រាជធានីភ្នំពេញ ៖ តាមការព្យាករណ៍របស់ស្ថាប័នអន្តរជាតិ និងស្ថាប័នជាតិក្នុងស្រុកផងនោះថា កំណើនសេដ្ឋកិច្ចកម្ពុជា នៅតែរក្សាបានក្នុងរង្វង់ប្រមាណ៧ភាគរយដដែលក្នុងឆ្នាំ ២០១៩ និងឆ្នាំ២០២០នេះ ដោយក្នុងនោះវិស័យចំនួនបីដើរតួនាទីគាំទ្រដល់ការរីកលូតលាស់នៃសេដ្ឋកិច្ច និងធ្វើអោយស្ថេរភាពសេដ្ឋកិច្ចនៅតែមានលំនឹងល្អ ។
ដូច្នេះវិស័យសំខាន់ចំនួនបីដែលគាំទ្រកំណើនសេដ្ឋកិច្ចកម្ពុជានៅតែមានស្ថេរភាពមានវិស័យអ្វីខ្លះ ?
យោងតាមរបាយការណ៍របស់ធនាគារជាតិនៃកម្ពុជា បានអោយដឹងថាវិស័យបី ដែលសំខាន់និងចូលរួមចំណែកដល់ការរីកលូតលាស់នៃសេដ្ឋកិច្ចកម្ពុជានោះ រួមមាន វិស័យនាំចេញ វិស័យសំណង់ និងទេសចរណ៍ ។ បើតាមការព្យាករណ៍របស់ធនាគារពិភពលោក និងធនាគារអភិវឌ្ឍន៍អាស៊ីក៏ដូចជាស្ថាប័នរូបិយវ ត្ថុអន្តរ ជាតិ MFI បានបង្ហាញថាសេដ្ឋកិច្ចកម្ពុជា ក្នុងឆ្នាំ ២០២០នេះ នឹងនៅតែល្អប្រសើរក្នុងរង្វង់ប្រមាណ ៦,៨ភាគរយ ។
បើតាមរបាយការណ៍របស់ក្រសួងពាណិជ្ជកម្មកម្ពុជា បានបង្ហាញថា ការនាំចេញ របស់កម្ពុជាទៅកាន់ទីផ្សារអន្តរជាតិក្នុងឆ្នាំ ២០១៩ សម្រេចបានក្នុងរង្វង់ប្រមាណជាង១០ពាន់លានដុល្លារអាមេរិក ។ តួលេខនេះគឺសម្រាប់ទំនិញ ដែលនាំចេញក្រោមប្រព័ន្ធអនុគ្រោះពន្ធ ក្នុងនោះការនាំចេញ ការនាំចេញសម្លៀកបំពាក់និងស្បែកជើងមានទំហំធំជាងគេនៃការនាំចេញទំនិញសរុបទៅកាន់គ្រប់ទ្វីបលើពិភពលោក ។ កម្ពុជានៅតែបន្តស្វែងរកទីផ្សារថ្មីៗបន្ថែមទៀត ដើម្បីនាំចេញផលិតផលរបស់ខ្លួនទៅកាន់ទីផ្សារថ្មីៗទាំងនោះ ក្នុងនោះដែរ កម្ពុជាក៏បានបង្កើតកិច្ចចរចារពាណិជ្ជកម្មសេរីទ្វេរភាគីរវាងប្រទេសដែលមានសក្ដានុពលផងដែរ ដូចជាប្រទេសចិន និងកូរ៉េ ដែលសុទ្ធសឹងតែជាប្រទេសដែលមានទីផ្សារធំនៅលើពិភពលោក ។ ក្រៅពីនោះ កម្ពុជាក៏បានជំរុញកិច្ចព្រមព្រៀងភាពជាដៃគូរសេដ្ឋកិច្ចគ្រប់ជ្រុងជ្រោយថ្នាក់តំបន់ ហៅកាត់ថា RCEP ផងដែរ ដែលកិច្ចព្រមព្រៀងនេះនឹងផ្ដល់អោយកម្ពុជា កាន់តែមានទីផ្សារធំជាងមុនបន្ថែមទៀត ។
ចំណែកវិស័យទេសចរណ៍ ដែលជាវិស័យគាំទ្រដល់កំណើនសេដ្ឋកិច្ចរបស់កម្ពុជាមួយផ្នែកផងដែរនោះក៏នៅតែមានកំណើនជាវិជ្ជមាន ជាក់ស្ដែង ក្នុងឆ្នាំ ២០១៩កន្លងទៅ បើទោះបីជាកំណើនភ្ញៀវទេសចរក្នុងខេត្តសៀមរាបបានថយចុះបន្តិចមែនក្ដី តែនិយាយជារួមភ្ញៀវទេសចរសរុបមកកាន់កម្ពុជានៅតែមានកំនើនខ្ពស់បើធៀបនឹងឆ្នាំ ២០១៨កន្លងទៅ ។
បើតាមមន្ត្រីជាន់ខ្ពស់ក្រសួងទេសចរណ៍ បានអោយដឹងថា កំនើនភ្ញៀវទេសចរមកដល់កម្ពុជា ឆ្នាំ ២០១៩នៅតែមានកំណើន បើទោះបីជាភ្ញៀវបរទេសមកទស្សនាក្នុងខេត្តសៀមរាបមានការធ្លាក់ចុះក្ដី ។ ការធ្លាក់ចុះភ្ញៀវក្នុងខេត្តសៀមរាប ដោយភ្ញៀវមួយចំនួនបានបង្វែរគោលដៅទេសសចរណ៍របស់ខ្លួនទៅកាន់តំបន់ផ្សេងទៀតក្នុងប្រទេសកម្ពុជា ដូចជាតំបន់កោះ តំបន់មាត់សមុទ្រ និងតំបន់ព្រៃភ្នំជាដើម ។
ចំណែកវិស័យសំខាន់មួយទៀត ដែលទ្រទ្រង់កំណើនសេដ្ឋកិច្ចកម្ពុជានោះ គឺវិស័យសំណង់ ។ ក្នុងឆ្នាំ ២០១៩កន្លងទៅនេះ វិស័យសំណង់ស្រូវបានទុនវិនិយោគប្រមាណជាង៩,៣ពាន់លានដុល្លារអាមេរិក ដែលធ្វើអោយកំណើននៃការសាងសង់នៅកម្ពុជា កាន់តែមានសន្ទុះ និងធ្វើអោយកំណើនអគារខ្ពស់ក៏កាន់តែច្រើន ។ ស្របពេលទន្ទឹមគ្នានេះដែរ ក្រសួងរៀបចំដែនដីនគរូបនីយកម្មនិងសំណង់ ក៏បានពង្រឹងគុណភាពវិស័យនេះបន្ថែម ដើម្បីផ្ដល់ជំនឿទុកចិត្តដល់អ្នកវិនិយោគក្នុងនិងក្រៅប្រទេសបន្តដាក់ទុនវិនិយោគបន្ថែមទៀត ។ ក្នុងវិស័យនេះដែរ បានផ្ដល់ការងារប្រមាណ១៨ម៉ឺនទៅ២០ម៉ឺននាក់ដល់ពលរដ្ឋកម្ពុជា ដែលអាចអោយពួកគេរកចំណូលចិញ្ចឹមគ្រួសារ ដោយមិនចាំបាច់ធ្វើការចំណាកស្រុកទៅកាន់ក្រៅប្រទេស ៕ កែសម្រួលដោយ ៖ សុឃាក់
ចែករំលែកព័តមាននេះ