រាជធានីភ្នំពេញ ៖ ស្ត្រីម្នាក់ស្ថិតក្នុងសភាពប៉ោងហើមមុខ ព្រមទាំងយំផង បានរត់ទៅសុំការអន្តរាគមន៍ពីនគរបាលប៉ុស្តិ៍ចោមចៅ៣ បន្ទាប់ពីស្ត្រីរងគ្រោះចូលទៅឃាត់ក្នុងជម្លោះរវាងប្អូនថ្លៃប្រុស និងប្អូនស្រីដែលត្រូវជាប្តីប្រពន្ធ ស្រាប់តែប្អូនថ្លៃប្រុសផ្ទុះកំហឹងរួចក៏វាយ បណ្តាលឱ្យស្ត្រីរងគ្រោះជាបងថ្លៃរងរបួសហើមមុខ កាលពីវេលាម៉ោង៨យប់ថ្ងៃទី១៨ ខែមករា ឆ្នាំ២០២០ នៅចំណុចផ្ទះជួលមួយកន្លែង ស្ថិតក្នុងភូមិជម្ពូវ័ន សង្កាត់ចោមចៅ៣ ខណ្ឌពោធិសែនជ័យ ។ ពាក់ព័ន្ធនឹងករណីនេះ សមត្ថកិច្ចមិនទាន់ដោះស្រាយឱ្យភ្លាមនោះទេ គឺរង់ចាំចេញលិខិតហៅភាគីជនបង្កមកដោះស្រាយនៅពេលក្រោយ និងឱ្យស្ត្រីរងគ្រោះត្រឡប់ទៅផ្ទះសិនដើម្បីព្យាបាលរបួស ។
ស្ត្រីរងគ្រោះម្នាក់ខាងលើមិនស្គាល់អត្តសញ្ញាណនោះទេ ។ ចំណែកជនបង្កជាប្អូនថ្លៃប្រុសក៏មិនស្គាល់អត្តសញ្ញាណផងដែរ ។
តាមសម្តីស្ត្រីរងគ្រោះខាងលើដែលរៀបរាប់ទាំងយំផងបានឲ្យដឹងថា មុនពេលកើតហេតុ ប្អូនស្រីរបស់គាត់ឈ្លោះប្រកែកគ្នាជាមួយប្តី ដែលស្នាក់នៅបន្ទប់ជួលក្បែរគ្នានោះដែរ ពេលឃើញដូច្នោះ គាត់ជាបងស្រី ក៏ចេញទៅជួយឃាត់ ពេលនោះក៏មានសម្តីតូចធំខ្លះ ក្នុងនាមគាត់ជាបងស្តីប្រដៅអប់រំប្អូនៗ ។ តែផ្ទុយទៅវិញ ធ្វើឱ្យប្អូនថ្លៃប្រុសផ្ទុះកំហឹងទ្វេដង ក៏ប្រើកណ្តាប់ដៃវាយគាត់ បណ្តាលឱ្យហើមមុខ លុះពេលគាត់រើបំរះរួច ក៏រត់ទៅប្តឹង និងទទូចស្នើសុំនគរបាលប៉ុស្តិ៍ចោមចៅ៣ដើម្បីជួយអន្តរាគមន៍ តែសមត្ថកិច្ចពុំទាន់មានចំណាត់ការភ្លាមៗនោះទេ ដោយសមត្ថកិច្ចបានប្រាប់គាត់ឱ្យវិលត្រឡប់ទៅផ្ទះវិញសិន និងរង់ចាំសមត្ថកិច្ចចេញលិខិតហៅជនបង្កជាប្អូនថ្លៃប្រុសឱ្យមកដោះស្រាយគ្នានៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