រាជធានីភ្នំពេញ ៖ មុនចាប់ផ្ដើមបោះផ្សាយលក់មូលបត្រកម្មសិទ្ធិជាសាធារណៈនៅក្នុងផ្សារមូលបត្រកម្ពុជាជាផ្លូវការនោះធនាគារ អេស៊ីលីដា ភីអិលស៊ី បានរៀបចំនូវសិក្ខាសាលាជាបន្តបន្ទាប់ ដើម្បីអញ្ជើញវិនិយោគិនអតិថិជន និងប្រជាពលរដ្ឋដែលមានចំណាប់អារម្មណ៍ក្នុងការវិនិយោគជាមួយអេស៊ីលីដាក្នុងវិស័យមូលបត្រមកទទួលយកនូវចំណេះដឹងថ្មីៗបន្ថែមទៀតពីវិស័យនេះ ។ គិតត្រឹមថ្ងៃទី១៨ ខែមករានេះ អេស៊ីលីដា បានបើកវគ្គសិក្ខាសាលាផ្សព្វផ្សាយស្ដីពីធនាគារ អេស៊ីលីដា ភីអិលស៊ី គ្រោងនឹងបោះផ្សាយលក់មូលបត្រកម្មសិទ្ធិជាសាធារណៈចំនួនបួនវគ្គហើយ និងទទួលបានបានអតិថិជន និងអ្នកចូលរួមជាច្រើនដើម្បីសិក្សា និងស្វែងយល់ពីដំណើរការបោះផ្សាយមូលបត្រនេះ ។
បើតាមលោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាបានមានប្រសាសន៍ថា វគ្គសិក្ខាសាលាផ្សព្វផ្សាយសម្រាប់អតិថិជន និងប្រជាពលរដ្ឋដែលចង់ចូលរួមវិននិយោគជាមួយធនាគារអេស៊ីលីដា ពេលបោះផ្សាយមូលបត្រកម្មសិទ្ធិជាសាធារណៈនៅក្នុងផ្សារហ៊ុនកម្ពុជាបានធ្វើឡើង៤វគ្គរួចហើយ ដែលមានអ្នកចូលរួមសរុបជា៦០០នាក់ ។ នៅក្នុងចំណោមសិក្ខាកាមជាង៦០០នាក់នេះដែរក៏មានមួយចំនួនបើកគណនីជួញដូរភ្លាមៗនៅក្នុងនោះតែម្ដង ខណៈមានប្រជាពលរដ្ឋកម្ពុជាជាច្រើនពាន់នាក់ទៀតបានបើកគណនីសម្រាប់ជួញដូរនៅខាងក្រៅរួចរាល់ហើយផងដែរ ។
លោកបណ្ឌិតបន្តថា កាលដំបូងឡើយធនាគារអេស៊ីលីដា បានដាក់លិខិតជូនភ្ញៀវ ដើម្បីអញ្ជើញមកចូលរួម ក៏ប៉ុន្តែក្រោយមកទៀត ធនាគារលែងដាក់លិខិតទៀតហើយ ដោយងាកមកផ្សព្វផ្សាយតាមបណ្ដាញសង្គមវិញ តែបែរជាមានអ្នកចូលរួមច្រើនជាងវគ្គមុនៗទៅទៀត ដែលឆ្លុះបញ្ចាំងអោយឃើញថា ពលរដ្ឋកម្ពុជាកាន់តែច្រើនបានចាប់អារម្មណ៍វិនិយោគផ្សារហ៊ុនជាមួយធនាគារអេស៊ីលីដា ហើយអេស៊ីលីដា ក៏ត្រៀមខ្លួនរួចរាល់សម្រាប់ការលក់ជាផ្លូវការនូវមូលបត្រកម្មសិទិ្ធជាសាធារណៈនៅផ្សារមូលបត្រកម្ពុជា ។
លោកថា៖«យើងរង់ចាំតែអាជ្ញាធរបើកភ្លើងខៀវ បោះផ្សាយជាផ្លូវការនោះទេ ហើយវាក៏ជាពេលដែលអតិថិជនកំពុងរង់ចាំជាយូរមកហើយដែរ»។
បើតាមប្រធាននាយកប្រតិបត្តិរូបនេះបានអោយដឹងថាធនាគារអេស៊ីលីដា ចាប់ផ្ដើមធ្វើប្រតិបត្តិការអាជីវកម្មនៅក្នុងប្រទេសកម្ពុជា អស់រយៈពេល ២៧ឆ្នាំមកហើយ ដោយបានរីកចម្រើនលូតលាស់ជាបន្តបន្ទាប់ធ្វើអោយប្រាក់ចំណេញអេស៊ីលីដា កើនឡើងជាបន្តបន្ទាប់ ។ ដោយហេតុនេះហើយ អេស៊ីលីដាចង់អោយផលចំណេញដែលទទួលបានបែងចែកទៅអតិថិជន និងប្រជាពលរដ្ឋកម្ពុជាជាច្រើនទៀតដោយមិនមែនសម្រាប់តែម្ចាស់ភាគទុនិកប៉ុន្មាននាក់នោះឡើយ ។
គួរបញ្ជាក់ថា ធនាគារអេស៊ីលីដា ជាធនាគារពាណិជ្ជទី១ ដែលបានបោះផ្សាយលក់មូលបត្រកម្មសិទ្ធិជាសាធារណៈនៅផ្សារមូលបត្រកម្ពុជា ខណៈបច្ចុប្បន្នមានក្រុមហ៊ុនចំនួន៥កំពុងបោះផ្សាយលក់មូលបត្រកម្មសិទ្ធិជាសាធារណៈនៅក្នុងផ្សារនេះរួមមាន ១. រដ្ឋាករទឹកស្វយ័តក្រុងភ្នំពេញ ២. ក្រុមហ៊ុន ហ្គ្រែនធ្វីន ៣. កំពង់ផែស្វយ័តក្រុងភ្នំពេញ ៤. កំពង់ផែស្វយ័តក្រុងព្រះសីហនុ និងតំបន់សេដ្ឋកិច្ចពិសេសភ្នំពេញ ៕ អត្ថបទសហការ
ចែករំលែកព័តមាននេះ