រាជធានីភ្នំពេញ ៖ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ បានថ្លែងថា រដ្ឋមន្ត្រីក្រសួងការបរទេសអាស៊ាន បានពិភាក្សាលើសំណើរបស់សហរដ្ឋអាមេរិក ដើម្បីរៀបចំកិច្ចប្រជុំកំពូលពិសេសអាស៊ាន-សហរដ្ឋអាមេរិក…
រាជធានីភ្នំពេញ ៖ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ បានថ្លែងថា រដ្ឋមន្ត្រីក្រសួងការបរទេសអាស៊ាន បានពិភាក្សាលើសំណើរបស់សហរដ្ឋអាមេរិក ដើម្បីរៀបចំកិច្ចប្រជុំកំពូលពិសេសអាស៊ាន-សហរដ្ឋអាមេរិក នៅថ្ងៃទី១៤ ខែមីនា ឆ្នាំ២០២០ នៅឡាសវេហ្គាស សហរដ្ឋអាមេរិក ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិចុះថ្ងៃទី១៨ ខែមករា បន្ទាប់ពីលោកឧបនាយករដ្ឋមន្ត្រី ប្រាក់ សុខុន បានដឹកនាំគណៈប្រតិភូកម្ពុជាទៅចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាន នៅថ្ងៃទី១៦ និង១៧ ខែមករា ឆ្នាំ២០២០ នៅទីក្រុងញ៉ាចាង ប្រទេសវៀតណាម។
លោកឧបនាយករដ្ឋមន្ត្រី បានសង្កត់ធ្ងន់ថាការផ្សារភ្ជាប់ទំនាក់ទំនងរវាងអាស៊ានជាមួយប្រទេសដៃគូសន្ទនាអាស៊ាន គឺជាមូលដ្ឋានគ្រឹះនៃការកសាងសហគមន៍អាស៊ាន និងមជ្ឈត្តភាពរបស់អាស៊ាន ។ លោកឧបនាយករដ្ឋមន្ត្រី ប្រាក់ សុខុន បានជម្រាបជូនកិច្ចប្រជុំស្តីពីការត្រៀមរៀបចំកិច្ចប្រជុំកំពូលថ្នាក់ដឹកនាំអាស៊ាន-នូវែលហ្សេឡង់ នៅថ្ងៃទី៩ ខែមេសា ឆ្នាំ២០២០ បន្ទាប់ពីកិច្ចប្រជុំកំពូលអាស៊ានលើកទី៣៦ នៅដាណាង ប្រទេសវៀតណាម ។ លោកឧបនាយករដ្ឋមន្ត្រីបន្តថា ក្នុងកិច្ចប្រជុំចង្អៀតនេះដែរ រដ្ឋមន្ត្រីការបរទេសអាស៊ាន ក៏បានពិភាក្សាលើសំណើរបស់សហរដ្ឋអាមេរិក ដើម្បីរៀបចំកិច្ចប្រជុំកំពូលពិសេសអាស៊ាន-សហរដ្ឋអាមេរិក នៅថ្ងៃទី១៤ ខែមីនា ឆ្នាំ២០២០ នៅឡាសវេហ្គាស សហរដ្ឋអាមេរិក ។
រដ្ឋមន្ត្រីការបរទេសអាស៊ានបានគាំទ្រប្រធានបទ«ភាពស្អិតរមួត និងការឆ្លើយតប»របស់វៀតណាម ដែលជាប្រធានអាស៊ានឆ្នាំនេះ និងអាទិភាពចម្បងចំនួន៥ ដើម្បីជំរុញការកសាងសហគមន៍អាស៊ាន ។ រដ្ឋមន្ត្រីការបរទេសអាស៊ាន បានកត់សម្គាល់នូវឯកសារសមិទ្ធផលសំខាន់ៗ ដែលបានដាក់ចេញដោយវៀតណាម ក្នុងនាមជាប្រធានអាស៊ាន ដែលស្របនឹងកិច្ចខិតខំប្រឹងប្រែងរបស់ប្រធានអាស៊ានមុនៗ ដើម្បីសម្រេចគោលដៅនៃការកសាងសហគមន៍អាស៊ាន ។
លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ បានដឹកនាំគណៈប្រតិភូកម្ពុជា ទៅចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាន នៅថ្ងៃទី១៦ និង១៧ ខែមករា ឆ្នាំ២០២០ នៅទីក្រុងញ៉ាចាង ប្រទេសវៀតណាម ។ ក្នុងកិច្ចប្រជុំចង្អៀតនេះ រដ្ឋមន្ត្រីការបរទេសអាស៊ាន បានពិភាក្សាបញ្ហាសំខាន់ៗមួយចំនួនបន្តពីកិច្ចប្រជុំកំពូលអាស៊ានលើកទី៣៥និង៣៦ ដែលប្រទេសថៃធ្វើជាប្រធាន ។ ជាពិសេសវិធីសាស្ត្រដើម្បីជំរុញដំណើរការកសាងសហគមន៍អាស៊ាន ។
