រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការសុវត្ថិភាពចរាចរណ៍ផ្លូវគោកបានអះអាងការផាកពិន័យពីការមិនគោរពច្បាប់ចរាចរណ៍នៅកម្ពុជាមានភាពធូរស្រាលជាងបណ្តាផ្សេងៗនៅសកលលោក ដែលខ្លះកិនកម្ទេសហើយផ្ញើមកម្ចាស់វិញ ។
សម្តេចថ្លែងក្នុងពីធីបូកសរុបលទ្ធផលការងារសុវត្ថិភាពចរាចរណ៍ផ្លូវគោក នាព្រឹកថ្ងៃទី២១ខែមករានេះយ៉ាងដូច្នេះថា ៖«បើពិតបណ្តាប្រទេសផ្សេងៗគេផាកពិន័យធ្ងន់ណាស់ ! មិនចាំបាច់ និយាយប្រទេសណាទេ គឺប្រទេសវៀតណាមបានផាកធ្ងន់ណាស់ រហូតដល់២ពាន់ ឬ៣ពាន់ដុល្លាឯណ្ណោះ ។ បើប្រទេសខ្លះទៀតខ្ញុំមិនបញ្ចេញឈ្មោះទេ គឺផាកលើកទី១ បើមិនគោរពគេព្រមាន ឬមានវិធានការអ្វីមួយ លើកទី២ បើអ្នកនឹងព្រមានទៀតរហូតដល់លើកទី៣ យករបស់ទៅតែម្តងរហូត១ខែបានគេផ្ញើមកវិញ ប៉ុន្តែគេផ្ញើមកកាដូរដោយកិនឲ្យខ្ទេចទើបផ្ញើមកម្ចាស់វិញ នេះប្រទេសរីកចម្រើនបំផុតនៅលើកសកល បានធ្វើបែបនេះ» ។
សម្តេចបន្តថា ការផាកពិន័យនៅកម្ពុជាមានភាពធូរលង់នៅឡើយ ដោយសារមានភាពយោគយល់ច្រើន ។ ជាក់ស្តែងនៅពេលកន្លងមកនេះមានការអនុវត្តដោយផាកអ្នកមិនពាក់មួកសុវត្ថិភាព ដោយចាប់ម៉ូតូទុកនៅកន្លែងដោយមិនទុកនៅកន្លែងវាល ឬកន្លែងណាមួយដែលធ្វើឲ្យបាត់បង់នោះទេ រហូតឲ្យម្ចាស់ ទៅទិញមួកពាក់ទើបអនុញ្ញាតឲ្យយកម៉ូតូទៅ ។
សម្តេច ស ខេង បានបន្តថា កុំធ្វើការចាប់ម៉ូតូទុកម្តុំ ហើយរបស់ក្លាយជារបស់អេតចាយ ឬពុកផុយ ហើយតុលាការមិនទាន់ចាត់វិធានការដែលធ្វើឲ្យរបស់គេខូចខាត គឺត្រូវទទួលខុសត្រូវចំពោះមុខច្បាប់ ៕ កែសម្រួលដោយ ៖ សុឃាក់
ចែករំលែកព័តមាននេះ