ចូលឆ្នាំចិនគឺជាបុណ្យប្រពៃណីទំនៀមទម្លាប់ដ៏សំខាន់បំផុតរបស់ជនជាតិចិន ។ បុណ្យនេះមិនមែនប្រារព្ធតែនៅក្នុងប្រទេសកម្ពុជាទេ នៅប្រទេសសិង្ហបុរី ឥណ្ឌូណេស៊ី ម៉ាឡេស៊ី ហ្វ៊ីលីពីន ថៃ និងប្រទេសដទៃទៀត ដែលមានប្រជាជនចិនរស់នៅភាគច្រើនក៏នាំគ្នាប្រារព្ធពិធីបុណ្យចូលឆ្នាំនេះដែរ ។
នៅក្នុងថ្ងៃបុណ្យចូលឆ្នាំចិន បងប្អូនជាប់សែស្រឡាយចិនតែងមានជំនឿទៅលើហេតុផ្សេងៗរួមមាន ការបិទយ័ន្តនៅក្នុងផ្ទះ ដុតផាវ លោតម៉ុងសាយ សែនព្រេន ដុតក្រដាស ដុតធូបនៅតាមព្រះវិហារ ទិញដើមអំពៅខ្មៅ ស្លឹកមៀន និងដាក់តាំងផ្កាអង្គាសីលក្នុងផ្ទះជាដើម ដើម្បីសុំលាភសុំជ័យ ឱ្យមានសំណាងល្អ ហេងហេង និងសុខចម្រើនរកទទួលទានមានបាន ។
យោងតាមអរិយធម៌របស់ចិន ប្រជាជនចិនមានជំនឿលើការគោរពបុណ្យចូលឆ្នាំថ្មីយ៉ាងជ្រាលជ្រៅ គេមានជំនឿលើត្រណមជាច្រើននៅក្នុងអំឡុងបុណ្យចូលឆ្នាំបីថ្ងៃ ជាពិសេសនៅថ្ងៃទី១ បើទោះជាពើបប្រទះនូវហេតុការណ៍អ្វីក៏ត្រូវយកការអត់ធន់ជាចម្បងដើម្បីកុំឱ្យប៉ះពាល់ដល់ទេវតាសិរី ។
និយាយរួមក្នុងរយ:ពេល៣ថ្ងៃនេះគេចាត់ទុកជាថ្ងៃពិសេសបំផុតដែលមិនត្រូវធ្វើអ្វីឱ្យល្អក់កករនាំឱ្យប៉ះពាល់ដល់សិរីមង្គល ឬដល់ទេវតាសិរីឆ្នាំថ្មីឡើយ ។ គេត្រូវធ្វើអ្វីដែលនាំមកនូវសិរីសួស្តីជ័យមង្គលចូលខ្លួន និងក្រុមគ្រួសារដើម្បីនាំលាភនាំហេងពេញមួយឆ្នាំ ។
លោកគ្រូចិនសែដ៏ល្បីមួយរូបគឺលោកគ្រូ ហេង ឆាយ បានឱ្យដឹងថា នៅឯស្រុកចិនគេមានកម្មវិធីច្រើនណាស់ ជាពិសេសប្រជានជនចិនទាំងឡាយដែលរស់នៅក្រៅប្រទេស បានធ្វើដំណើរត្រលប់មកភូមិកំណើតវិញហើយដើម្បីគោរពប្រណិប័តន៍បុណ្យប្រពៃណីទំនៀមទម្លាប់នេះយ៉ាងខ្ជាប់ខ្ជួន ។
សម្រាប់អ្នកកាត់ចិននៅស្រុកខ្មែរក៏សស្រាក់សស្រាំរៀបចំចាត់ចែងពិធីបុណ្យនេះនៅតាមលំនៅឋានរៀងៗខ្លួនផងដែរ ហើយអ្វីដែលត្រូវប្រកាន់ធ្វើមុនថ្ងៃចូលឆ្នាំចិននោះគឺ ត្រូវបោសសម្អាតផ្ទះសម្បែងឲ្យបានស្អាត រៀបចំផ្ទះ បោសពីងពាងជាដើម ។
លោកគ្រូបានបញ្ជាក់ផងដែរថា នៅពេលដល់ថ្ងៃសែនតាមទម្លាប់ប្រពៃណីចិនភាគច្រើនមានសែនសំណែនដូចជា នំពងទា ឬនំអ៊ី សូកូឡា ផ្លែឈើត្រូវមានយ៉ាងហោចណាស់៥មុខ និងកុំភ្លេចទឹកក្រូចកំប៉ុងឱ្យសោះ ហើ យពិសេសជាងនេះទៅទៀតកុំភ្លេចសែន មីសរសៃវែង ពីព្រោះគេមានជំនឿថា មីនេះនឹងជួយឲ្យម៉ែឪ ដូនតា មានអាយុវែងយឺនយូរ ឯតង្វាយជាសាច់សត្វត្រូវមានសាច់មាន់ សាច់ទា និងសាច់ជ្រូកជាដាច់ខាត ។
យើងខ្ញុំសូមប្រសិទ្ធពរជ័យដល់បងប្អូនខ្មែរកាត់ចិនទាំងអស់ទទួលបានសេចក្តីសុខ និងជ័យជម្នះគ្រប់កិច្ចការនៅក្នុងឆ្នាំថ្មីនេះ ជាពិសេសធ្វើដំណើរទៅទីឆ្ងាយជិត សូមជួបតែសុខសុវត្ថិភាពនៅតាមដងផ្លូវទាំងទៅនិងត្រឡប់មកវិញកុំបីខាន ។ សាន សារិន
ចែករំលែកព័តមាននេះ