ហានូយ៖ មន្ត្រីនៃមន្ទីរឧស្សាហកម្មនិងពាណិជ្ជកម្មរាជធានីហានូយនៃប្រទេសវៀតណាមបាននិយាយថាទីក្រុងធំមួយនេះនឹងមិនត្រូវប្រឈមបញ្ហាកង្វះសាច់ជ្រូកក្នុងអំឡុងពេលឈប់សម្រាកបុណ្យចូលឆ្នាំថ្មីចិន-វៀតណាមដ៏ខ្លីខាងមុខនេះទេ បើទោះបីជាប្រទេសមួយនេះពើបប្រទះបញ្ហានៃការផ្ទុះនិងរីករាលដាលនៃជំងឺបេស្តជ្រូកអាហ្វ្រិកក្តី ។
យោងតាមការចុះផ្សាយរបស់ Vietnamnews កាលពីថ្ងៃទី ១៩ ខែមករា ឆ្នាំ២០២០ ម្សិលមិញនេះបានឲ្យដឹងថា ការខ្វះខាតនូវសាច់ជ្រូកនៅទូទាំងប្រទេសវៀតណាមបានកើតឡើងអស់រយៈពេលប្រហែលជា ១០ ខែមកហើយ ដោយសារតែផលប៉ះពាល់នៃជំងឺជំងឺបេស្តជ្រូកអាហ្វ្រិក ដែលបានធ្វើឲ្យវៀតណាមជួបវិបត្តិសាច់ជ្រូកធ្ងន់ធ្ងរ ។
អ្នកនាង Trần Thị Phương Lan អនុប្រធាននាយកដ្ឋានឧស្សាហកម្មនិងពាណិជ្ជកម្មរាជធានីហានូយបាននិយាយថាតម្រូវការសាច់ជ្រូករបស់អ្នករស់នៅទីក្រុងហានូយនឹងត្រូវបានបំពេញបាន ពីព្រោះអ្នកផ្គត់ផ្គង់មកពីខេត្តនិងក្រុងជិតខាងរបស់ហានូយ បានប្តេជ្ញាផ្តល់ទីក្រុងមួយនេះនូវបរិមាណសាច់ជ្រូកប្រមាណ ៤៣.០០០ តោនក្នុងឱកាសវិស្សមកាលនៅចុងខែមករានេះ។ តំរូវការសាច់ជ្រូករបស់ទីក្រុងហានូយត្រូវបានគេព្យាករណ៍ថាមានប្រហែល ២២.៣០០ តោនក្នុងឱកាសបុណ្យចូលឆ្នាំចិន-វៀតណាមនេះ ។
តម្លៃសាច់ជ្រូកនៅតាមផ្សារមួយចំនួននៅវៀតណាម មានតម្លៃចាប់ពី ១៣០,០០០- ដុង ទៅដល់ ១៨០,០០០ ដុង (ប្រមាណជាង ៥.៦ ទៅ ៧.៧៤ ដុល្លារអាមេរិក ) ដែលគិតទៅវាមានតម្លៃខ្ពស់ជាងមុន ប្រហែលពី ៥០.០០០ ដុងក្នុងមួយគីឡូក្រាម បើប្រៀបធៀបនឹងតម្លៃកាលពីពេលនារដូវកាលបុណ្យទានដែលមានតម្រូវការសាច់ជ្រូកខ្ពស់នោះ ។
ខណៈតម្លៃសាច់ជ្រូកនៅតាមទីផ្សារធម្មតាឡើងខ្ពស់ នៅតាមផ្សារទំនើបជាច្រើនតម្លៃសាច់ជ្រូកបែរជាចុះថោកទៅវិញ ។ ជាក់ស្តែងផ្សារទំនើប Co.op នៅហានូយ តម្លៃសាច់ជ្រូករបស់ក្រុមហ៊ុនស៊ីភី (CP) បាន ថយចុះគឺចាប់ពី ៥,០០០ ដុង ទៅដល់ ១០,០០០ ក្នុងមួយគីឡូបើធៀបនឹងមួយសប្តាហ៍មុន។ បើទោះបីជាសាច់ជ្រូកនៅតាមផ្សារទំនើបធ្លាក់ថ្លៃក៏ពិតមែន តែពុំមានអតិថិជនច្រើនបានជាវនោះទេ នេះបើយោងតាមអ្នកលក់សាច់ជ្រូក ។
អ្នកស្រី ង្វៀន ធូណា (Nguyễn Thị Na) កម្មករនៅសួនឧទ្យានឧស្សាហកម្មកូឌឿន (Cầu Diễn) បាននិយាយថាតម្លៃសាច់ជ្រូកនៅហាងនេះគឺមានតម្លៃចាប់ពី ១៣០.០០០ ដុង (ប្រមាណជាង ៥ ដុល្លារអាមេរិក) ដល់ ១៥០,០០០ ដុង (ជាង ៧ ដុល្លារអាមេរិក) ក្នុងមួយគីឡូក្រាម ដូច្នេះនាងពុំមានលទ្ធភាពទិញរាល់ថ្ងៃនោះទេ អញ្ចឹងមានតែកាត់បន្ថយមកទិញសាច់ជ្រូកត្រឹម ម្តងឬពីរដងក្នុងមួយសប្តាហ៍។
ចំពោះការនាំចូលសាច់ជ្រូកអ្នកស្រី Trần Thị Phương Lan បានមានប្រសាសន៍ថារដ្ឋាភិបាលបានដឹកនាំអាជីវកម្មទូទាំងប្រទេសរួមទាំងអ្នកមកពីហានូយ ផងដែរក្នុងការនាំចូលសាច់ជ្រូកប្រមាណ ១០០,០០០ តោននៅក្នុងត្រីមាសទី ១ នៃឆ្នាំនេះ។
អ្នកស្រីបានអះអាងថាទីក្រុងហានូយមានឆន្ទៈធ្វើការជាមួយអ្នកនាំចូលប្រសិនបើវាខ្វះការផ្គត់ផ្គង់ក្នុងស្រុកមិនឆ្លើយតបនឹងតម្រូវការសាច់ជ្រូកនោះ ។ របាយការណ៍របស់ការិយាល័យគយហានូយបានបង្ហាញថាទីក្រុងបាននាំចូលសាច់ជ្រូកជិត ១០ ម៉ឺនគីឡូក្រាមកាលពីខែធ្នូឆ្នាំមុន។អ្នកស្រីបានបន្តថា «យើងមិនទាន់បានពិចារណាពីលទ្ធភាពនៃការនាំចូលសាច់ជ្រូកទេពីព្រោះការផ្គត់ផ្គង់ក្នុងស្រុកនឹងឆ្លើយតបទៅនឹងតម្រូវការរបស់ទីក្រុងក្នុងឱកាសវិស្សមកាលនេះ» ៕ កែសម្រួលដោយ ៖ សុឃាក់
ចែករំលែកព័តមាននេះ