ខេត្តកំពង់ចាម ៖ នៅតំបន់ជាយក្រុងកំពង់ចាមជាប់នឹងរង្វង់មូលនាគព័ន្ធ តាមដងផ្លូវជាតិលេខ៧ គេសង្កេតឃើញមានប្រជាពលរដ្ឋ ចាប់យកអាជីពលក់ផ្លែឈើច្រើនមុខមានពុទ្រា ស្វាយ ក្រូច និងផ្លែឈើមួយចំនួនទៀត ដើម្បីដោះស្រាយជីវភាពគ្រួសារ។ជាមួយនោះមានអ្នកធ្វើដំណើរតាមមធ្យោបាយម៉ូតូនិងរថយន្ត មកឈប់ចូលទិញយកទៅពិសារហូរហែរផងដែរមើលទៅដូចអ៊ូរអរគ្រាន់បើ ។
អ្នកស្រីរៀម ដានី អាយុ៣៨ឆ្នាំ បានប្រាប់ឲ្យដឹងនៅព្រឹកថ្ងៃទី៥ មករា ២០២០ថា គាត់បានចាប់យកអាជីពរបរលក់ផ្លែពុទ្រាគីឡូចំនួន៣ឆ្នាំមកហើយដោយក្នុងមួយថ្ងៃអាចលក់បានពី២០ទៅ ៣០គីឡូក្រាម នឹងទទួលបានប្រាក់ចំណេញ៣ទៅ៤ម៉ឺនរៀល សម្រាប់ដោះស្រាយជីវភាពគ្រួសារ ។
នៅទីនេះដំបូងឡើយមានលក់តែ២ទៅ៣គ្រែប៉ុណ្ណោះ តែមកដល់សព្វថ្ងៃនេះ អ្នកលក់បានកើនរហូតដល់ជិត២០គ្រែឯណោះដែលគ្រាន់តែដាក់គ្រែនិងមានដំបូលក្រណាត់ជ្រកកម្តៅអាចលក់ដូរបានហើយ ។ ចំពោះផ្លែពុទ្រាគីឡូប្រភេទរាយវិញ គាត់លក់បាន១គីឡូតម្លៃ១ម៉ឺនរៀលទៅ១២.០០០រៀល តាមប្រភេទឆ្ងាញ់ឬមិនឆ្ងាញ់ ចំណែកពុទ្រាច្រកថង់រួចលក់តម្លៃផ្សេង ។
អ្នកស្រីឡេង វន្នី អាយុ៥៨ឆ្នាំ ឲ្យដឹងថា ចំពោះតម្លៃផ្លែពុទ្រាគឺគាត់លក់មិនខុសគ្នានៅកន្លែងផ្សេងៗនោះទេ។ក្នុងពេលលក់ដំបូងដាក់តែផ្លែពុទ្រាលក់មួយមុខតែប៉ុណ្ណោះជាប្រភេទពុទ្រាជូរអែមស្រួយឆ្ងាញ់របស់ខ្មែរយើងពុទ្រាក្នុងស្រុក ។ ស្របពេលដែលអ្នកដំណើរមកសួររកទិញផ្លែឈើផ្សេងៗទើបគាត់ដាក់លក់ផ្លែឈើជាច្រើនប្រភេទក្នុងនោះរួមមាន: ពុទ្រា ស្វាយ អំពិលទុំ និងក្រូចថ្លុងជាដើម ។ អ្នកស្រី ឡេង វន្នី ប្រាប់បន្តថា ចាប់តាំងពីពេលដែលគាត់បានប្រកបរបរលក់ដូរនេះមកដល់បច្ចុប្បន្នមានរយៈពេល៥ឆ្នាំហើយ ក្នុងមួយថ្ងៃគាត់អាចទទួលបានប្រាក់ចំណេញប្រាំម៉ឺនរៀលឬលើសនេះក៏មាន ។
របរនេះបានទទួលប្រាក់ចំណេញគ្រាន់បើសម្រាប់ដោះស្រាយជីវភាពគ្រួសារដោយចិញ្ចឹមកូនចំនួន២នាក់ឲ្យទទួលបានការសិក្សារៀនសូត្រ ហើយពេលទំនេរកូនស្រីរបស់គាត់តែងតែមកជួយលក់ដូរ ដើម្បីជួយសម្រាលការលំបាកចំណែកប្ដីរបស់គាត់វិញមានរបរជួសជុលម៉ូតូ ។ ចំពោះផ្លែពុទ្រាត្រូវបានប្រមូលទិញ
ពីម៉ូយនៅស្រុកចំការលើទំនប់ជ្រោយចេក ស្រុកកំពង់សៀម និងនៅក្រោយបន្ទាយទាហានសឹករងខេត្ត ដែលសំបូរជាងគេគឺនៅក្នុងខែធ្នូហើយមកដល់ដើមឆ្នាំ២០២០រាងស្បើយបន្តិច ។
សូមបញ្ជាក់ថា ដោយសារតែផ្លែពុទ្រា នៅខេត្តកំពង់ចាម មានរសជាតិឆ្ងាញ់គ្រាន់បើសូម្បីតែអាជីវករនៅស្រុកស្នួលខេត្តក្រចេះ ក៏បានមកកុម្ម៉ង់ទិញយកទៅលក់នៅទីនោះផងដែរ ។ ក្នុងមួយសប្តាហ៍ថ្ងៃដែលលក់ដាច់ជាងគេគឺនៅថ្ងៃសៅរ៍ឬអាទិត្យ ដែលមានប្រជាពលរដ្ឋធ្វើដំណើរតាមមធ្យោបាយម៉ូតូរថយន្តច្រើនជាងថ្ងៃណាៗទាំងអស់ ។ គាត់លក់ដូរមកដល់សព្វថ្ងៃគឺមានម៉ូយច្រើននៅឆ្ងាយឆ្ងាយបានឆៀងមកចូលទិញផ្លែពុទ្រាយកទៅពិសាចំពោះតម្លៃលក់ក្នុងមួយគីឡូ១២.០០០រៀល នោះជាប្រភេទផ្លែពុទ្រាតូចតែមានរសជាតិឆ្ងាញ់ ។
សូមបញ្ជាក់ថា នៅត្រង់ចំណុចស្ពានបេតុងក្នុងឃុំរអាង ស្រុកកំពង់សៀម ក៏មានប្រជាពលរដ្ឋបានចាប់យកអាជីពលក់ផ្លែពុទ្រាបែបនេះដែរ តែមិនមានច្រើនកន្លែងដូចនៅម្ដុំនាគព័ន្ធនោះទេ ៕
ចែករំលែកព័តមាននេះ