ខេត្តឧត្តរមានជ័យ ៖ បន្ទាប់ពីទទួលបានជោគជ័យក្នុងការរៀបចំព្រឹត្តិការណ៍រត់ប្រណាំងអន្លង់វែងលើកទី១កាលពីឆ្នាំ២០១៩កន្លងមកនៅក្នុងឆ្នាំ២០២០នេះគណៈកម្មការរៀបចំការប្រកួតគ្រោងនឹងរៀបចំឱ្យព្រឹត្តិការណ៍បែបនេះជាលើកទី២ម្ដងទៀត ហើយសង្ឃឹមថានឹងមានគាំទ្រគគ្រឹកគគ្រេងជាងលើកទី១ ។ នេះបើតាមការឱ្យដឹងពីលោក វ៉ាត់ ចំរើន រដ្ឋលេខាធិការក្រសួងទេសចរណ៍និងជាអគ្គលេខាធិការគណៈ កម្មាធិការជាតិអូឡាំពិកកម្ពុជា មានប្រសាសន៍នៅក្នុងកិច្ចប្រជុំមួយកាលពីព្រឹកថ្ងៃទី២០ មករា នៅសាលាស្រុកអន្លង់វែង ។
តាមការឱ្យដឹងនៅក្នុងកិច្ចប្រជុំនេះគេឃើញវត្តមានលោក វ៉ាត់ ចំរើន រដ្ឋលេខាធិការក្រសួងទេសចរណ៍ លោក ឌី រ៉ាដូ អភិបាលរងខេត្តឧត្តរមានជ័យ លោក ជិន វរយុទ្ធអភិបាលស្រុកឧត្តរមានជ័យ និងលោកតំណាង អភិបាលខេត្តស៊ីសាកេត និងខេត្តសូរិន្ទ ប្រទេស ថៃ ។ កិច្ចប្រជុំនេះផ្ដោតសំខាន់ទៅលើការរៀបចំឱ្យមានការលេងកីឡារត់ប្រណាំងនិងកីឡាកម្សាន្តផ្សេងៗដូចជាប្រណាំងទូក ប្រណាំងកង់ល្បុក្កតោដែលជាកីឡាអត្តសញ្ញាណជាតិខ្មែរនិងកីឡាជាច្រើនប្រភេទតាមតែអាចធ្វើទៅបាន ហើយក៏មានការតាំងពិព័រណ៍ទៀតផង។
លោក ឌី រ៉ាដូ អភិបាលរងខេត្តឧត្តរមានជ័យបានមានប្រសាសន៍ថា កម្មវិធីនេះរៀបចំឡើងដោយក្រសួងទេសចរណ៍ មណ្ឌលឯកសារកម្ពុជានិងរដ្ឋបាលខេត្តឧត្តរមានជ័យ ព្រមទាំងមានការចូលរួមពីភាគីថៃផងដែរ។
កម្មវិធីនេះធ្វើឡើងរួចម្ដងមកហើយកាលពីខែមករា ឆ្នាំ២០១៩ ដែលកាលណោះការរៀបចំគ្រោងឱ្យមានតែជាង១ពាន់នាក់បន្តិចបន្តួចប៉ុណ្ណោះ តែមានការកើនឡើងរហូតដល់ទៅជាង១៤០០នាក់ ហើយភាគីថៃបានបញ្ជូនមនុស្សឱ្យមកចូលរួមជាង៧០នាក់ ។ លោកបន្តថា កម្មវិធីនេះធ្វើឡើងដើម្បីរំលឹកខួប២០ឆ្នាំដែលយើងទទួលបានសុខសន្តិភាពពេញលេញ ម្យ៉ាងវិញទៀតស្រុកអន្លង់វែងគឺជាទីតាំងតស៊ូចុង ក្រោយរបស់ខ្មែរក្រហមនិងជាទីតាំងបញ្ចប់សង្គ្រាមស៊ីវិលនៅកម្ពុជា និងទាក់ទាញចំណាប់អារម្មណ៍ឱ្យកាន់តែខ្លាំងថែមទៀតពីសំណាក់ប្រជាពលរដ្ឋខ្មែរ ក៏ដូចភ្ញៀវបរទេសឱ្យមកទស្សនាតំបន់ទេសចរណ៍សំខាន់ៗនៅក្នុងស្រុកអន្លង់វែងយើងនេះ ។
លោក វ៉ាត់ ចំរើន រដ្ឋលេខាធិការក្រសួង ទេសចរណ៍បានមានប្រសាសន៍ថា កម្មវិធីរត់ប្រណាំងអន្លង់វែង លើកទី២ឆ្នាំ២០២០នេះមានរយៈពេល៣ថ្ងៃចាប់ពីថ្ងៃទី៧ដល់ថ្ងៃទី៩ កុម្ភៈ ឆ្នាំ២០២០ ។ លោកបានផ្ដាំផ្ញើរទៅដល់អាជ្ញាធរពាក់ព័ន្ធត្រូវយកចិត្តទុកដាក់ឱ្យបានល្អនូវសណ្ដាប់ធ្នាប់ អនាម័យនិងបរិស្ថាន ព្រោះថាក្នុងនាមអាជ្ញាធរស្រុកអន្លង់វែង ដែលជាម្ចាស់ផ្ទះត្រូវទទួលភ្ញៀវមកពីខាងក្រៅឱ្យបានល្អ ដើម្បីកុំឱ្យបាក់មុខមាត់។
ជាមួយគ្នានេះលោកក៏សំណូមទៅដល់ភាគីទាំងពីរត្រូវសហការគ្នាឱ្យបានល្អក្នុងនាមជាប្រទេសជិតខាងគ្នា ធ្វើយ៉ាងណាជំរុញឱ្យកម្មវិធីនេះដំណើរការទៅបានរលូនតាំងពីដើមដល់ចប់ ។ គួរបញ្ជាក់ថា កម្មវិធីរត់ប្រណាំងនិងជិះកង់ចេញដំណើរពីទីរួមស្រុកអន្លង់វែងនិងបញ្ចប់នៅត្រឹមទីតាំងពយតាម៉ុក៕ (កែសម្រួលដោយ ៖ បុប្ផា)
ចែករំលែកព័តមាននេះ