រាជធានីភ្នំពេញ ៖ ថ្នាក់ដឹកនាំក្រសួងកិច្ចការនារីបានឲ្យដឹងថានាពេលបច្ចុប្បន្ននេះ សហគ្រិនស្ត្រីកម្ពុជាក៏មិនខុសគ្នាពីសហគ្រិនស្ត្រីនៅលើពិភពលោកនេះដែរ គឺនៅតែមានផលវិបាកនៅក្នុងមុខជំនួញរបស់ខ្លួន ។ ជាក់ស្តែងនៅកម្ពុជា សហគ្រិនស្ត្រីកម្ពុជាបច្ចុប្បន្ននេះមានប្រមាណ ៦៥,១ ភាគរយនៃសហគ្រិនសរុបក្នុងប្រទេសកម្ពុជា ដូច្នេះហើយរាជរដ្ឋាភិបាលត្រូវបង្កើនការយកចិត្តទុកដាក់ចំពោះសហគ្រិនស្ត្រីកម្ពុជា ដើម្បីអោយស្ត្រី ចូលរួមក្នុងអភិវឌ្ឍន៍សេដ្ឋកិច្ច និងសង្គមកម្ពុជាកាន់តែខ្លាំងថែមទៀត ។
ថ្លែងនៅក្នុងសិក្ខាសាលាស្តីពី «ការលើកកម្ពស់ចំណេះដឹងផ្នែកហិរញ្ញវត្ថុដល់ស្ត្រី និងសហគ្រិនស្ត្រី» នៅសណ្ឋាគារកាំបូឌីយ៉ាណា កាលពីព្រឹកថ្ងៃទី១៦ ខែមករា ឆ្នាំ២០២០ ម្សិលមិញ នេះ លោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានមានប្រសាសន៍ថា បច្ចុប្បន្ននេះ ក្នុងអាជីវកម្មខ្នាតតូច និងមធ្យមជាពិសេសសហគ្រិននៅកម្ពុជា ភាគច្រើនជាស្ត្រី ហើយស្ត្រីមានផលវិបាកច្រើន ក្នុងការអភិវឌ្ឍន៍សហគ្រាស និងអាជីវកម្មរបស់ពួកគេ ដូច្នេះហើយ ក្នុងនាមរាជរដ្ឋាភិបាលកម្ពុជា ត្រូវរិះរកវិធីសាស្ត្រក្នុងការលើកកម្ពស់សមភាពយេនឌ័រ ពោលគឺត្រូវជួយអភិវឌ្ឍន៍ ដល់សហគ្រិនជាស្ត្រី អោយមានភាពប្រកួតប្រជែងជាមួយសហគ្រិនជាបុរសដែរ ។
លោកជំទាវបានបន្តថា « ក្នុងចំណោមសហគ្រាសដែលជាមានស្ត្រីជាម្ចាស់ភាគច្រើននៅកម្ពុជាគឺកំពុងស្ថិតនៅក្នុងសេដ្ឋកិច្ចក្រៅប្រព័ន្ធ និងសហគ្រាសខ្នាតតូចៗដែលងាយប្រឈមនឹងបញ្ហាក៏ដូចជាឧបសគ្គជាច្រើន នៅក្នុងប្រតិបត្តិការធុរកិច្ចរបស់ខ្លួន ដូចជាការមិនទទួលការគាំទ្រផ្នែកហិរញ្ញវត្ថុ ជំនាញ និងចំណេះដឹងថ្មីៗក្នុងការអភិវឌ្ឍធុរកិច្ចក៏ដូចជាការទទួលបាននូវការការពារពីច្បាប់នៅមានកម្រិតនៅឡើយ » ។ លោកជំទាវនាវ ច័ន្ទថានា ទេសាភិបាលរងនៃធនាគារជាតិនៃកម្ពុជា បានមានប្រសាសន៍ថា បច្ចុប្បន្ននេះ ប្រជាជនកម្ពុជាប្រមាណ៥៩ភាគរយទទួលបានសេវាហិរញ្ញវត្ថុប្រើប្រាស់ ក្នុងនោះ ១៧% ពីគ្រឹះស្ថានធនាគារ និង៤២% ពីគ្រឹះស្ថានមីក្រូហិរញ្ញវត្ថុផ្សេងៗ ១២% ទទួលបានសេវាកម្មហិរញ្ញវត្ថុក្រៅផ្លូវការ ២៩% ទៀតទទួលបានសេវាកម្មហិរញ្ញវត្ថុផ្លូវការ ។ លោកជំទាវបានបន្តថា ការលើកកម្ពស់បរិយាប័ន្នហិរញ្ញវត្ថុនៅកម្ពុជា នៅមានបញ្ហាមួយចំនួនដូចជាឧបសគ្គ ក្នុងការទទួលបានសេវាហិរញ្ញវត្ថុ ដោយសារតែប្រាក់ចំណូលនៅមានកម្រិត ខ្វះខាតចំណេះដឹងផ្នែកហិរញ្ញវត្ថុ និងកង្វះអ្នកវិភាគក្នុងការបំពេញតាមលក្ខខណ្ឌនានា ។
លោកជំទាវបានមានប្រសាសន៍បន្ថែមថា « ដើម្បីដោះស្រាយបញ្ហាប្រឈមទាំងនេះ រាជរដ្ឋាភិបាលបានអនុម័តយុទ្ធសាស្ត្រ ស្ដីពីបរិយាប័ន្នហិរញ្ញវត្ថុ ឆ្នាំ ២០១៩ ឆ្នាំ ២០២៤ ។ យុទ្ធសាស្ត្រនេះនឹងអាចជួយដល់សហគ្រិនស្ត្រី នៅកម្ពុជា ក្នុងដោះស្រាយនូវបញ្ហាហិរញ្ញវត្ថុ និងអាចជួយអោយសហគ្រិនស្ត្រី អោយមានការអភិវឌ្ឍខ្លួនកាន់តែខ្លាំងថែមទៀត និងបានចូលរួមក្នុងការអភិវឌ្ឍប្រទេសកាន់តែច្រើនផងដែរ » ។
លោកស្រីជុំ ម៉ូនីកា អ្នកគ្រប់គ្រងក្រុមហ៊ុនហិរញ្ញវត្ថុអន្តរជាតិ វីសាប្រចាំប្រទេសកម្ពុជាបានអោយដឹងថា ក្រុមហ៊ុនមានចក្ខុវិស័យមួយ គឺដើម្បីជួយដល់ស្ត្រីកម្ពុជាក្នុងការអភិវឌ្ឍអាជីវកម្មរបស់ខ្លួន ហើយក្រុមហ៊ុននឹងជួយផ្នែកហិរញ្ញវត្ថុ និងចំណេះដឹងផ្នែកហិរញ្ញវត្ថុ ដល់សហគ្រិនស្ត្រី និងមួយទៀតនោះ ក្រុមហ៊ុននឹងយកចំណេះដឹងពីជុំវិញពិភពលោកមកចែករំលែកដល់សហគ្រិនស្ត្រីកម្ពុជា ដើម្បីអោយការធ្វើអាជីវកម្មរបស់ពួកគាត់កាន់តែលូតលាស់ ។
លោកតាមប្រសាសន៍លោក ចម ប្រសិទ្ធទេសរដ្ឋមន្ត្រី និងជារដ្ឋមន្ត្រីក្រសួងឧស្សាហកម្មនិងសិប្បកម្មបានអោយដឹងកន្លងមកថា បច្ចុប្បន្ននេះសហគ្រាសទាំងធំទាំងតូច និងមធ្យមក្ដីនៅកម្ពុជា មានប្រមាណដល់ជាង៥០ម៉ឺនសហគ្រាស ក៏ប៉ុន្តែមានសហគ្រាសតែប្រមាណ ៥% ប៉ុណ្ណោះដែលបានចុះបញ្ជីក្នុងក្រសួងត្រឹមត្រូវ ដូច្នេះអ្នកដែលមិនបានចុះបញ្ជីពិតណាស់ប្រាកដជាពិបាកក្នុងការស្វែងរកហិរញ្ញវត្ថុ និងបច្ចេកទេសដើម្បីអភិវឌ្ឍន៍អាជីវកម្មរបស់ខ្លួន ៕ កែមសម្រួលដោយ ៖ សុឃាក់
ចែករំលែកព័តមាននេះ