រដ្ឋមន្ត្រីការបរទេសអាស៊ាន បានផ្លាស់ប្តូរទស្សនៈគ្នាស្តីពីទំនាក់ទំនងខាងក្រៅរបស់អាស៊ាន និងបញ្ហាតំបន់និងអន្តរជាតិនានា ដែលជាផលប្រយោជន៍ និងកង្វល់រួមរបស់អាស៊ាន ។ ចំពោះការកសាងសហគមន៍អាស៊ាន រដ្ឋមន្ត្រីការបរទេសអាស៊ាន បានពិភាក្សាប្រកបដោយផ្លែផ្កាស្តីពីវិធីសាស្ត្រដើម្បីធ្វើឲ្យបានសម្រេចពេញលេញ នូវចក្ខុវិស័យសហគមន៍អាស៊ានឆ្នាំ២០២៥ ។ រដ្ឋមន្ត្រីការបរទេសអាស៊ាន រំពឹងនូវលទ្ធផលនៃការពិនិត្យឡើងវិញពាក់កណ្តាលអាណត្តិនៃចក្ខុវិស័យសហគមន៍អាស៊ានឆ្នាំ២០២៥ និងផែនទីលម្អិតនៃសហគមន៍ទាំងបីនៅក្នុងឆ្នាំ២០២០។
រដ្ឋមន្ត្រីការបរទេសអាស៊ាន ក៏បានប្រកាន់យកនូវវិធីសាស្ត្រសម្លឹងមើលទៅមុខ ដោយបាន ផ្តួចផ្តើមពិភាក្សាលើចក្ខុវិស័យសហគមន៍អាស៊ានក្រោយឆ្នាំ២០២៥ ហើយនិងវិស័យដែលមានសារៈសំខាន់សម្រាប់សមាហរណកម្មអាស៊ាន រួមទាំងការលើកកម្ពស់ពាណិជ្ជកម្ម និងការវិនិយោគក្នុងតំបន់ ការអភិវឌ្ឍប្រកបដោយចីរភាព ការតភ្ជាប់អាស៊ាន សេដ្ឋកិច្ចឌីជីថល និងការអភិវឌ្ឍវិស័យ បចេ្ចកវិទ្យាយ៉ាងឆាប់រហ័សក្នុងបរិបទនៃបដិវត្តន៍ឧស្សាហកម្មទី៤ ទីក្រុងវៃឆ្លាត សន្តិសុខប្រព័ន្ធអុីនធើរណេត ការលើកកម្ពស់ស្ត្រីនិងសមភាពយេនឌ័រ ការប្រែប្រួលអាកាសធាតុ ផ្សែងអ័ព្ទឆ្លងដែននិងបញ្ហាសន្តិសុខមិនមែនប្រពីណីដទៃទៀត។ លោកឧបនាយករដ្ឋមន្ត្រី បានឆ្លៀតឱកាសជម្រាបជូនកិច្ចប្រជុំចង្អៀត អំពីអាទិភាពកម្ពុជានៅក្នុងអាស៊ានសម្រាប់ឆ្នាំ២០២០ ។
ពាក់ព័ន្ធនឹងសសរស្តម្ភនយោបាយសន្តិសុខអាស៊ាន លោកឧបនាយករដ្ឋមន្ត្រី បានលើកឡើងថា ក្នុងនាមជាប្រទេសដែលផ្តួចផ្តើមនិងធ្វើជាម្ចាស់ផ្ទះនៃមជ្ឈមណ្ឌលតំបន់អាស៊ានសម្រាប់សកម្មភាពមីន កម្ពុជាជានិច្ចកាល បេ្តជ្ញាចិត្តជួយមជ្ឈមណ្ឌលឱ្យដំណើរការបានពេញលេញ និងមានប្រសិទ្ធភាព ក្នុងការបង្កើនការយល់ដឹងពីផលប៉ះពាល់នៃសំណល់យុទ្ធភណ្ឌពីសង្គ្រាម និងបានលើកទឹកចិត្តដោយមជ្ឈមណ្ឌលមានវឌ្ឍនភាពជាវិជ្ជមាន ក្នុងការកសាងសមត្ថភាពស្ថាប័ន និងពង្រីកដំណើរការនៅឆ្នាំ២០១៩ ។ ឆ្នាំ២០២០ ជាឆ្នាំដែលមានសារៈសំខាន់សម្រាប់កិច្ចសហប្រតិបត្តិការរវាងអាស៊ាន និងអង្គការសហប្រជាជាតិ ហើយក៏ជាខួប៧៥ឆ្នាំនៃការបង្កើត អង្គការសហប្រជាជាតិ ។
