ខេត្តកំពត ៖ យោងតាមប្រភពព័ត៌មានពីការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបានឲ្យដឹងថា នៅរសៀលថ្ងៃទី២០ ខែមករា ឆ្នាំ២០២០ នេះកម្លាំងការិយាល័យនគរបាលជំនាញព្រហ្មទណ្ឌកម្រិតធ្ងន់នៃស្នងការខេត្តបានកសាងសំណុំរឿងករណីហិង្សាដោយចេតនាបណ្តាលឲ្យមានមនុស្សស្លាប់មួយករណី និងដើម្បីបញ្ជូនជនសង្ស័យទៅតុលាការដើម្បីចាត់ការតាមផ្លូវច្បាប់នៅរសៀលថ្ងៃនេះ ។
ប្រភពបានបន្តថា ជនសង្សយ័ដែលសមត្ថកិច្ចបញ្ជូនទៅតុលាការដើម្បីចាត់ការតាមផ្លូវច្បាប់នៅរសៀលថ្ងៃនេះមានឈ្មោះ សៀង សារ៉ែន ភេទប្រុស អាយុ៣០ឆ្នាំ មុខរបរកម្មករតទឹក រស់នៅភូមិពាមឆ្កោក ឃុំពាមឆ្កោក ស្រុកជលគីរី ខេត្តកំពង់ឆ្នាំង ។
ជុំវិញករណីកើតឡើងនៅអំពើហិង្សាបណ្តាលឲ្យមានមនុស្សស្លាប់ខាងលើ បើយោងតាមប្រភពពត៌មានពីសមត្ថកិច្ចជំនាញបានឲ្យដឹងថា មុនពេលកើតហេតុមានក្រុមហ៊ុនតប្រព័ន្ឋទឹក និងភ្លើងអគ្គីសនីដែលសមត្ថកិច្ចមិនបានបញ្ចេញឈ្មោះក្រុមហ៊ុនមួយនេះទេបានធ្វើពិធីជប់លៀងឲ្យកម្មករដើម្បីអបអរសាទរបុណ្យចូលឆ្នាំប្រពៃណីចិន-វៀតណាមខាងមុខនេះ នៅក្នុងហាងភោជនីយដ្ឋានទឹកធ្លាក់ នៅក្បែរចំណុចរមណីឋានទឹកធ្លាក់ (លើភ្នំបូកគោ) កាលពីល្ងាចថ្ងៃទី១៨ ខែមករា ឆ្នាំ២០២០ ។
សមត្ថកិច្ចបន្តថា បន្ទាប់ពីហូបចុកមួយសន្ទុះក៏ដល់កម្មវិធីរាំលេង នៅពេលកំពុងរាំនោះក៏ស្រាប់តែមានការវាយតប់គ្នាកើតឡើងក្នុងវង់រាំ ហើយនៅពេលនោះជនដៃដល់ដែលបានចាក់សម្លាប់ជនរងគ្រោះដួលនៅកន្លែងវង់រាំហើយក៏បានគេចខ្លួនចេញមកក្រៅវង់រាំដើម្បីឲ្យមិត្តភក្តិជូនមកក្រុងកំពតទាំងយប់ដើម្បីរត់គេចខ្លួន ។
ប្រភពបានឱ្យដឹងទៀតថា ក្រោយពីមានហេតុការខាងតំណាងក្រុមហ៊ុនដែលជាម្ចាស់រៀបចំកម្មវិធីបានប្រកាសកុំឲ្យកម្មករដែលនៅក្នុងកម្មវិធីចេញពីកន្លែងកម្មវិធី និងឲ្យកម្លាំងសន្តិសុខយាមជុំវិញកន្លែងកើតហេតុកុំឲ្យមានកម្មករណាម្នាក់ចេញពីក្រៅរង្វង់នៃកន្លែងកើតហេតុដើម្បីធ្វើការពិនិត្យឈ្មោះ នៅពេលពិនិត្យកម្មករទាំងអស់ដែលមានឈ្មោះមកចូលរួមគឺបាត់តែជនដៃដល់ម្នាក់ តំណាងក្រុមហ៊ុនក៏បានទាក់ទងមកកម្លាំងការពារតាមវិទ្យុទាក់ទងឲ្យឃើញមនុស្សជិះម៉ូតូចុះសុំឲ្យឃាត់ទុកសិនដើម្បីពិនិត្យ ។
