ខេត្តប៉ៃលិន ៖ មិនថា ប្រជាពលរដ្ឋទាំងខេត្តប៉ៃលិន ក៏ដូចជាភ្ញៀវទេសចរនៅខេត្តនានានោះឡើយ នរណាៗក៏កោតសរសើរមិនដាច់ពីមាត់ដែរថា ទឹកធ្លាក់អូរតាវ៉ៅ ហៅទឹកធ្លាក់ភ្នំខៀវ ជាកន្លែងដែលមានទឹកជ្រោះថ្លាឆ្វង់ ធម្មជាតិសុទ្ធសាធ…
ខេត្តប៉ៃលិន ៖ មិនថា ប្រជាពលរដ្ឋទាំងខេត្តប៉ៃលិន ក៏ដូចជាភ្ញៀវទេសចរនៅខេត្តនានានោះឡើយ នរណាៗក៏កោតសរសើរមិនដាច់ពីមាត់ដែរថា ទឹកធ្លាក់អូរតាវ៉ៅ ហៅទឹកធ្លាក់ភ្នំខៀវ ជាកន្លែងដែលមានទឹកជ្រោះថ្លាឆ្វង់ ធម្មជាតិសុទ្ធសាធ ហូរធ្លាក់ពីលើភ្នំមក ដែលធ្វើឱ្យភ្ញៀវទេសចរចុះងូតលេងត្រជាក់ទាំងរូបកាយ ថែមទាំងសប្បាយក្នុងចិត្ត បំបាត់នូវទុក្ខកង្វល់នានា ថែមទាំងមានទេសភាពព្រៃភ្នំអមទៅដោយសម្លេងរ៉ៃយំយ៉ាងពីរោះនៅតាមដើមឈើ ដែលដុះនៅក្បែរមាត់អូរផងដែរ ។
ជាក់ស្តែងកាលពីព្រឹកថ្ងៃទី២៦ ខែមករា ឆ្នាំ២០២០នេះ ខណៈរដូវបុណ្យចូលឆ្នាំចិន-វៀតណាម មិនទាន់ចប់នៅឡើយ គេសង្កេតឃើញភ្ញៀវទេសចរមកពីតាមបណ្តាខេត្តនានា ជាច្រើននាំគ្នាបើកបរម៉ូតូ និងរថយន្តទៅលេងជាច្រើនគ្រឿង ជាហេតុធ្វើឱ្យអាជីវករលក់ដូរដាច់កក់កបគួរឱ្យកត់សម្គាល់ ។
ប្រភពពីលោក ឃួន ឈីម អាយុ៥០ឆ្នាំ ជាមេការលក់សំបុត្រផ្លូវទៅទឹកធ្លាក់អូរតាវ៉ៅ បានរៀបរាប់ឱ្យដឹងថា នាឱកាសបុណ្យចូលឆ្នាំប្រពៃណីចិន-វៀតណាមនេះ គឺមានភ្ញៀវទេសចរធ្វើដំណើរទៅលេងកំសាន្តទឹកធ្លាក់មានច្រើនប្រហាក់ប្រហែលទៅនឹងឆ្នាំមុនៗដែរ ។
លោកបន្តទៀតថា ការចូលទៅលេងកំសាន្តនៅទឹកធ្លាក់នេះ គឺរថយន្តក្រុង១គ្រឿងតម្លៃ២០០០០រៀល រថយន្តទេសចរណ៍ទួរីសតម្លៃ១៥០០០រៀល ហើយម៉ូតូ១គ្រឿងតម្លៃ៣០០០រៀល ដោយជិះទៅដល់ខាងលើ រថយន្ត១គ្រឿងត្រូវបង់ថ្លៃផ្ញើចំនួន៣០០០រៀល និងម៉ូតូ១គ្រឿងតម្លៃ២០០០រៀល ។ ចំណែកភ្ញៀវទេសចរណ៍ខ្មែរវិញ គឺអត់គិតប្រាក់នោះទេ ដោយឡែកភ្ញៀវទេសចរណ៍អន្តរជាតិវិញ គិតប្រាក់ម្នាក់៤០០០រៀល ។
លោកបន្ថែមទៀតថា នៅក្នុងរមណីយដ្ឋាននេះ គឺបានដាក់នគរបាលចំនួន១២នាក់ឱ្យឈរយាមកាមតាំងពីច្រកខ្លោងទ្វារ រហូតដល់កន្លែងលេងទឹក ដោយមានការសម្រួលផ្លូវរថយន្តជូនភ្ញៀវផងដែរ ។
លោកបញ្ជាក់ទៀតថា ភ្ញៀវមិនរអ៊ូរទាំពីរឿងផ្លូវឆ្ងាយនោះទេ ប៉ុន្តែពួកគេនិយាយថា ផ្លូវមានការលំបាកបន្តិច ខណៈអាជ្ញាធរកំពុងតែធ្វើការឈូសឆាយផ្លូវតាំងពីជាប់នឹងថ្នល់ជាតិ រហូតដល់កន្លែងលេងទឹកតែម្តង ។
