ដកជើងធូបជាពិធីសែនមួយនៅក្នុងប្រពៃណីជនជាតិចិន-វៀតណាម ដែលតែងធ្វើឡើងនៅមុនថ្ងៃបុណ្យចូលឆ្នាំថ្មីរបស់ពួកគេឈានចូលមកដល់ ដែលឆ្នាំ២០២០នេះ ថ្ងៃសែនដកជើងធូបនឹងត្រូវធ្វើឡើងនៅថ្ងៃសៅរ៍ ទី១៨ ខែមករា ។ ពិធីសែនដកជើងធូបនេះ ត្រូវបានធ្វើឡើងចន្លោះពី៥ថ្ងៃ និង៧ថ្ងៃ មុនថ្ងៃចូលឆ្នាំថ្មីប្រពៃណីចិននិងវៀតណាម ។
ម្ចាស់ផ្ទះបានឱកាសនេះ ដកសំអាតទីរានទេវតា ទិញឬប្តូររានថ្មី សំអាតបាញ់ទឹកអប់ ទីកុងម៉ានិងជំនាង ទីអ្នកថែរក្សាដូចជា អ្នកមហាសេនាផ្សេងៗក្នុងផ្ទះ ដោយរើ យកជើងធូបចាស់ចេញ លាងសម្អាតផើង កំប៉ុងដើម្បីត្រៀមរៀបចំទទួលកុងម៉ា ទេវតាឆ្នាំថ្មី ។
មុនពេលដកជើងធូបដើម្បីរៀបចំសម្អាតយើងអាចនិយាយដឹងគុណ អរគុណ ហើយសែនប្រមាណជាមួយសប្តាហ៍មុនថ្ងៃចូលឆ្នាំចិនជារៀងរាល់ឆ្នាំ ដោយអាចដាក់តង្វាយជាផ្លែឈើ បង្អែមមាននំអ៊ី ឬនំឡើង នំអាកោជាដើម ដោយហោចទៅសូម្បីទឹកតែលាយស្ករក៏បានមិនថ្វីទេ ។
បន្ទាប់មក ត្រូវរៀបចំផេះឬដីខ្សាច់ដាក់ផើង ឬកំប៉ុងឡើងវិញ ហើយបាញ់ទឹកអប់ ម្សៅ និងរក្សាទុកជើងធូប៥សរសៃនៅតាមអាសនៈព្រះនិងទេវតា ចំណែក ៣សរសៃនៅទីបុព្វការីជន ។ បន្ទាប់ពីនោះគេមិនចាំបាច់អុជធូបឬផ្លាស់ទឹកអ្វីទាំងអស់រហូតដល់សែនចូលឆ្នាំថ្មីតែម្តង។
តាមទម្លាប់ប្រពៃណីជនជាតិចិននិងវៀតណាមមានជំនឿថា ផើង ឬកំប៉ុងជើងធូបនីមួយៗសុទ្ធតែមានម្ចាស់ថែរក្សាដូចជា កុងម៉ា បុព្វការីជន ជំនាងផ្ទះ និងទេវតាជាដើម ។ ការដកជើងធូបចេញពីកំប៉ុងនោះៗ គេត្រូវរង់ចាំគម្រប់មួយឆ្នាំទើបហ៊ានដកចេញ តែមុននឹងដកជើងធូបនោះចេញគេត្រូវធ្វើពិធីសែនព្រេនតាមការគួរជាមុនសិន បើហ៊ានបំពានទម្លាប់នេះខ្លាចដាក់រាសី ឬមានគ្រោះកាចចង្រៃយាយី ។ ប៉ុន្តែជំនឿនេះពុំសូវមានអ្នកណាចេះបកស្រាយថាហេតុអ្វីឡើយ គឺគេគ្រាន់ដឹងថា ធ្វើតាមទម្លាប់ ។
ជារួមមកពិធីសែនដកជើងធូបនេះបានសេចក្តីថា គឺសែនអរគុណ និងជូនដំណើរកុងម៉ា បុព្វការី និងទេវតាដែលរក្សាយើងបានចម្រុងចម្រើនឱ្យត្រឡប់ទៅឋានសួគ៌វិញ ហើយក៏ដកជើងធូបចេញពីកំប៉ុងដើម្បីយកកំប៉ុងជើងធូបនោះទៅលាងសម្អាតត្រៀមដោតជើងធូបថ្មីបន្តទៀត ។ សាន សារិន
ចែករំលែកព័តមាននេះ