ខេត្តបាត់ដំបង ៖ ជនសង្ស័យចំនួន៤នាក់ ដែលពាក់ព័ន្ធនឹងការជួញដូរគ្រឿងញៀនជាង៥គីឡូក្រាម ហើយត្រូវសមត្ថកិច្ចបង្ក្រាបជាបន្តបន្ទាប់កាលពីថ្ងៃពុធទី១៥ ខែមករាកន្លងទៅ ត្រូវមន្ត្រីការិយាល័យជំនាញបញ្ជូនទៅប្រគល់ឲ្យស្ថាប័នអយ្យការអមសាលាដំបូងខេត្ត នារសៀលថ្ងៃទី១៧ ខែមករា ក្រោយពីបញ្ចប់នីតិវិធីសួរនាំ។ នេះបើតាមការឲ្យដឹង ពីមន្ត្រីការិយាល័យនគរបាលប្រឆាំងគ្រឿងញៀនខេត្ត ។
យោងតាមរបាយការណ៍របស់ការិយាល័យនគរបាលប្រឆាំងគ្រឿងញៀនខេត្តឲ្យដឹងថា ជនទាំង៤នាក់ដែលពាក់ព័ន្ធនឹងករណីជួញដូរគ្រឿងញៀននេះមាន ៖
១-ឈ្មោះ អ៊ាន ហាក់ឡេង អាយុ១៩ឆ្នាំ រស់នៅភូមិអូរចារ សង្កាត់អូរចារ ក្រុងបាត់ដំបង
២-ឈ្មោះ នឿន វណ្ណៈ អាយុ១៩ឆ្នាំ រស់នៅភូមិក្បាលខ្មោច ឃុំជ្រៃ ស្រុកថ្មគោល ។
៣-ឈ្មោះ ហៀង ស៊ីវន អាយុ៣១ឆ្នាំ រស់នៅភូមិព្រៃកូនសេក សង្កាត់អូរចារ ។
៤-ឈ្មោះ ហោ ឧត្តម អាយុ៤៦ឆ្នាំ រស់នៅភូមិដង្កោទាប សង្កាត់ទួលតាឯក ក្រុងបាត់ដំបង ។
បើតាមប្រវត្តិ ឈ្មោះ ហោ ឧត្តម នេះគឺជាមេខ្លោងជូញដូរគ្រឿងញៀនដ៏ល្បីល្បាញ ។ ជននេះទើបចេញពីគុកបានតែប៉ុន្មានខែប៉ុណ្ណោះ ហើយពេលនេះត្រូវត្រឡប់ទៅជួបប្រពន្ធនៅក្នុងគុកវិញ ដែលពាក់ព័ន្ធនឹងបទល្មើសជួញដូរគ្រឿងញៀនដូចគ្នាដដែល ។ លោកឧត្តមសេនីយ៍ត្រី កុយ ហៀង ស្នងការរងនគរបាលខេត្ត ទទូលបន្ទុកប្រឆាំងគ្រឿងញៀន បានឲ្យដឹងតាមរយៈរបាយការណ៍ថា ក្រុមជួញដូរគ្រឿងញៀនទាំង៤នាក់នេះ ត្រូវបានកម្លាំងការិយាល័យប្រឆាំងគ្រឿងញៀន រួមសហការជាមួយកម្លាំងនគរបាលក្រុងបាត់ដំបង បង្ក្រាបជាបន្តបន្ទាប់ ចាប់តាំងពីវេលាម៉ោងជិត៤ទៀបភ្លឺរហូតដល់ម៉ោង៨ព្រឹកថ្ងៃទី១៥ ខែមករា នៅទីកន្លែងផ្សេងៗគ្នា ក្នុងសង្កាត់ទូលតាឯក ក្រុងបាត់ដំបង ។
លោកកុយ ហៀង មានប្រសាសន៍ថា ថ្នាំញៀនមួយចំនួនធំត្រូវបានសមត្ថកិច្ចរឹបអូស ពេលឃាត់ខ្លួនពួកគេដំបូងនៅតាមផ្លូវ និងមួយចំនួនទៀតត្រូវបានឆែកឆេររកឃើញនៅក្នុងផ្ទះរបស់មេខ្លោងឈ្មោះ ហោ ឧត្តម ។ ប្រតិបត្តិការនេះដឹកនាំដោយលោក នួន សាន ព្រះរាជអាជ្ញាអមសាលាដំបូងខេត្ត និងលោកស្នងការខេត្ត។ ចំពោះវត្ថុតាងនានា ដែលសមត្ថកិច្ចដកហូតបានពីក្រុមជួញដូរគ្រឿងញៀនខាងលើនេះ បើតាមរបាយការណ៍បូកសរុបរបស់លោក សុខ និមល នាយស្ដីទីការិយាល័យនគរបាលប្រឆាំងគ្រឿងញៀនខេត្តឲ្យដឹងថា មានថ្នាំញៀនប្រភេទICE(ម៉ាទឹកកក)ទម្ងន់៥,៨គីឡូក្រាម ។
ក្រៅពីនេះ នៅមានថ្នាំញៀនប្រភេទផ្សេងៗមួយចំនួនទៀត ជញ្ជីងសម្រាប់ថ្លឹងគ្រឿងញៀនចំនួន២ រថយន្ត២គ្រឿង ម៉ូតូ១គ្រឿង និងសម្ភារវេចខ្ចប់ថ្នាំញៀនមួយចំនួនទៀត ។ លោក សុខ និមល បញ្ជាក់ថា ការសាកសួរក្រុមជនសង្ស័យបានបញ្ចប់និងកសាងសំណុំរឿងតាមនីតិវិធីរួចរាល់ហើយ ។ បើតាមគោលការណ៍
លោកស្នងការតម្រូវឲ្យការិយាល័យជំនាញបញ្ជូនជនសង្ស័យទាំង៤នាក់ រួមទាំងវត្ថុតាងនានាទៅកាន់សាលាដំបូងខេត្ត នារសៀលថ្ងៃទី១៧ ខែមករា ៕
ចែករំលែកព័តមាននេះ