រាជធានីភ្នំពេញ ៖ លោក ម៉ម ប៊ុនហេង រដ្ឋមន្ត្រីក្រសួងសុខាបានក្រើនរំលឹកដល់ប្រជាពលរដ្ឋត្រូវមានការប្រុងប្រយ័ត្នខ្ពស់ចំពោះជំងឺរលាកសួតដែលបង្កឡើងដោយវិរុសកូរ៉ូណា ប្រភេទថ្មីកំពុងរាលត្បាញនៅក្នុងតំបន់អាស៊ី ព្រោះជំងឺនេះអាចកើតមានឡើងជាយថាហេតុ ជាពិសេសត្រូវនៅឱ្យឆ្ងាយពីសត្វបក្សីដែលមានជំងឺ ។
យោងតាមសេចក្តីជូនព័ត៌មានរបស់ក្រសួងសុខាភិបាលស្ដីពីបច្ចុប្បន្នភាព និងវិធានបង្ការជំងឺរលាកសួតបង្កឡើងដោយមេរោគកូរ៉ូណាថ្មី នៅថ្ងៃទី២១ ខែមករានេះ ឆ្នាំ២០២០ លោក ម៉ម ប៊ុនហេង បានលើកឡើងថា ជំងឺរលាកសួតបង្កដោយវីរុសកូរ៉ូណាប្រភេទថ្មី (Cov2019) នៅតែមានរាតត្បាតនៅប្រទេសចិនដូច្នេះ ក្រសួងសូមអំពាវនាវប្រជាពលរដ្ឋទាំងអស់ និងជាពិសេសអ្នកដំណើរដែលមានគម្រោងទៅកាន់ ឬត្រឡប់មកពីខេត្តដែលកំពុងកើតជំងឺនេះនៅប្រទេសចិនត្រូវមានការប្រុងប្រយ័ត្នផ្ទាល់ខ្លួនខ្ពស់ក្នុងការការពារសុខភាពពីការឆ្លងជំងឺនេះនារដូវបុណ្យចូលឆ្នាំចិន និងចូលឆ្នាំខ្មែរប្រពៃណីជាតិខាងមុខ ដោយសារវីរុសនេះមានលក្ខណៈអាចចម្លងពីមនុស្សម្នាក់ទៅម្នាក់ទៀត ។
លោករដ្ឋមន្ត្រីបានបញ្ជាក់យ៉ាងដូច្នេះថា ៖ « ខ្ញុំសូមប្រកាសធ្វើការក្រើនរំលឹកជូនដល់ប្រជាពលរដ្ឋឲ្យមានការប្រុងប្រយ័ត្នខ្ពស់លើការបង្ការការចម្លងជំងឺរលាកសួតបង្កដោយវីរុសកូរ៉ូណាប្រភេទថ្មីដែលអាចកើតមានជាយថាហេតុ ដូច្នេះសូមក្រើនរំលឹកដល់បងប្អូន ប្រជាពលរដ្ឋកម្ពុជាទាំងអស់ថា ត្រូវនៅឲ្យឆ្ងាយពីសត្វបក្សី ឬកុំទៅផ្សារលក់គ្រឿងសមុទ្រហូណាន ឬទីផ្សារ ឬកសិដ្ឋានដែលមានសត្វរស់ ឬសត្វព្រៃ ឬកន្លែងដែលគេដឹងថា មានវីរុសកំពុងចរាចរណ៍ និងភ្នំទៅក្បែរ ឬជិតអ្នកមានជំងឺផ្លូវដង្ហើមស្របនៅទីកន្លែងដែលដឹងថា មានជំងឺបាន និងកំពុងកើតមាន ឬកំពុងផ្ទុះរាតត្បាត» ។
ជាមួយគ្នានោះដែរ លោករដ្ឋមន្ត្រីសង្កត់ធ្ងន់ថា ប្រសិនបើមានករណីសង្ស័យថា មានជំងឺរលាកសួតបង្កដោយលក្ខណប្រភេទថ្មីត្រូវស្វែងរកការព្យាបាលជាបន្ទាន់នៅតាមគ្រឹះស្ថានសុខាភិបាលសាធារណៈ ដែលនៅជិតផ្ទះបំផុត ហើយត្រូវជម្រាបជូនមន្ត្រីសុខាភិបាលអំពីប្រវត្តិជំងឺ និងប្រវត្តិនៃការធ្វើដំណើរផងដែរ ។ លោកបញ្ជាក់ថា ក្រសួងបានដាក់ម៉ាស៊ីនស្កេនកំដៅនៅអាកាសយានដ្ឋានអន្តរជាតិភ្នំពេញ ខេត្តព្រះសីហនុ និងសៀមរាប បាវិត ប៉ោយប៉ែត ព្រែកចាក និងស្រាវជ្រាវរកករណីសង្ស័យដោយក្រមចត្តាឡីស័ក នៅតាមច្រកអាកាសយានដ្ឋានអន្តរជាតិ ព្រមទាំងបានត្រៀមបន្ទប់ដាក់អ្នកជំងឺឲ្យនៅដាច់ដោយឡែកនៅមន្ទីរពេទ្យមិត្ត ភាពខ្មែរ-សូវៀត មន្ទីរពេទ្យខេត្តព្រះសីហនុ និងមន្ទីរពេទ្យខេត្តសៀមរាប ត្រៀមសម្ភារៈបរិក្ខារពេទ្យ និងឱសថចាំបាច់សម្រាប់ការព្យាបាលផងដែរ ។
