ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ប្រជាពលរដ្ឋស្រុកមង្គលបូរី នៅពេលនេះលែងព្រួយបារម្ភពីរឿងទឹកប្រើប្រាស់ទៀតហើយ ខណៈដែលបង្ហូរទឹកពីផ្នែកខាងលើ និងបូមពីដងស្ទឹងសិរីសោភ័ណ ចូលស្ទឹងមង្គលបូរី។
លោក រ័ត្ន ដាស៊ីណង់ អភិបាលស្រុកមង្គលបូរី បានប្រាប់ថា ជាក់ស្តែងរហូតមកដល់ថ្ងៃទី២០ ខែមករា ឆ្នាំ២០២០នេះ នៅដងស្ទឹងមង្គលបូរី មានទឹកសម្រាប់ប្រជាពលរដ្ឋប្រើប្រាស់ហើយ នៅពេលទឹកត្រូវបានបង្ហូរទម្លាក់ពីផ្នែកខាងលើ និងបូមពីដងស្ទឹងសិរីសោភ័ណ ចូលមកស្ទឹងមង្គលបូរី។
លោកបានបញ្ជាក់ថា កាលពីដើមខែមករា ឆ្នាំ២០២០នេះ នៅស្រុកមង្គលបូរី ប្រឈមនឹងការខ្វះទឹកប្រជាពលរដ្ឋប្រមាណជិត៨,០០០គ្រួសារ និងមន្ទីពេទ្យមិត្តភាពកម្ពុជា-ជប៉ុនមង្គលបូរី ហើយដោយបានការយកចិត្តទុកដាក់ពីលោក កែ គឹមយ៉ាន ប្រធានក្រុមការងារថ្នាក់ជាតិ ចុះជួយខេត្តបន្ទាយមានជ័យ និងលោក គន់ គីម ទេសរដ្ឋមន្ត្រី ទទួលបន្ទុកបេសកកម្មជនពិសេសនៃគណៈកម្មាធិការគ្រប់គ្រងគ្រោះមហន្តរាយ និងលោក លឹម គានហោ រដ្ឋមន្ត្រីធនធានទឹក និងឧតុនិយម បានចុះពិនិត្យ និងដោះស្រាយទឹកជូនប្រជាពលរដ្ឋស្រុកមង្គលបូរី។
លោក រ័ត្ន ដាស៊ីណង់ បានបញ្ជាក់ទៀតថា ដោយសារបានការយកចិត្តទុកដាក់ពីថ្នាក់ដឹកនាំ បានមូបទឹកពីដងស្ទឹងសិរីសោភ័ណ ទម្លាក់ចូលមកដងស្ទឹងមង្គលបូរី ហើយបានបង្ហូរទឹកពីផ្នែកខាងលើ ទម្លាក់មកក្រោមរហូតដល់ថ្ងៃទី២០ ខែមករា ឆ្នាំ២០២០នេះ ដងស្ទឹងមង្គលបូរី មានទឹកសម្រាប់ឱ្យប្រជាពលរដ្ឋប្រើប្រាស់ហើយ។
លោក រ័ត្ន ដាស៊ីណង់ បញ្ជាក់ទៀតថា ទន្ទឹមនឹងមានទឹកប្រើប្រាស់នេះ សូមណែនាំដល់ប្រជាពលរដ្ឋមិនត្រូវបូមទឹកនេះដាក់ស្រូវប្រាំង ឬដាក់ដំណាំឡើយ ដោយសារទឹកនេះ គឺសម្រាប់ទុកប្រជាពលរដ្ឋប្រើប្រាស់តែប៉ុណ្ណោះ បើសិនជារកឃើញថា មានការមូបទឹកយកទៅដាក់បន្លែ ឬស្រូវ និងត្រូវធ្វើការហាមឃាត់មិនអនុញ្ញាតឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