រាជធានីភ្នំពេញ ៖ លោកគី តិច ប្រធានក្រុមមេធាវីសម្តេចតេជោ ហ៊ុន សែន នាយករដ្ឋមន្ត្រីបានប្រកាសទទួលយកការពារក្តីអ្នកសារព័ត៌មាន នៅពេលមានបញ្ហាប្តឹងផ្តល់ណាមួយក្នុងការធ្វើការងារតាមវិជ្ជាជីវៈរបស់ខ្លួនត្រឹមត្រូវ ។ ក្នុងជំនួបពិភាក្សាការងាររវាងក្រសួងព័ត៌មាន ជាមួយក្រុមមេធាវីស្ម័គ្រចិត្ត សម្តេចតេជោ នាព្រឹកថ្ងៃទី២០ ខែមករានេះ លោក គី តិច ប្រធានមេធាវីស្ម័គ្រចិត្តបានថ្លែងថា ក្រុមមេធាវី លោកបានយល់ព្រមតាមការកំណត់យកការពារក្តីតែការពារតែរឿងក្តីអ្នកសារព័ត៌មានណាដែលគោរតាមវិជ្ជាជីវៈ ចំណែកសារព័ត៌មានដែលមិនបានចុះបញ្ជីត្រឹមត្រូវតាមច្បាប់នោះមេធាវីមិនជួយការពាក្តីនោះទេ ។
លោកមេធាវីគី តិច ក៏បានឲ្យដឹងថា មេធាវីស្ម័គ្រចិត្តរបស់សម្តេចតេជោមាន៦៧រូប ហើយមាននៅតាមបណ្តាខេត្ត-រាជធានីទាំងអស់ដោយក្នុងមួយខេត្តមានមេធាវី២រូប ការិយាល័យនៅទីនោះ ដើម្បីការពាក្តី ។ លោកមេធាវីបានអះអាងថា ក្រុមមេធាវីបានចាប់ផ្តើមជួយការពារអ្នកសារព័ត៌មាន ចាប់ពីពេលដែលសម្តេចតេជោហ៊ុនសែន ប្រកាសកាលពីថ្ងៃទី ១៤ខែមករា ឆ្នាំ២០២០ ក្នុងជំនួបជាមួយអ្នកសារព័ត៌មាន លើកទី៤កន្លងមក បានទទួលឲ្យក្រុមមេធាវីលោកការពារក្តីជូនអ្នកសារព័ត៌មាន ដោយថវិកាដែលរៀបចំការពារក្តីនេះគឺជាថវិការបស់សម្តេចតេជោផ្ទាល់តែម្តង ។
លោកបញ្ជាក់ថា ៖«មេធាវីយើងជួយ ចំពោះអ្នកសារព័ត៌មានដែលប្រកបវិជ្ជីជីវៈត្រឹមត្រូវដែលទទួលរងនៅការប្តឹង ។ ផ្ទុយទៅវិញចំពោះអ្នកសារព័ត៌មាន ដែលមិនប្រកបវិជ្ជាជីវៈត្រឹមត្រូវ គឺសម្តេចមិនផ្តល់មេធាវីជូនទេ ។ ករណីនេះសម្តេចតេជោបានផ្តល់សិទ្ធិមកឲ្យយើងខ្ញុំថា ជួយ ឬមិនគួរជួយ» ។ លោកមេធាវីក៏បានលើកឡើងទៀតថា សម្តេចតេជោសម្តេចផ្តល់សេវាមេធាវីដល់អ្នកសារព័ត៌មានតែ៥០បូក៥០ គឺមានន័យផ្តល់ឲ្យតែអ្នកសារព័ត៌មានប្រកបវិជ្ជាជីវៈត្រឹមត្រូវ ទាំងបុរស និងស្ត្រី ចំណែកអ្នកសារព័ត៌មានមិនគោរពវិជ្ជាជីវៈត្រឹមត្រូវមិនជួយទេ ។