ពេលនោះកម្លាំងសន្តិសុខបានឃាត់នៅចំណុច(០០)ប៉ុស្តិ៍យាមបរិស្ថានចាស់បានមនុស្សចំនួន៧នាក់នាំមកកាន់ការិយាល័យព្រហ្មទណ្ឌកម្រិតធ្ងន់នៃស្នងការខេត្តដើម្បីធ្វើការសាកសួរ ហើយនៅក្នុងចំណោមមនុស្សទាំង៧នាក់នោះគឺមានជនដៃដល់ម្នាក់ផងដែរ ។ បន្ទាប់ពីសមត្ថកិច្ចជំនាញធ្វើការសាកសួរមនុស្សទាំង៧នាក់រួច ដោយមានជនសង្ស័យម្នាក់ក្នុងចំណោមនោះដែរថាបានសារភាពពីសកម្មភាពដែលខ្លួនបានប្រព្រឹត្តប្រាប់សមត្ថកិច្ច ហើយបានបញ្ជាក់ថាគ្មានអ្នកពាក់ព័ន្ធជាមួយខ្លួនទេគឺខ្លួនបានប្រព្រឹត្តតែម្នាក់ឯង ។ ដោយឃើញថា មនុស្សចំនួន៦ដែលសង្ស័យនាំមកសាកសួរនោះគ្មានការពាក់ព័ន្ធ និងករណីហិង្សានោះទេសមត្ថកិច្ចក៏បានដោះលែងមនុស្សទាំង៦នាក់ឲ្យទៅផ្ទះវិញ ។
ជនដៃដល់បានសារភាពប្រាប់សមត្ថកិច្ចថាខ្លនពិតជាបានចាក់សម្លាប់ជនរងគ្រោះនៅក្នុងវង់រាំចំនួន២កាំបិតចុងស្រួចរហូតដួលស្លាប់នៅក្នុងវង់រាំពិតប្រាកដមែន ដោយមូលហេតុថាជនរងគ្រោះថាឲ្យខ្លួនថា ខ្លួនមុខឌឺណាស់ ហើយវាយខ្លួនមួយដៃចំមុខ ទើបខ្លួនខឹងក៏ឃើញកូនកាំបិតនៅលើតុជិតកន្លែងរាំក៏ស្ទុះយកកូនកាំបិតមកចាក់ពីកាំបិត មួយកន្លែងត្រូវពោះចំហៀងខាងឆ្វេងមួយកាំបិតទៀតត្រូវត្រង់ក្រោមក្លៀកខាងឆ្វេងបណ្តាលឲ្យដួលសន្លប់នៅកន្លែងរាំហើយក៏មានការភ្ញាក់ផ្អើល ខ្លួនក៏រត់គេចចេញមកក្រៅភ្លាមៗដើម្បីពឹងមិត្តភក្តិស្គាល់គ្នាយកម៉ូតូជួយឌុបមកទីរួមខេត្តកំពតទាំងយប់បម្រុងនឹងរត់គេចខ្លួន ប៉ុន្តែនៅពេលចុះមកដល់ចំណុច(០០)កន្លែងប៉ុស្តិ៍បរិស្ថានយាមចាស់ក៏ត្រូវកម្លាំងសន្តិសុខឃាត់ខ្លួនតែម្តង ៕
កែសម្រួលដោយ ៖ សំណាង
ចែករំលែកព័តមាននេះ