ខេត្តស្វាយរៀង ៖ សិស្សស្រីអនុវិទ្យាល័យខ្ជាយនិងវិទ្យាល័យហ៊ុន សែនប្រសូត បានដួលសន្លប់ជាបន្ត បន្ទាប់ ហើយត្រូវបានគ្រូពេទ្យប្រាប់ថាមូលហេតុមកពីសិស្សទាំងនេះ មានសម្ពាធឈាមទាបខ្សោយខ្វះអាហារូបត្ថម្ភ និងដោយសារមានការបម្រែបម្រួលអាកាសធាតុ គឺឡើងកម្តៅខ្លាំង ធ្វើឲ្យពួកគេមានសភាពវិលមុខ ណែនទ្រូង ពិបាកដកដង្ហើម ទើបសន្លប់ជាបន្តបន្ទាប់ ។ ទោះបីជាបែបណា សិស្សភាគច្រើនបែរជាមិនមានបញ្ហាផ្នែកសុខភាពនោះទេ។ ការដួលសន្លប់សិស្សក្នុងសាលានេះ គឺបន្ទាប់ពីវិទ្យាល័យក្រូចឆ្មារក្នុងខេត្តត្បូងឃ្មុំសិស្សបានដួលសន្លប់ច្រើនថ្ងៃបន្តបន្ទាប់ រហូតសាលាត្រូវបង្ខំចិត្តបិទទ្វារ២ថ្ងៃ ដើម្បីឱ្យស្ថានភាពនានាវិលមករកប្រក្រតីភាពឡើងវិញ ។
បើតាមលោកវេជ្ជបណ្ឌិត សរ សុខចំរើន ប្រធានមន្ទីរពេទ្យបង្អែកស្រុកស្វាយទាបបានឲ្យដឹងតាមស្ថិតិថា សិស្សអនុវិទ្យាល័យខ្ជាយដួលសន្លប់ចំនួន៧នាក់ (ស្រីទាំង៧នាក់) និងសិស្សវិទ្យាល័យហ៊ុន សែនប្រសូត្រចំនួន៤នាក់ (ស្រី៤នាក់) ។ លោកវេជ្ជបណ្ឌិតបន្តទៀតថា ជនរងគ្រោះមានអាការៈមិនស្រួលខ្លួន វិលមុខ ណែនទ្រូង ពិបាកក្នុងការដកដង្ហើម បណ្តាលឲ្យដួលសន្លប់ជាបន្តបន្ទាប់តែម្តង ។ ក្រោយពីក្រុមគ្រូពេទ្យយករថយន្តទៅដឹកនិងបានបញ្ចូនមកដល់មន្ទីរពេទ្យបង្អែកស្រុកស្វាយទាប ធ្វើការសង្គ្រោះសិស្សទាំងអស់មានសភាពធូរស្រាលបន្តិចហើយ ប៉ុន្តែលោកគ្រូពេទ្យកំពុងតាមដានបន្តទៀតថាតើបណ្តាលមកពីមូលហេតុអ្វីឲ្យពិតប្រាកដ ។
បើតាមការបំភ្លឺពីលោក វ៉ា វុទ្ធី អនុប្រធានការិយាល័យអប់រំ យុវជននិងកីឡាស្រុកស្វាយទាប បានប្រាប់នៅព្រឹកថ្ងៃទី២១ ខែមករា ឆ្នាំ២០២០នេះ គឺមន្ត្រីការិយាល័យអប់រំស្រុកស្វាយទាប រូមនឹងលោកនាយកសាលានិងក្រុមគ្រូពេទ្យកំពុងធ្វើការស្រាវជ្រាវរកមូលហេតុសិស្សដួលសន្លប់នេះហើយ ។ លោកបានបញ្ជាក់ថា ករណីសិស្សដួលសន្លប់នេះកើតឡើងនៅថ្ងៃទី២០ មករា ២០២០ នៅវេលាម៉ោង៣និង៥នាទីរសៀលនៅអនុវិទ្យាល័យខ្ជាយ ស្ថិតនៅភូមិខ្ជាយ ឃុំរមាំងថ្កោល ស្រុកស្វាយទាប ដែលដំបូងគឺមានសិស្សស្រី៤នាក់ដួលសន្លប់ ទី១-ឈ្មោះ មាន ស្រីនិត អាយុ១២ឆ្នាំ ។ ២-ឈ្មោះ ជួន្នី ម៉ុតកញ្ចនា អាយុ១២ឆ្នាំ ។ ៣-ឈ្មោះ ឡង់ សុគុន្ធលក្ខិណា អាយុ១២ឆ្នាំ និងទី៤-ឈ្មោះ ឃ្លាំង ឆេងចំប៉ា អាយុ១១ឆ្នាំ ។
ក្រោយមកក៏មានសិស្ស៣នាក់ទៀតដួលសន្លប់បន្តបន្ទាប់ត្រូវក្រុមគ្រូពេទ្យបញ្ជូនទៅមន្ទីរពេទ្យស្រុកស្វាយទាបដើម្បីសង្គ្រោះ ។ចំណែកសិស្សនៅវិទ្យាល័យហ៊ុនសែនប្រសូត្រម្នាក់មានអាការៈមិនស្រួលខ្លួនវិលមុខសិស្សដ៏ទៃឃើញដូច្នេះក៏មានអារម្មណ៍ភ័យ ក៏វិលមុខតាមគ្នា និងដួលសន្លប់ជាបន្តបន្ទាប់ រហូតដល់៤នាក់ ក្រុមគ្រូពេទ្យបានបញ្ជូនទៅកាន់មន្ទីរពេទ្យស្រុកស្វាយទាប ដើម្បីសង្គ្រោះបន្ទាន់ ។ សិស្សដែលមានអាការៈដួលសន្លប់គឺថប់ដង្ហើម វិលមុខ អស់កម្លាំងក៏ដួលសន្លប់តែម្តង ។