ជាមួយគ្នានោះដែរ លោកមេធាវីក៏បានស្នើសុំដល់ក្រសួងព័ត៌មានត្រូវផ្សព្វផ្សាយដល់អ្នកសារព័ត៌មានទាំងអស់ឲ្យជួយផ្សាយក្រុមមេធាវីស្ម័គ្រចិត្តសម្តេចតេជោវិញពាក់ព័ន្ធដល់ប្រជាពលរដ្ឋក្រីក្រនៅជនបទដាច់ស្រយាលឲ្យបានដឹងពីសេវាមេធាវីស្ម័គ្រសម្តេចតេជោសែន ជាពិសេសនោះជួយស្ត្រីក្រីក្រ ដើម្បីឲ្យក្រុមមេធាវីចុះជួយ ។ លោកមេធាវីបានបញ្ជាក់ថា ៖«មេធាវីយើងស្នើសុំឲ្យក្រសួងជួយផ្សព្វផ្សាយដល់អ្នកសារព័ត៌មានទាំងអស់ធ្វើការរាយការណ៍ពីសេវាការពារដល់ជនក្រីក្រ ពិសេសអ្នកដែលគ្មានស្មាតហ្វូនប្រើប្រាស់ ដែលមិនដឹងសេវាមេធាវីស្ម័គ្រសម្តេចតេជោ ។ ព្រោះសម័យនេះគេអាចធ្វើតាមស្មាតហ្វូន» ។
លោកថា៖«ខ្ញុំស្នើសុំ ដើម្បីដល់គាត់ព្រោះគាត់ចុះយកព័ត៌មានដឹងរឿងមុនពួកខ្ញុំ ។ នៅពេលគាត់ដឹងគាត់មកប្រាប់ពួកខ្ញុំ ក្រុមយើងចុះទៅជួយដល់ស្ត្រីរងគ្រោះក្រីក្រនោះភ្លាម ។ អ្នកសារព័ត៌មានទទួលបានព័ត៌មានមុន ពិសេសនោះនៅតំបន់ដាច់ស្រយាលជនបទ» ។ ទោះយ៉ាងណាក្តីលោកមេធាវី ក៏បានអះអាងការផ្តល់សេវាមេធាវីការពារក្តីជូនអ្នកសារព័ត៌មាននេះមិនអាចនិយាយថា ដឹងតែឈ្នះក្តីនោះទេព្រោះថា អ្នកដែលសម្រេច ដោយយុត្តិធម៌នោះ គឺជាសិទ្ធិរបស់ចៅក្រម ។ លោកបញ្ជាក់ថា៖«សូមបញ្ជាក់ថា មេធាវី គឺជាអ្នកការពារ ចំណែកចៅក្រម គឺជាសម្រេច ។ ប៉ុន្តែនៅពេលអ្នកសារព័ត៌ដែលធ្វើតាមវិជ្ជាជីវៈ និងតាមច្បាប់នោះយើងងាយស្រួលជួយ ។ តែបើអ្នកសារព័ត៌មានមិនប្រកបដោយវិជ្ជាជីវៈយើងមិនអាចជួយទេទោះបីរដ្ឋមន្ត្រី ក្រសួងព័ត៌មានឲ្យជួយក៏មិនអាចជួយបានដែរ ព្រោះគ្មានច្បាប់ការពារ» ។
ចំណែកលោករដ្ឋមន្ត្រីខៀវ កាញារីទ្ធ រដ្ឋមន្ត្រីក្រសួងព័ត៌មានបានលើកឡើងថា នៅពេលអ្នកសារព័ត៌មានបញ្ហាផ្លូវច្បាប់ណាមួយដែលត្រូវបានទទួលរងនូវការប្តឹង គឺត្រូវឲ្យអ្នកសារព័ត៌មាននោះឆ្លងកាត់មកក្រសួងព័ត៌មានពិនិត្យសិន ព្រោះថា អ្នកសារព័ត៌មានគ្រប់គ្រងដោយច្បាប់ គឺអ្នកសារព័ត៌មានចុះបញ្ជីត្រឹមត្រូវ ។ ដូច្នេះអ្នកសារព័ត៌មានបែបនេះ ខាងមេធាវីក៏ដូចជា ក្រសួងព័ត៌មាននឹងសហការគ្នាផ្តល់សេវា ។
ពាក់ព័ន្ធនឹងការជួយសេវាផ្នែកច្បាប់នេះដែរ លោករដ្ឋមន្ត្រីក៏បានឲ្យដឹងទៀតថា ក្រសួងនឹងរៀបចំធ្វើសិក្ខាសាលាផ្សព្វផ្សាយអំពីសេវាមេធាវីរដ្ឋាភិបាលដែលត្រូវផ្តល់ជូនអ្នកសារព័ត៌មាននៅពេលខាងមុខនេះ ដោយមានការចូលរួមពីមេធាវីស្ម័គ្រចិត្តសម្តេចតេជោ ដើម្បីធ្វើការពន្យល់ដល់អ្នកសារព័ត៌មានផងដែរ ។ ចំពោះសំណើរបស់លោករដ្ឋមន្ត្រី ត្រូវបានលោកមេធាវី គី តិចបានប្រកាសស្វាគមន៍ និងទទួលយក ៕
ចែករំលែកព័តមាននេះ