ខេត្តកណ្តាល ៖ ដីអាងស្តុបទឹកបឹងតូច បឹងធំរាប់ពាន់ហិកតា នៅក្នុងស្រុកកៀនស្វាយ ខេត្តកណ្តាល កំពុងរងការរំលោភបំពានយកយ៉ាងអនាធិបតេយ្យពីសំណាក់អ្នកមានលុយមានអំណាច។
បើតាមប្រភពព័ត៌មានបានឱ្យដឹងថា ដីអាងស្តុបទឹកបឹងតូច បឹងធំនេះ គឺជាបឹងធម្មជាតិកើតមានឡើងតាំងពីដូនតាមកម្ល៉េះ ដែលមានផ្ទៃបឹងលាតសន្ធឹងក្រោមការគ្រប់គ្រងក្នុងដែនរដ្ឋបាលរបស់ឃុំចំនួន៤ ក្នុងស្រុកកៀនស្វាយ គឺឃុំឈើទាល ឃុំភូមិធំ ឃុំគគីរ និងឃុំដីឥដ្ធ។
ប្រភពបន្តថា បឹងនេះ គឺជាអាងស្តុបទឹកដ៏មានសារសំខាន់ណាស់សម្រាប់បងប្អូនប្រជាជនរស់នៅជុំវិញបឹងនៃឃុំទាំង៤ខាងលើ យកទឹកប្រើប្រាស់ដូចជា មុជ ដាំស្ល ស្រោចស្របផលដំណាំគ្រប់មុខ និងជាពិសេសសម្រាប់ប្រជានេសាទប្រកបមុខរបររកត្រី និងដាំឈូក ដកព្រលឹត ដកក្រអៅឈួក បេះត្រកួន រកខ្យងខ្ចៅលក្ខណៈគ្រួសារផ្គួបផ្សំបន្ថែមគ្រាន់ចិញ្ចឹមជីវិតគ្រប់ខួបប្រាំងវស្សាផងដែរ។
មិនតែប៉ុណ្ណោះក៏ជាដៃប្រព័ន្ធប្រភពសម្រាប់រំដោះទឹកជំនន់ចូលពីទន្លេបាសាក និងទន្លេមេគង្គនារដូវទឹកដំឡើង ហូរធ្លាក់ចេញទៅប្រទេសវៀតណាម ដើម្បីបញ្ជៀសកុំឱ្យមានការជន់លិចប៉ះពាល់ផលដំណាំ និងផ្ទះសម្បែងរបស់បងប្អូនប្រជាជន។ ស្រាប់តែឥឡូវឃើញឈ្មួញអ្នកមានលុយ មានអំណាច មកដណ្តើមគ្នាបោះបង្គោលរំលោភបំពានវាទយកដីអាងស្តុបទឹកបឹងតូច បឹងធំសាធារណៈរបស់រដ្ឋធ្វើជាកម្មសិទ្ធិឯកជនយ៉ាងអនាធិបតេយ្យបែបនេះ ។ ទៅថ្ងៃមុខអាចនឹងបង្កដល់ការរស់នៅរបស់បងប្អូនប្រជាជនជាក់ជាមិនខានឡើយ។
សកម្មភាពនេះ ធ្វើឱ្យមហាជនជាច្រើនដាក់ការសង្ស័យថា ប្រហែលជាឈ្មួញទាំងនោះមានការឃុបឃិតត្រូវរ៉ូវគ្នាជាមួយអាជ្ញាធរ និងមន្ត្រីជំនាញជាប្រព័ន្ធអស់ហើយមើលទៅ បានជាបណ្តែតបណ្តោយមិនមានការផ្សព្វផ្សាយណែនាំទប់ស្កាត់អ្វីសោះ។