លោករដ្ឋមន្ត្រីក៏បានឲ្យដឹងថា ក្រសួងមានមន្ទីរពិសោធន៍ជាតិត្រៀមជាស្រេច ដើម្បីរកអត្តសញ្ញាណវីរុសថ្មីនេះ ។ ក្នុងនោះមានក្រុមជំនាញសុខាភិបាលជាង២.០០០នាក់ ដែលបានបណ្តុះបណ្តាលរួចជាស្រេចក្នុងការតាមដាន និងឆ្លើយតបជំងឺកើតឡើងថ្មីៗត្រៀមលក្ខណៈឆ្លើយតប បើកើតមានជាយថាហេតុ ក្រសួងក៏បានផ្សព្វផ្សាយជូនដំណឹងដល់មន្ទីរពេទ្យជាតិ និងមន្ទីរសុខាភិបាលទាំង២៥ រាជធានី-ខេត្តឱ្យត្រៀមលក្ខណជាស្រេចក្នុងការឆ្លើយតប និងផ្តល់អន្តរាគមន៍ជាបន្ទាន់ ប្រសិនបើមានករណីសង្ស័យ និងកំពុងពង្រឹងការងារតាមដានជំងឺផ្លូវដង្ហើមស្រួចស្រាវធ្ងន់ធ្ងរ និងបានពិនិត្យវាយតម្លៃរកលំនាំមិនធម្មតានៃជំងឺនេះជានិច្ច ។
ក្រសួងក៏បានអំពាវនាវដល់ប្រជាពលរដ្ឋឲ្យមានការប្រុងប្រយ័ត្នយ៉ាងដូច្នេះថា ទោះជាបច្ចុប្បន្ននេះកម្ពុជាមិនមានករណីជំងឺផ្ដាសាយបក្សីកើតឡើងទៀតក៏ដោយ និងពុំទាន់រកឃើញករណីជំងឺរលាកសួតបង្កដោយវីរុសកូរ៉ូណាប្រភេទថ្មីនេះក៏ដោយក៏បុគ្គលគ្រប់រូបត្រូវមានការប្រុងប្រយ័ត្នផ្ទាល់ខ្លួនក្នុងការការពារសុខភាពពីការឆ្លងជំងឺខាងលើ នារដូវបុណ្យចូលឆ្នាំចិនខាងមុខនេះដោយ ៖ គួរតែជៀសវាងការចូលទៅកន្លែងចិញ្ចឹមសត្វ (បើគ្មានភារកិច្ច) ឬប៉ះពាល់ផ្ទាល់ជាមួយសត្វនៅតាមកសិដ្ឋាន ចិញ្ចឹមសត្វ និងទីផ្សារបក្សីរស់ ឬចូលកន្លែងសត្តឃាត ឬប៉ះពាល់ជាមួយផ្ទៃណាមួយដែលកខ្វក់ ឬប្រឡាក់ ដោយលាមកសត្វ បសុបក្សី ឬសត្វដទៃទៀត ។
ក្រសួងបន្តថា ប្រសិនបើសង្ស័យថា ឆ្លងជំងឺរលាកសួតដោយវីរុសកូរ៉ូណាប្រភេទថ្មី ដោយមានកម្តៅ ៣៨ អង្សាសេ និងមានរោគសញ្ញាមួយយ៉ាងតិចក្នុងចំណោម ក្អក ហូរសំបោរ ឈឺបំពង់ក ដង្ហើមខ្លី និងពិបាកដកដង្ហើម និងមានប្រវត្តិធ្វើដំណើរមកពីប្រទេសចិនដោយបានប៉ះពាល់ជាមួយអ្នកជំងឺផ្លូវដង្ហើម ប៉ះពាល់ជាមួយសត្វក្នុងអំឡុង១៤ថ្ងៃមុនចេញ រោគសញ្ញា ដោយសារជំងឺផ្លូវដង្ហើមស្រេចស្រាវមិនដឹង អំពីអត្តសញ្ញាណ (ប្រភេទមេរោគ) ច្បាស់លាស់ត្រូវប្រញាប់រាយការណ៍ទៅលេខទូរស័ព្ទទាន់ ហេតុការណ៍១១៥ ៕
ចែករំលែកព័តមាននេះ