ការងារទាំងអស់ តែងតែមានចំណុចល្អ និងចំណុចអាក្រក់ ប៉ុន្តែតើមានអ្វីកើតឡើងប្រសិនបើការងាររបស់អ្នកមានតែចំណុចមិនល្អ? បរិស្ថានការការងារមិនល្អមិនត្រឹមតែបង្កផលប៉ះពាល់ដល់កិច្ចការដែលអ្នកបំពេញទេ តែថាថែមទាំងបង្កផលប៉ះពាល់ដល់ជីវិតផ្ទាល់ខ្លួនរបស់អ្នកថែមទៀត ។ ដូច្នេះ ដើម្បីដឹងថាការងាររបស់អ្នកកំពុងបំផ្លាញជីវិតអ្នក ឬទេនោះ អ្នកអាចតាមមើលមុខសញ្ញាខាងក្រោមនេះបាន ៖
១-អ្នកតែងតែរអ៊ូរទាំពីការងារអ្នក៖
តើអ្នកមានន័យពីការងារអ្នកប្រាប់ដល់បងប្អូន ឬមិត្តភក្តិជិតស្និទ្ធិទេ? តើអ្វីដែលពួកគេឮភាគច្រើនវិជ្ជមាន ឬអវិជ្ជមាន? ប្រសិនបើអ្នកមិនហ៊ានទទួលស្គាល់ការពិត មនុស្សដែលជិតស្និទ្ធិនិងនៅជុំវិញអ្នកប្រៀបបានជាមនុស្សដែលល្អបំផុតក្នុងការដឹងថា អ្នកកំពុងតែស្រលាញ់ការងារខ្លួនឬទេ ។
២-អ្នកមិនចូលចិត្តចូលរួមកម្មវិធីជាមួយមិត្តរួមការងារ៖
ប្រសិនបើការងារអ្នកកំពុងតែជះឥទ្ធិពលអាក្រក់លើជីវិតរបស់អ្នក អ្នកក៏កាន់តែមិនមានកម្លាំងក្នុងការទំនាក់ទំនងជាមួយនឹងមិត្តរួមការងារអ្នកដែរ ។ ដោយហេតុដូចនេះ អ្នកអាចនឹងចាប់ផ្តើមបដិសេធនឹងកម្មវិធីផ្សេងៗដូចជាទទួលទានអាហារថ្ងៃត្រង់រួមគ្នា ឬការជួបជុំពេលយប់ជាដើម ។
៣-អ្នកឈប់ខ្វល់នឹងការងាររបស់អ្នក៖
ពេលដែលមនុស្សលែងខ្វល់ខ្វាយពីការងាររបស់ខ្លួនហើយ វាប្រៀបបានជាសញ្ញាដែលបង្ហាញថា ការងារនោះកំពុងតែជញ្ជក់ជីវិតពីអ្នកធ្វើដែរ ។ សកម្មភាពដែលបង្ហាញថា មនុស្សម្នាក់មិនខ្វល់ខ្វាយនឹងការងាររួមមាន ការខ្ជិលច្រអូសក្នុងការបំពេញការងារ ការមិនចូលរួមចំណែកសកម្ម ឬលទ្ធផលការងារមិនល្អជា
ដើម ។
៤-អ្នកខឹងគ្រប់ពេល៖
អ្នកនឹងតែងតែបញ្ចេញកំហឹងដាក់មិត្តរួមការងារអ្នក នៅពេលដែលការងាររបស់អ្នកកំពុងតែបំផ្លាញជីវិតរបស់អ្នកព្រោះវាធ្វើឲ្យអ្នកបាត់បង់ភាពអត់ធ្មត់ ។ វាមិនចាំបាច់ជាកិច្ចការឬបញ្ហាធំទេ ព្រោះគ្រាន់តែរឿងតូចតាចក៏អាចធ្វើឲ្យអ្នកច្រឡោតបានដែរ ។
៥-ថ្ងៃអាទិត្យលែងជាថ្ងៃសប្បាយទៀតហើយ៖
ពេលដែលអ្នកមិនពេញចិត្តនឹងការងារអ្នក អ្នកនឹងតែងតែមានអារម្មណ៍មិនល្អនៅថ្ងៃអាទិត្យថ្ងៃច័ន្ទកាន់តែខិតជិតមកដល់ ។ ប្រសិនបើអ្នកមានអារម្មណ៍ព្រួយបារម្ភច្រើន ស្ត្រេស ឬមិនសប្បាយចិត្តពេលដែលគិតថាត្រូវចូលធ្វើការវិញនៅថ្ងៃស្អេកនោះ វាអាចជាមុខសញ្ញាមួយបង្ហាញថាអ្នកគួរតែផ្លាស់ប្តូរបរិយាកាសការងារហើយ ៕
ចែករំលែកព័តមាននេះ