រដ្ឋមន្ត្រី ស៊ុយ សែម ៖ កម្ពុជាមិនខ្វះថាមពលអគ្គិសនីទៀតទេ
- ភ្នំពេញ
រាជធានីភ្នំពេញ ៖ រដ្ឋមន្ត្រីក្រសួងរ៉ែនិងថាមពល លោក ស៊ុយ សែម បានអះអាងថា នៅឆ្នាំ២០២០នេះ កម្ពុជាលែងខ្វះអគ្គិសនីប្រើប្រាស់ដូចឆ្នាំមុនទៀតហើយ ។…
រាជធានីភ្នំពេញ ៖ រដ្ឋមន្ត្រីក្រសួងរ៉ែនិងថាមពល លោក ស៊ុយ សែម បានអះអាងថា នៅឆ្នាំ២០២០នេះ កម្ពុជាលែងខ្វះអគ្គិសនីប្រើប្រាស់ដូចឆ្នាំមុនទៀតហើយ ។ លោករដ្ឋមន្ត្រីក្រសួងរ៉ែនិងថាមពល បានអះអាងសាជាថ្មីនេះ បន្ទាប់ពីរដ្ឋសភានិងព្រឹទ្ធសភា បានអនុម័តច្បាប់ចំនួន៦ទាក់ទិននឹងការបង្កើតស្ថានីយអគ្គិសនី និងសម្រេចទិញពីប្រទេសឡាវ ។ សេចក្តីព្រាងច្បាប់ចំនួន៦ ទាក់ទងនឹងការធានាទូទាត់របស់រាជរដ្ឋាភិបាល ឲ្យក្រុមហ៊ុនឯកជនចំនួន៤ សម្រាប់ការសាងសង់ស្ថានីយអគ្គិសនីដើរដោយពន្លឺព្រះអាទិត្យ ដែលមានអានុភាពសរុប១៤០មេហ្គាវ៉ាត់ និងការធានាទិញថាម ពលអគ្គិសនីផលិតដោយធ្យូងថ្មទំហំ២៤០មេហ្គាវ៉ាត់ពីប្រទេសឡាវជាស្ថាពរ ។
លោករដ្ឋមន្ត្រី សុ៊យ សែម បានឲ្យដឹងថា សម្រាប់ឆ្នាំ២០២០នេះតទៅ កម្ពុជាលែងខ្វះខាតអគ្គិសនីប្រើប្រាស់ទៀតហើយ មិនដូចឆ្នាំ២០១៩កន្លងមកនេះ បានជួបប្រទះបញ្ហាខ្វះខាតអគ្គិសនីដោយមានការផ្តាច់ការផ្គត់ផ្គង់នៅតំបន់មួយចំនួន ។ លោករដ្ឋមន្ត្រី ស៊ុយ សែម ត្រូវបានគេហទំព័រមួយស្រង់សម្តីផ្សាយនៅថ្ងៃទី ២១ ខែមករា ឆ្នាំ២០២០ថា ក្រសួងតែងតែធ្វើផែនការមេមួយយ៉ាងហ្មត់ចត់ ដើម្បីឱ្យអ្នកវិនិយោគ ឬរាជរដ្ឋាភិបាលខ្លួនឯងធ្វើការវិនិយោគប្រភពអគ្គិសនីមួយឱ្យបានពិតប្រាកដ និងរៀបចំបណ្តាញខ្សែមួយឱ្យបានត្រឹមត្រូវដើម្បីផ្គត់ផ្គង់អគ្គិសនីនៅទូទាំងប្រទេស ។
