ខេត្តកណ្ដាល ៖ សេចក្តីរាយការណ៍ឱ្យដឹងថា នៅវេលាម៉ោង០៤និង៣០នាទីរសៀលថ្ងៃទី២៦ មករា ២០២០ មានករណីលិចទូកម៉ាស៊ីនមួយគ្រឿងទៅក្នុងទន្លេមេគង្គ ស្ថិតត្រង់ភូមិពាម ឃុំរការកោង១ ស្រុកមុខកំពូល ខេត្តកណ្ដាល ខណៈកំពុងធ្វើដំណើរទៅកាន់កោះស្នេហា ដែលក្នុងហេតុការណ៍នោះ បានបាត់ខ្លួននារី២នាក់នៅមិនទាន់រកឃើញ ។
សេចក្តីរាយការណ៍បន្តថា ជនរងគ្រោះទាំង២នាក់ ម្នាក់ឈ្មោះយឿន ស្រីពេជ្រ ភេទស្រី អាយុ១៨ឆ្នាំ មានទីលំនៅខណ្ឌឫស្សីកែវ រាជធានីភ្នំពេញ និងម្នាក់ទៀតឈ្មោះស្រីណា ភេទស្រី អាយុ១៨ឆ្នា ំមានទីលំនៅខណ្ឌប្ញស្សីកែវ រាជធានីភ្នំពេញ ។ ដោយឡែក ទូកម៉ាស៊ីនដែលលិចមានទទឹង១,៦០ម៉ែត្រ និងបណ្ដោយ៦,៥០ម៉ែត្រ ចាប់ម៉ាស៊ីនចំហៀង និងជាកម្មសិទ្ធិរបស់ឈ្មោះសន សយ ភេទប្រុស អាយុ៥១ឆ្នាំ នៅភូមិកើតហេតុ។
ប្រភពបន្តថា នៅមុនពេលកើតហេតុ ទូកម៉ាស៊ីនខាងលើមានដឹកមនុស្សមួយក្រុម មានគ្នាប្រហែល១២នាក់ជិះឆ្លងទៅលេងកោះស្នេហា ប៉ុន្តែជិះចេញបានប្រហែល១០ម៉ែត្រ ទូកក៏បានលិចទៅក្នុងទឹក ដែលគេ មិនទាន់ដឹងពីមូលហេតុ ហើយក៏បាត់ខ្លួននារីទាំង២នាក់នោះតែម្តង ។ គិតមកត្រឹមម៉ោង១០ និង៥០នាទីព្រឹកថ្ងៃទី២៧ មករា នេះ នៅតែមិនទាន់មានដំណឹងពីនាងនៅឡើយ ។
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