ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា គ្រាន់តែជិតដល់រដូវចូលឆ្នាំចិន-វៀតណាមមកដល់ តម្លៃសាច់ជ្រូកហក់ឡើងតម្លៃខ្ពស់តែម្តង គឺសាច់សុទ្ធ១គីឡូតម្លៃ២៤,០០០រៀល សាច់បីជាន់១គីឡូ២ម៉ឺនរៀល ឆ្អឹង១គីឡូ១៥,០០០រៀល។
ចំណែកសាច់មាន់ក៏ឡើងថ្លៃដែរ គឺមាន់ស្រែរស់១គីឡូតម្លៃ២៤,០០០រៀលទៅ២៥,០០០រៀល សាច់មាន់ស្រែធ្វើស្អាតហើយ១គីឡូតម្លៃ៣ម៉ឺនរៀល។ រីឯទានៅរស់១គីឡូតម្លៃ១៤,០០០រៀល ចំណែកសាច់ទា១គីឡូក្រាម១៨,០០០រៀល។ សាច់គោវិញ សាច់ភ្លៅ១គីឡូតម្លៃ៤ម៉ឺនរៀល។
បើតាមសម្តីស្ត្រីលក់សាច់ជ្រូកនៅផ្សារក្រមួនភូមិរោងបន្លែ សង្កាត់ស្វាយរៀង ក្រុងស្វាយរៀង បានប្រាប់ឲ្យដឹងថា សាច់ជ្រូក គឺឡើងថ្លៃចាប់តាំងពីថ្ងៃសែនដកជើងធូបមកម្ល៉េះ ហើយមួយថ្ងៃ ក្នុង១តូបគាត់លក់សាច់ជ្រូកបាន៨០គីឡូទៅ២០០គីឡូ ហើយសាច់ជ្រូកនៅបន្តឡើងរាល់ថ្ងៃផងដែរ។ រីឯបន្លែ ផ្លែឈើ និងគ្រឿងសម្រាប់សែនថ្ងៃចូលឆ្នាំ គឺឡើងថ្លៃទាំងអស់នៅតាមផ្សារតូចធំ ក្នុងក្រុងស្វាយរៀង ក៏ដូចជាក្នុងផ្សារនានាទូទាំងខេត្តស្វាយរៀងដែរ។ តម្លៃសាច់ជ្រូក សាច់មាន់ សាច់ទាឡើងថ្លៃនេះ គឺគិតចាប់ពីថ្ងៃទី២១ ខែមករា២០២០ នេះតទៅ។
ហើយបើតាមការសង្កេតឃើញថា អ្នកដែលទិញគ្រឿងសម្រាប់សែននៅពេលចូលឆ្នាំនេះ គឺពុំមែនមានតែអ្នកជាប់សែស្រឡាយចិន ឬវៀតណាមនោះទេ ហើយគ្រួសារខ្លះ គឺសួរទៅកូនខ្មែរសុទ្ធ ក៏ប៉ុន្តែគេមានមុខរបរលក់ដូរនៅលើផ្សារ និងអ្នកជំនួញគេត្រូវសែនដែរ ដើម្បីមុខរបរដែលពួកគេជឿថា សែនកុងម៉ារកស៊ីកាក់កបមានបាន ទើបគេសែនទៅ ម្យ៉ាងកុំឲ្យដូនតាមើលមាត់ដូនតាចិន៕ (កែសម្រួលដោយ ៖ បុប្ផា)
ចែករំលែកព័តមាននេះ