ពេលដែលមនុស្សម្នាក់ចង់ជោគជ័យក្នុងការងារ ពួកគេតែងតែផ្តោតស្មារតី និងកម្លាំងច្រើនពេញទៅលើប្រភពដទៃដែលជួយឲ្យពួកយើងឈានមុខ ដូចជាការទទួលស្គាល់ពីមនុស្សជុំវិញខ្លួនជាដើម ។ ប៉ុន្តែអ្វីដែលពួកយើងភាគច្រើនភ្លេចគឺការគាំទ្រខ្លួនឯង ។ តើអ្នកត្រូវធ្វើអ្វីខ្លះដើម្បីក្លាយជាអ្នកគាំទ្រខ្លួនឯង?
១. ហ៊ានចូលរួមគំនិតក្នុងការប្រជុំផ្សេងៗ៖
ក្នុងករណីមួយចំនួន អ្នកត្រូវតែចែករំលែកគំនិតដែលអ្នកមានឲ្យបានច្រើនដងនិងឲ្យបានឆ្លាតវៃ ។ បុគ្គលិកដែលតែងតែអង្គុយស្ងៀមៗក្នុងបន្ទប់ប្រជុំអាចបង្ហាញថាមនុស្សម្នាក់នោះមិនយកចិត្តទុកដាក់ ឬមិនសកម្មក្នុងការងារដែលអាចធ្វើឲ្យពួកគេបាត់បង់ឱកាសការងារជាច្រើន ។ ដោយហេតុដូចនេះ អ្នកត្រូវតែហ៊ានចេញមុខចូលរួមរាល់ស្ថានការដែលអ្នកគិតថាអ្នកមានអ្វីដែលចង់ចែករំលែក ។ ប្រសិនបើអ្នកមិនមែនជាមនុស្សដែលចូលចិត្តវាទេនោះ អ្នកត្រូវតែរៀនធ្វើវារហូតដល់វាក្លាយជារឿងសាមញ្ញមួយ ។
២. លើកដៃ៖
ក្នុងនាមជាអ្នកដឹកនាំមួយរូប អ្នកត្រូវតែចេះលើកដៃនិងបង្ហាញពីវត្តមានរបស់អ្នកក្នុងបន្ទប់ ។ អ្នកមិនត្រូវរងចាំរហូតមានមនុស្សចុចឈ្មោះសួរអ្នកផ្ទាល់ ឬអញ្ជើញអ្នកឲ្យនិយាយអ្វីមួយទេ ។ ជាមួយគ្នានេះផងដែរ អ្នកត្រូវតែចេះប្រាប់ពីអ្នកដទៃពីអ្វីដែលអ្នកចង់បាន ។
៣. រកអ្នកណែនាំ ឬអ្នកឧបត្ថម្ភ៖
អ្នកណែនាំផ្លូវគឺជាមនុស្សដ៏សំខាន់ប្រសិនបើអ្នកចង់ជោគជ័យក្នុងការងាររបស់អ្នក ។ ពួកគេជាមនុស្សដែលនឹងផ្តល់ដំបូន្មានល្អៗសម្រាប់ការងាររបស់អ្នក ។ មនុស្សម្នាក់ទៀតដែលអាចជួយអ្នកបានគឺអ្នកឧបត្ថម្ភ ដែលជាមនុស្សដែលវិនិយោគផ្ទាល់លើមនុស្សដែលមានសក្តានុពល ។ អ្នកឧបត្ថម្ភអាចជួយបើកផ្លូវ ផ្តល់ការណែនាំ និងជួយអភិវឌ្ឍន៍បុគ្គលម្នាក់ទៀតបានសម្រាប់ការងារដើម្បីប្តូរយកមេរៀនសំខាន់ៗពីមនុស្សដែលខ្លួនកំពុងតែជួយដូចជាទស្សនៈថ្មីៗ ឬជំនាញថ្មីៗជាដើម ។
អ្នកអាចរកអ្នកទាំងនេះបានដោយចូលរួមក្នុងគម្រោង ឬឱកាសដែលអនុញ្ញាតឲ្យអ្នកចែករំលែកបទពិសោធន៍ និងជំនាញរបស់អ្នកបានច្រើន បន្ទាប់មកអ្នកត្រូវកសាងទំនាក់ទំនងជាមួយនឹងអ្នកដឹកនាំដែលអាចជួយអ្នកបានក្នុងការងារ ៕ កែសម្រួលដោយ ៖ សុឃាក់
ចែករំលែកព័តមាននេះ