លោក តូច ប៉ូលីវ៉ា អភិបាលរងខេត្តស្វាយរៀង បានឲ្យដឹងថា ករណីសិស្សដួលសន្លប់នៅអនុវិទ្យាល័យខ្ជាយ និងវិទ្យាល័យហ៊ុនសែនប្រសូត្រ បើឆ្លងកាត់តាមការចុះពិនិត្យជាក់ស្តែងជាមួយប្រធានមន្ទីរពេទ្យបង្អែកស្រុកស្វាយទាប និងមន្ត្រីមន្ទីរសុខាភិបាលខេត្តស្វាយរៀងដល់ទីកន្លែងផ្ទាល់ជាមួយការិយាល័យអប់រំស្រុកស្វាយទាប និងលោក លោកស្រីអភិបាលរងស្រុក បានធ្វើការសន្និដ្ឋានជាបឋមថាបញ្ហាដួលសន្លប់នេះបណ្ដាលមកពីអាកាសធាតុហួតហែងក្តៅខ្លាំង កត្តាបរិស្ថានជុំវិញសាលាឬសាលារៀនពុំមានកង្ហារប្រើប្រាស់ សិស្សតមចំណីអាហារសម្រកទម្ងន់ សិស្សមានសុខភាពខ្សោយខ្វះអាហារូបត្ថម្ភ ។
លោក តូច ប៉ូលីវ៉ា បានបញ្ជាក់ថា កាលពីល្ងាចមិញនេះដោយមានការណែនាំដោយផ្ទាល់ពីលោក ម៉ែន វិបុល អភិបាលខេត្តស្វាយរៀង លោកបានចុះទៅផ្ទាល់ដើម្បីសួរសុខទុក្ខសិស្សានុសិស្សចំនួន១១នាក់នេះ ដើម្បីឲ្យក្រុមការងារគ្រូពេទ្យបន្តរកមូលហេតុឲ្យច្បាស់លាស់ ។ នៅថ្ងៃទី២១ មករា ឆ្នាំ២០២០នេះ សិស្សរងគ្រោះទាំង១១នាក់កំពុងសង្គ្រោះបន្តនៅឡើយ ។
កម្មករ កម្មារិនីរោងចក្រកាត់ដេរនៅស្រុកបាទីដួលសន្លប់៤៤នាក់
ខេត្តតាកែវ ៖ គិតត្រឹមម៉ោង១១ព្រឹកថ្ងៃទី២១ មករា មានកម្មករ៤នាក់ និងកម្មការិនី បម្រើការងារនៅរោងចក្រវូណាមី នៅស្រុកបាទី បានដួលសន្លប់ជាបន្តបន្ទាប់ឡើងដល់៤៤នាក់ហើយ តែមិនមានប៉ះពាល់ធ្ងន់ធ្ងរដល់អាយុជីវិតឡើយ ។ ក្រោយពីទទួលបានព័ត៌មានភ្លាមលោកមូល វិចិត្រ អភិបាលរងខេត្តតាកែវក៏បានចុះទៅសាកសួរសុខទុក្ខដល់កម្មករ កម្មការីនី ដែលរងគ្រោះ ។
លោក ភួន ឈីម អភិបាលស្រុកបាទី បានឲ្យដឹងថា នៅព្រឹកថ្ងៃទី២១ មករា ឆ្នាំ២០២០ វេលាម៉ោង៨និង២០នាទី កម្មករ កម្មការិនីនៅរោងចក្រកាត់ដេរសម្លៀកបំពាក់យីហោ វូណាមី ស្ថិតនៅភូមិសំរោង ឃុំសូភី ស្រុកបាទី ខេត្តតាកែវបានដួលសន្លប់ចំនួន៤៤នាក់ហើយ ។ ចំពោះការដួលសន្លប់នេះដែរគឺបណ្តាលមកពីមានការភ័យខ្លាចតៗគ្នារហូតមានអ្នកសន្លប់បែបនេះ តែក៏គ្មានផលប៉ះពាល់អ្វីផ្សេងឡើយ ។ ក្រោយពីកើតហេតុភ្លាម ក្នុងនាមគណៈបញ្ជាការឯកភាពស្រុកបានដឹកនាំសមត្ថកិច្ចយករថយន្តដឹកកម្មករ កម្មការីនីដែលដួលសន្លប់ទៅកាន់មន្ទីពេទ្យបង្អែកស្រុកភ្លាមៗផងដែរ ។ រហូតមកដល់រសៀលនេះមានកម្មករ កម្មការីនីមួយចំនួនបានធូរស្បើយនិងបានវិលត្រឡប់ទៅផ្ទះវិញខ្លះហើយ ។
លោក មូល វិចិត្រ អភិបាលរងខេត្តតាកែវបានឱ្យដឹងថា ក្នុងនាមអាជ្ញាធរខេត្តលោកបានចុះមកសួរ សុខទុក្ខដល់បងប្អូនកម្មករ កម្មការីនី ដែលបានដួលសន្លប់នៅក្នុងរោងចក្រវូណាមីនៅស្រុកបាទីនេះដើម្បីលើកទឹកចិត្ត បើទោះបីជាមិនមានអ្វីសម្រាប់ជូនដល់ពួកគាត់ក៏ដោយ ហើយសង្ឃឹមថាបងប្អូនយើងនឹងបានជាសះស្បើយក្នុងរយៈពេលដ៌ខ្លីខាងមុខនេះ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