ក្នុងន័យនេះ រដ្ឋមន្ត្រី ការបរទេសអាស៊ាន បានគាំទ្រនូវសំណើរបស់វៀតណាម ដែលជាប្រធានអាស៊ានឆ្នាំ២០២០ និងជាប្រធានក្រុមប្រឹក្សាសន្តិសុខអង្គការសហប្រជាជាតិសម្រាប់ខែមករា ឆ្នាំ២០២០ ក្នុងការរៀប ចំឱ្យអាស៊ានបានជម្រាបជូនក្រុមប្រឹក្សាសន្តិសុខអង្គការសហប្រជាជាតិពីប្រធានបទ «កិច្ចសហ ប្រតិបត្តិការរវាងអង្គការសហប្រជាជាតិ និងអង្គការតំបន់ និងអនុតំបន់ ក្នុងការថែរក្សាសន្តិភាព និងសន្តិសុខអន្តរជាតិ ៖ តួនាទីរបស់អាស៊ាន» នៅក្នុងខែមករា ឆ្នាំ២០២០នេះ នៅទីក្រុងញូវយ៉ក ។ រដ្ឋមន្ត្រីការបរទេសអាស៊ាន ក៏បានផ្លាស់ប្តូរទស្សនៈស្តីពីបញ្ហាក្នុងតំបន់និងអន្តរជាតិដែលលេចធ្លោមួយចំនួន ដោយសង្កត់ធ្ងន់ទៅលើបញ្ហាដែលរដ្ឋមន្ត្រីការបរទេសអាស៊ានបានកត់សម្គាល់វឌ្ឍនភាព នៃកិច្ចសន្ទនាក្នុងន័យស្ថាបនារវាង មីយ៉ាន់ម៉ានិងបង់ក្លាដែស ចំពោះដំណើរការនៃការធ្វើមាតុភូមិនិវត្តន៍របស់ជនបាត់បង់ទីលំនៅនៅរដ្ឋរ៉ាខាញ ។
រដ្ឋមន្ត្រីការបរទេសអាស៊ាន ក៏បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់អគ្គលេខាធិការអាស៊ាន ក្នុងការដឹកនាំការអនុវត្តអនុសាសន៍នៃការវាយតម្លៃ សេចក្តីត្រូវការបឋម ហើយបានទន្ទឹងរង់ចាំមើលការអនុវត្តនូវការវាយតម្លៃពីតម្រូវការគ្រប់ជ្រុងជ្រោយ ។ រដ្ឋមន្ត្រីការបរទេសអាស៊ាន បានបង្ហាញពីការត្រៀមរួចរាល់របស់អាស៊ាន ក្នុងការជួយគាំទ្រដល់ដំណើរការនៃការធ្វើមាតុភូមិនិវត្តន៍ឱ្យបានឆាប់រហ័ស មានសុវត្ថិភាព និងមានសណ្តាប់ធ្នាប់។ចំពោះបញ្ហាសមុទ្រចិនខាងត្បូង រដ្ឋមន្ត្រីការបរទេសអាស៊ាន បានគូសបញ្ជាក់អំពីវឌ្ឍនភាព នៃកិច្ចសហប្រតិបត្តិការ និងកិច្ចពិគ្រោះយោបល់រវាងអាស៊ាន និងចិន ជាពិសេសការបញ្ចប់ការពិភាក្សាជុំទី១ និងការចាប់ផ្តើមពិភាក្សាជុំទី២ នៃសេចក្តីព្រាងអត្ថបទចរចាតែមួយនៃក្រមប្រតិបត្តិនៃសមុទ្រចិនខាងត្បូង ។
រដ្ឋមន្ត្រីការបរទេសអាស៊ាន បានគូសបញ្ជាក់ពីសារៈសំខាន់នៃការអនុវត្តសេចក្តីថ្លែងការណ៍ស្តីពីការប្រតិបត្តិរបស់បណ្តាភាគីនៅសមុទ្រចិនខាងត្បូង(DOC) ឱ្យបានទាំងស្រុង ពេញលេញ និងមានប្រសិទ្ធភាព ។ រដ្ឋមន្ត្រីការបរទេសអាស៊ាន រំពឹងទុកពីការចុះហត្ថលេខាលើកិច្ចព្រមព្រៀងស្តីពីភាពជាដៃគូ សេដ្ឋកិច្ចតំបន់គ្រប់ជ្រុងជ្រោយ(RCEP)នៅឆ្នាំនេះដែលនឹងរួមចំណែកបន្ថែមទៀតដល់កំណើនសេដ្ឋកិច្ច និងវិបុលភាពក្នុងតំបន់ ។ ក្រៅពីកិច្ចប្រជុំចង្អៀត លោកឧបនាយករដ្ឋមន្ត្រី ប្រាក់ សុខុន ក៏មានជំនួបទ្វេភាគីជាមួយលោកដោន ប្រាំម៉ូដវីណៃ រដ្ឋមន្ត្រីក្រសួងការបរទេសថៃ ដើម្បីពិភាក្សាពីទំនាក់ទំនងទ្វេភាគីរវាងកម្ពុជានិងថៃ និងបានផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិ ដែលជាកង្វល់រួម ៕
ចែករំលែកព័តមាននេះ