ជាក់ស្តែងកាលពីរសៀលថ្ងៃទី២២ ខែមករា ឆ្នាំ២០២០នេះ ភ្នាក់ងារយើងបានចុះទៅថតផ្តិតយករូបភាពប្រទះឃើញគ្រឿង១វង់របស់ឈ្មោះភិរម្យ នៅតែបន្តជីកកាយនៅចំណុចដីមាត់អាងទឹកបឹងធំ ស្ថិតក្នុងភូមិឈើទាល ឃុំឈើទាលដដែល។ ហើយលោក ភិរម្យ ម្ចាស់គ្រឿងចក្រនេះ ក៏ធ្លាប់បានប្រាប់ភ្នាក់ងារចុះទៅយកព័ត៌មានលើកមុនថា រូបលោកគ្រាន់តែជាអ្នកស៊ីឈ្នួលឱ្យគេទេ ព្រោះដីគេមានប្លង់រឹង។
បើតាមប្រភពបញ្ជាក់បន្ថែមថា អ្នកដែលមកបោះបង្គោលយកដីអាងស្តុបទឹកបឹងតូច បឹងធំនេះភាគច្រើនសុទ្ធតែបានអះអាងខ្លួនងារជាឯកឧត្តម ឧកញ៉ា លោកជំទាវ មកពីភ្នំពេញ ប៉ុន្តែមិនប្រាប់ឈ្មោះទេ។
ពាក់ព័ន្ធការរំលោភយកដីបឹងធំ-បឹងតូចសាធារណៈរបស់រដ្ឋនេះ លោក អ៊ូ ឈាង អភិបាលស្រុកកៀនស្វាយ បានប្រាឱ្អោយដឹងតាមទូរស័ព្ទកាលពីរសៀលថ្ងៃទី២២ ខែមករា ឆ្នាំ២០២០ ថា រឿងនេះចំណាត់ការរបស់ខេត្ត និងចុះអង្កេតថា ដីណាជាដីអាងស្តុបទឹករបស់រដ្ឋរក្សាទុក ហើយដីណាដែលអាចកាត់ឱ្យពលរដ្ឋបង្កបង្កើនផលបាន។
ចំណែក លោក កេត សុផល ប្រធានការិយាល័យភូមិបាលស្រុកកៀនស្វាយ ក៏ធ្លាប់បានប្រាប់ឱ្យដឹងថា អាងស្តុបទឹកបឹងធំនេះ គឺជាកន្លែងស្តុបទឹក និងជាប្រព័ន្ធរំដោះទឹកជំនន់សាធារណៈរបស់រដ្ឋពិតប្រាកដមែន ហើយបើតាមលោកដឹងតាម ស ជ ណ របស់ទីស្តីការផ្ទៃដីបឹងធំទំហំ ១៥០០ហិកតា តែឥឡូវគេកាត់ចូលក្រុងអស់ខ្លះនៅសល់ប្រហែល១១០០ជាងហិកតាប៉ុណ្ណោះ ។ រីឯអ្នកបោះបង្គោល បើសិនជានៅក្នុង ស ជ ណ គឺបុគ្គលនោះមិនអាចយកបានទេ។
ដោយឡែកលោក នេត វាសនា ប្រធានការិយាល័យរ៉ែ និងថាមពលស្រុក ក៏បានប្រាប់ឱ្យដឹងតាមទូរស័ព្ទកាលពីរសៀលថ្ងៃទី២២ ខែមករា ២០២០ នេះថា គ្រឿងចក្ររបស់លោកភិរម្យ កាលពីឆ្នាំមុនគាត់មានច្បាប់ តែឆ្នាំ២០២០នេះទើបដាក់ចូលដល់ច្រកទេ មិនទាន់ចេញឡើយ ដោយសំអាងលើដីរបស់គាត់មានលិខិតចេញអាជ្ញាធរភូមិ-ឃុំ។ តែរឿងគ្រឿងចក្រកំពុងធ្វើសកម្មភាពនោះ គឺលោកមិនបានដឹកអាចម៌ដីចេញទៅក្រៅទេ គ្រាន់តែដឹកចាក់នៅក្នុងបរិវេណជុំវិញដីដែលគាត់ធ្វើឱ្យគេចំនួន៤០ហិកតានៅតំបន់នោះ។ តែរឿងប៉ះពាល់ដីអាងទឹក ឫយ៉ាងណានោះ លោកមិនបានដឹងទេ ទាល់តែសួរទៅខាងអាជ្ញាធរ៕ (កែសម្រួលដោយ ៖ បុប្ផា)
ចែករំលែកព័តមាននេះ