រាជធានីភ្នំពេញ ៖ បើតាមការពិនិត្យជាក់ស្តែងថ្ងៃចូលឆ្នាំចិន វៀតណាម នាថ្ងៃដំបូងដែលបងប្អូនចិនហៅថា «ថ្ងៃឈីវអិត» សម្រាប់រាជធានីភ្នំពេញហាក់ដូចជា មានសភាពស្ងាត់ជាងឆ្នាំមុនៗ តាមដងវិថីនានាក្នុងនោះមានមហាវិថីព្រះមុនីវង្ស មហាវិថីព្រះនរោត្តម វិថីព្រះស៊ីសុវត្តិ ដែលថ្ងៃធម្មតាមានកកស្ទះចរាចរណ៍យ៉ាងខ្លាំង ។
ដោយឡែកផ្សារធំៗវិញមានផ្សារធំថ្មី ផ្សារអូរឫស្សី ផ្សារចាស់ ផ្សារកណ្តាល ត្រូវបានបិទទ្វារ ហើយអាជីវករខ្លះបង្ខំចិត្តចេញមកតាំងលក់ខោអាវនៅក្រៅរបង ដោយសារតែកន្លែងផ្ញើកង់គេបានឈប់ នេះនិយាយតែផ្សារធំថ្មីមួយប៉ុណ្ណោះ តែការកកស្ទះចរាចរណ៍ជុំវិញមិនមានឡើយ ។
អ្នកស្រី កឹម មួយលី ដែលលក់ខោអាវនៅផ្សារធំថ្មីបាននិយាយឲ្យដឹងថា នេះមិនមែនជាលើកទីមួយទេ សម្រាប់រូបអ្នកស្រីដែលមានតូបលក់ត្រឹមត្រូវនៅក្នុងផ្សារធំថ្មី ហើយបង្ខំចិត្តចេញមកលក់តាមចិញ្ចើមផ្លូវ ដោយសារតែពេលចូលឆ្នាំចិនម្តងៗខាងគណៈកម្មការផ្សារគេបិទទ្វារមិនឲ្យលក់ឡើយ ។ ហើយឃើញថាយើង មិនមែនសែស្រឡាយចិនទើបលក់ជាធម្មតាក្រែងវាចំណូលកើនជាងថ្ងៃធម្មតា តែមិននឹកស្មានថា ផ្សារគេបិទទ្វារ ។
អ៊ុំស្រីយី សាន លក់បន្លែនៅផ្សារធំថ្មីផ្នែកខាងលិចបាននិយាយថា នៅថ្ងៃចូលឆ្នាំចិន វៀតណាម ផ្សារធំថ្មីបានបិទទ្វារជុំវិញផ្សារទាំងអស់មិនអនុញ្ញាតឲ្យអាជីករណាម្នាក់លក់នៅក្នុងផ្សារនោះទេ ដោយឡែកនៅតាមស្តង់លក់គ្រឿងសមុទ្រ ត្រី បន្លែ និងគ្រឿងហូបចុកលក់ជាធម្មតាតែក៏មានក្រុមសន្តិសុខយាមប្រចាំការផងដែរ ហើយជារៀងរាល់ឆ្នាំឲ្យតែចូលឆ្នាំចិន គឺគណៈកម្មការផ្សារគេបិទទ្វារជុំវិញ តែអ៊ីចឹងទំនងដោយសារក្នុងផ្សារគ្មានអ្នកលក់ភាគច្រើន និងម្យ៉ាងទៀត ដើម្បីការពារសុវត្ថិភាពទើបផ្សារបានបិទខាងក្នុង ហើយរៀបចំឲ្យលក់ជុំវិញផ្សារជាបណ្តោះអាសន្ន ។ មិនមែនមានតែផ្សារធំថ្មីមួយនោះទេ ដែលបិទខាងក្នុងផ្សារ គឺមានផ្សារដទៃក៏បិទដែរដូចជា ផ្សារអូឫស្សី ផ្សារទួលទំពូង ផ្សារចាស់ និងផ្សារកណ្តាលផងដែរ ។
