចុប្បន្នខេត្តមណ្ឌលគិរី មានហេដ្ឋារចនាសម្ព័ន្ធផ្លូវថ្នល់ល្អប្រសើរ និងសម្បូរដោយសក្តានុពល នៃវិស័យទេសចរណ៍ និងមានលក្ខណៈជាធម្មជាតិ អាកាសធាតុល្អ និងសម្បូរដោយវាលស្មៅ ភ្នំ និងមានផ្ទះសំណាក់ សណ្ឋាគារ មានរមណីយដ្ឋាន ភោជនីយដ្ឋានជាច្រើនកន្លែង សម្រាប់ជាតម្រូវការរបស់ភ្ញៀវជាតិ និងអន្តរជាតិមកទស្សនាកម្សាន្តនៅទឹកដីដ៏ស្រស់បំព្រងនៃខេត្តមណ្ឌលគិរី ជាពិសេស ប្រជាពលរដ្ឋ មានជីវភាពកាន់តែប្រសើរ ហើយចំពោះផ្ទះសំណាក់ សណ្ឋាគារ និងនៅតាមរមណីយដ្ឋាននានាក្នុងខេត្តមានលក្ខណៈសមរម្យដែលភ្ញៀវទេសចរអាចទទួលយកបាន ។
លោក ងិន សុវិមាន បានអំពាវនាវដល់ប្រជាពលរដ្ឋក៏ដូចជា ភ្ញៀវទេសចរជាតិ-អន្តរជាតិ ដែលមកទស្សនានៅខេត្តមណ្ឌលគិរី សូមចូលរួមសំអាតអនាម័យបរិស្ថានឱ្យបានល្អ ព្រោះបរិស្ថានស្អាតផ្តើមចេញពីយើងទាំងអស់គ្នា៕ កែសម្រួលដោយ ៖ សុឃាក់
ចែករំលែកព័តមាននេះ