រាជធានីភ្នំពេញ ៖ ហេតុការណ៍មួយបានបង្កឱ្យមានការភ្ញាក់ផ្អើលជាខ្លាំង ខណៈដែលបងប្អូនប្រជាពលរដ្ឋ និងអ្នកដំណើរនាំគ្នាផ្អើលឆោឡោថា មានគេយកសាកសពមកប្លុងចោល នៅចំណុចផ្លូវបេតុងមួយកន្លែង ស្ថិតក្បែរអង្គការស្គុត ក្នុងភូមិព្រែកទាល់ សង្កាត់ស្ទឹងមានជ័យ២…
រាជធានីភ្នំពេញ ៖ ហេតុការណ៍មួយបានបង្កឱ្យមានការភ្ញាក់ផ្អើលជាខ្លាំង ខណៈដែលបងប្អូនប្រជាពលរដ្ឋ និងអ្នកដំណើរនាំគ្នាផ្អើលឆោឡោថា មានគេយកសាកសពមកប្លុងចោល នៅចំណុចផ្លូវបេតុងមួយកន្លែង ស្ថិតក្បែរអង្គការស្គុត ក្នុងភូមិព្រែកទាល់ សង្កាត់ស្ទឹងមានជ័យ២ ខណ្ឌមានជ័យ កាលពីវេលាម៉ោង៤ និង៣០នាទីល្ងាចថ្ងៃទី២១ ខែមករា ឆ្នាំ២០២០ ។
យោងតាមប្រភពព័ត៌មាននៅកន្លែងកើតហេតុអោយដឹងថា នៅវេលាកើតហេតុខាងលើ គេសង្គេតឃើញ មានម៉ូតូរ៉ឺម៉កកង់៣មួយគ្រឿង បានដឹកប្តីប្រពន្ធ២នាក់ ធ្វើដំណើរមកដល់ចំណុចខាងលើ ស្រាប់តែភាគីខាងម្ចាស់រ៉ឺម៉កក៏បានអោយពួកគេទាំង២នាក់នោះចុះពីរ៉ឺម៉ក ហើយភ្លាមនោះ បុរសជាប្តីបានដួលទៅហ្នឹងថ្នល់បាត់បង់ជីវិតភ្លាមៗ ដោយពុំដឹងមូលហេតុ ។ ជាហេតុធ្វើអោយមានការភ្ញាក់ផ្អើលជាខ្លាំងដល់ពលរដ្ឋដែលរស់នៅក្បែរនោះ និងអ្នកដំណើរឆ្លងកាត់ទីនោះ នាំគ្នាផ្អើលចំណុចកើតហេតុខាងលើ ។
បន្ទាប់ពីកើតមានការភ្ញាក់ផ្អើលហើយនោះ កម្លាំងអាជ្ញាធរមូលដ្ឋាន រួមជាមួយនគរបាល បានចុះអន្តរាគមន៍ភ្លាមៗ ដើម្បីពិនិត្យវិច្ច័យ និងសាកសួរនាំដំណើររឿងអោយពិតប្រាកដថា ជាករណីអ្វី ។ ក្រោយការសាកសួរនាំយ៉ាងល្អិតល្អន់រួចមក សមត្ថកិច្ចបញ្ជាក់ថា ករណីខាងលើនេះ គឺជាករណីខ្យល់.គប៉ុណ្ណោះ ពុំមែនជាករណីឃាតកម្មយកសាកសពមនុស្សមកទម្លាក់ចោលដូចការភ្ញាក់ផ្អើលរបស់បងប្អូនពលរដ្ឋឡើយ ។ បុរសជាប្តីនេះឈ្មោះ ទិត អាត អាយុ៤១ឆ្នាំ និងស្ត្រីជាប្រពន្ធមានឈ្មោះ ជឿម ដា អាយុ៤១ឆ្នាំដូចគ្នា ។
នាយប៉ុស្តិ៍នគរបាលស្ទឹងមានជ័យទី២ លោកណេង សាមឿន បញ្ជាក់អោយដឹងថា តាមចម្លើយឆ្លើយសារភាពរបស់ស្ត្រីជាប្រពន្ធ ចំពោះមុខសមត្ថកិច្ចអោយដឹងថា នាង និងបុរសជាប្តី បានហៅម៉ូតូរ៉ឺម៉កខាងលើ ស្ថិតក្នុងសង្កាត់ស្ទឹងមានជ័យ១ ជិះធ្វើដំណើរមកភូមិព្រែកទាល់ ដោយបុរសជាប្តីប្រាប់ថា មានបងប្អូននៅទីនោះ ប៉ុន្តែពេលជិះមកដល់ចំណុចកើតហេតុ ស្រាប់តែបុរសជាប្តី មានអាការៈមិនសូវស្រួលខ្លាំង ហើយចេះតែដង្ហក់ថប់ដង្ហើម ។ ពេលនោះ ម្ចាស់រ៉ឺម៉កម៉ូតូកង់៣ បានទម្លាក់អ្នកទាំង២ចុះពីរ៉ឺម៉ក ដោយពុំមានគិតប្រាក់មួយសេនឡើយ ហើយម្ចាស់រ៉ឺម៉កបានជិះចេញទៅបាត់ ។ ក្រោយម៉ូតូរ៉ឺម៉កកង់៣ចាកចេញទៅមិនបានប៉ុន្មាននាទីផងនោះ បុរសជាជនរងគ្រោះ បានដេកស្លាប់នៅលើដងផ្លូវសាធារណៈតែម្តងទៅ ។
ចែករំលែកព័តមាននេះ