អ្នកស្រីប៉ុន ដានី អភិបាលរដ្ឋាករស្វាយ័តផ្សារធំថ្មីបានឲ្យដឹងថា គណៈកម្មការផ្សារមិនបានបិទផ្សារមិនឲ្យបងប្អូនអាជីវករលក់ក្នុងផ្សារនោះទេ គឺដោយសារតែអាជីវករមកលក់តិច ព្រោះអាជីវករដែលជាប់សែស្រឡាយចិនភាគច្រើនមិនមកលក់ទើបគណៈកម្មការផ្សារបង្ខំចិត្តបិទខាងក្នុង តែអនុញ្ញាតឲ្យបងប្អូនអាជីវករលក់នៅខាងក្រៅរបង ហើយការលក់នេះមានរយៈពេលបីថ្ងៃទើបផ្សារបើកដំណើរការជាធម្មតាវិញ ។
ដោយឡែកនៅផ្សារកណ្ដោល ផ្សារចាស់ ផ្សារអូរឫស្សី ផ្សារទួលទំពូងក៏ត្រូវបានគណៈកម្មការផ្សារបិទទ្វារផងដែរ ហើយឃើញអាជីវករនាំគ្នាខាងក្រៅរបងមិនខុសគ្នាពីផ្សារធំថ្មីប៉ុន្មានឡើយ ហើយឲ្យតែចូលឆ្នាំចិន គឺបិទផ្សារព្រោះអាជីវករភាគច្រើនជាប់សែប្រឡាយចិន ។
គេសង្កេតឃើញថា ផ្លូវនៅជុំវិញផ្សារ និងដងវិថីនានាមិនមានការកកស្ទះដូចថ្ងៃធម្មតានោះទេ ហើយហាងលក់គ្រឿងអេឡេគ្រនិច គ្រឿងទំនិញផ្សេងត្រូវបានបិទទ្វារ ដោយឡែកការធ្វើចរាចរណ៍នៅលើស្ពានមិត្តភាពកម្ពុជាចិនវិញមិនមានការកកស្ទះដែរ ។ បុណ្យចូលឆ្នាំប្រពៃណីចិន គឺជាបុណ្យដ៏សំខាន់មួយរបស់បងប្អូនជនជាតិចិន ឬបងប្អូនជនជាតិខ្មែរ ដែលជាប់សែស្រឡាយចិន ។
មន្ត្រីសាលាក្រុងភ្នំពេញមួយរូបបានលើកឡើងថា ៖ នៅថ្ងៃបុណ្យចូលឆ្នាំថ្មីប្រពៃណីជនជាតិចិន ដែលឆ្នាំនេះចាប់ពីថ្ងៃទី២៥-២៧ ខែមករានេះ ស្ថាប័នការងារមួយចំនួនជាពិសេសស្ថាប័នឯកជនបានបិទទ្វារ ។ ដងវិថីសាធារណៈដែលធ្លាប់តែមមាញឹកដោយយានជំនិះគ្រប់ប្រភេទស្ទើរតែរំកិលខ្លួនទៅមុខមិនរួច ក៏ប្រែជាស្រឡះ ខណៈក្រសួងស្ថាប័នរដ្ឋក៏ដូចជា សាលារៀនរដ្ឋខ្លះស្ងាត់មនុស្ស ស្ទើរតែគ្មានសិស្ស ចំណែកផ្សារធំៗនៅក្នុងរាជធានីភ្នំពេញ ដែលមិនមែនជាផ្សារទំនើបបានបិទទ្វារ៣-៤ ថ្ងៃ ។ ម្យ៉ាងវិញទៀតចូលឆ្នាំចិន ឆ្នាំនេះប៉ះចំថ្ងៃសៅរ៍ និងថ្ងៃអាទិត្យដែលមន្ត្រីរាជការបានឈប់សម្រាកផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