លោករដ្ឋមន្ត្រីពន្យល់ថា មូលហេតុដែលមានការខ្វះខាតអគ្គិសនីនៅក្នុងឆ្នាំ២០១៩ ដោយសារកម្ពុជាត្រូវការថាមពលអគ្គិសនីខ្ពស់ ដែលមានបន្ទុកខ្លាំងគឺមានចំនួន១.៨០០មេហ្គាវ៉ាត់នៅក្នុងរដូវប្រាំង ។ មកដល់ពេលបច្ចុប្បន្ននេះ ក្រោយពីបានរៀបចំផែនការមេថ្មី ដោយបានធ្វើការសិក្សាជាមួយនឹងអ្នកជំនាញការលើសេចក្តីត្រូវការលើសហគ្រាសធុនធំ អាជីវកម្មធុនតូចនិងមធ្យមនិងនៅតាមខ្នងផ្ទះរបស់ប្រជាពលរដ្ឋសម្រាប់ឆ្នាំ២០២០នេះ សេចក្តីត្រូវការអគ្គិសនីនៅក្នុងបន្ទុកអតិបរមាមានចំនួន២.២១៤មេហ្គាវ៉ាត់ សម្រាប់ប្រើប្រាស់នៅក្នុងរដូវប្រាំងនេះ ដោយកើនឡើងខ្ពស់ជាងឆ្នាំ២០១៩ ។
លោករដ្ឋមន្ត្រីបន្ថែមថា «បច្ចុប្បន្ននេះ យើង បានដាក់ឱ្យដំណើងការរោងចក្រធ្យូងថ្មមួយនៅខេត្តព្រះសីហនុដែលមានថាមពល១៥០មេហ្គាវ៉ាត់ នាំចូលពីប្រទេសថៃ២៣០មេហ្គាវ៉ាត់ នាំចូលពីប្រទេសឡាវចំនួន៧០មេហ្គាវ៉ាត់ និងមកពីវារីអគ្គិសនីដនសាហុងមានចំនួន១៩៥មេហ្គាវ៉ាត់ ដាក់ឱ្យដំណើរការរោងចក្រថាមពលអគ្គិសនីដើរដោយពន្លឺព្រះអាទិត្យនៅខេត្តកំពង់ស្ពឺមានចំនួន ៨០មេហ្គាវាត់ ពីខេត្តអាតាពើចំនួន១០០មេហ្គាវ៉ាត់ទៀត រោចក្រអគ្គិសនីដើរដោយប្រេងខ្មៅចំនួន៤០០មេហ្គាវ៉ាត់ ដែលកំពុងដំណើរការសាងសង់នៅស្រុកល្វាឯម ខេត្តកណ្តាល» ។ លោករដ្ឋមន្ត្រីថ្លែងទៀតថា «សម្រាប់ឆ្នាំ២០២០នេះ កម្ពុជាត្រូវការអគ្គិសនីបន្ថែមប្រមាណ៤១៤មេហ្គាវ៉ាត់ ខណៈយើងមានជាង៧០០មេហ្គាវ៉ាត់សម្រាប់ផ្គត់ផ្គង់នៅក្នុងប្រទេស ។
ដូច្នេះ អាចនិយាយបានថា សម្រាប់ឆ្នាំ២០២០នេះ មិនអាចខ្វះខាតនោះទេនារដូវប្រាំងនេះ ព្រោះគម្រោងអគ្គិសនីមានលើសសេចក្តីត្រូវការ» ។ បើតាមលោករដ្ឋមន្ត្រី ស៊ុយ សែម បញ្ជាក់ថា មកដល់ពេលនេះការតបណ្តាញអគ្គិសនីសម្រេចបានប្រមាណ៩២ភាគរយសម្រាប់ឱ្យពលរដ្ឋប្រើប្រាស់តាមគម្រោងភូមិនៅទូទាំង ប្រទេស ហើយតាមផែនការគឺនឹងតបណ្តាញឱ្យចប់នៅត្រឹមឆ្នាំ២០២០នេះ ឱ្យពលរដ្ឋបានប្រើប្រាស់គ្រប់ខ្នងផ្ទះ ៕
ចែករំលែកព័តមាននេះ