បើតាមចុងភៅម្នាក់ប្រចាំទឹកធ្លាក់នេះ បានឱ្យដឹងថា នៅរដូវបុណ្យចូលឆ្នាំចិននេះ ការលក់ដូរពិតជាដាច់ខ្លាំង ដោយក្នុង១ថ្ងៃៗគាត់អាចលក់ត្រីអស់រហូតដល់រាប់រយក្បាល និងមាន់ដុតក៏លក់ដាច់ចំនួន៥០ទៅ៦០ក្បាលដែរ ។ គាត់បន្តទៀតថា នៅពេលបុណ្យចូលឆ្នាំចិននេះ ត្រីដុត១ក្បាលតម្លៃ៣០០០០រៀល មាន់ដុត១ក្បាលតម្លៃ៥០០០០រៀល និងថ្លៃជួលខ្យុសសម្រាក១កន្លែង១៥០០០រៀល ហើយក៏មានម្ហូបផ្សេងៗទៀត លក់ក្នុងតម្លៃដូចថ្ងៃធម្មតាដែរ ។
បើតាមភ្ញៀវទេសចរម្នាក់ឈ្មោះ ផាន់ ចន្ថា ភេទប្រុស អាយុ៤៨ឆ្នាំ មកពីភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន និងភ្ញៀវទេសចរឈ្មោះ ទូច ទិត្យ ភេទប្រុស អាយុ៧៥ឆ្នាំ រស់នៅភូមិអូរចា សង្កាត់អូរចា ក្រុងបាត់ដំបង និងស្ត្រីម្នាក់ឈ្មោះ កែវ ចន្ធី អាយុ៤៨ឆ្នាំ បានរៀបរាប់ឱ្យដឹងដូចៗគ្នាថា ពួកគាត់ពិតជាសប្បាយរីករាយខ្លាំងណាស់ ទោះបីជាអាយុកាន់តែវ័យចាស់បន្តិចហើយក៏ដោយ គ្រាន់តែឃើញក្មេងៗលេងទឹកក៏ពួកគាត់មានការរំភើងជំនួស ដោយពេលខ្លះក៏ចុះទៅហែលទឹកលេងជាមួយពួកគេទាំងនោះផងដែរ ។
ប្រភពបន្តទៀតថា ពួកគាត់មួយចំនួន ទើបតែធ្វើដំណើរមកលេងរមណីយដ្ឋានខាងលើជាលើកទី១ ខ្លះមកបានពីរទៅបីដងហើយ ប៉ុន្តែឱ្យតែដល់រដូវបុណ្យទានធំៗម្តងៗ ចង់តែនាំគ្នាទៅលេងទឹកធ្លាក់ភ្នំខៀវ ព្រោះពេលចុះងូតធ្វើឱ្យត្រជាក់ដល់បេះដូង បំបាត់ការនឿយហត់ ធ្វើឱ្យមានកម្លាំងចិត្ត និងមិននឹកនាពីរឿងលំបាកវេទនាអ្វីផ្សេងៗ ។ ម្យ៉ាងវិញទៀត ទេសភាពតាមដងអូរក៏បញ្ចេញពណ៌ខៀវស្រស់បំព្រង ថែមទាំងមានខ្យល់អាកាសបរិសុទ្ធ ដោយស្តាប់សម្លេងអ្នកទៅលេងទឹកបញ្ចេញភាពអឹងកងលាយឡំជាមួយសត្វយំខ្ញៀវខ្ញារនៅតាមដើមឈើធំៗផងដែរ ។
ចំណែកនគរបាលទេសចរណ៍ម្នាក់ឈ្មោះ ឡូន សុខផានី បានរៀបរាប់ឱ្យដឹងថា នៅបុណ្យចូលឆ្នាំចិននេះ មានកងកម្លាំងជាង១០នាក់ដាក់នៅតាមគោលដៅនីមួយៗ ដើម្បីការពារសន្តិសុខសណ្តាប់ធ្នាប់ និងសម្រួលផ្នែកចរាចរណ៍ជូនភ្ញៀវឱ្យធ្វើដំណើរចេញចូលទៅមកដោយសុវត្ថិភាព ។
លោកបន្តទៀតថា តាំងពីចាប់ផ្តើមថ្ងៃសែនចិនរួច រហូតមកដល់ពេលនេះមិនទាន់មានបញ្ហាគ្រោះថ្នាក់អ្វីកើតឡើងចំពោះភ្ញៀវទេសចរដែលធ្វើដំណើរទៅលេងទឹកធ្លាក់នោះឡើយ ហើយការប៉ះទង្គិចគ្នា ឬបាត់បង់ម៉ូតូក៏អត់មានដែរ ព្រោះនគរបាលមានការយាមកាមយ៉ាងតឹងរឹង ដើម្បីឱ្យពលរដ្ឋចូលទៅលេងកំសាន្តសប្បាយ ៕ (កែសម្រួលដោយ ៖ បុប្ផា)
ចែករំលែកព័តមាននេះ