រាជធានីភ្នំពេញ ៖ មិនខុសពីការប្រកួតអន្តរជាតិកាលពីថ្ងៃសៅរ៍ សម្រាប់ការប្រកួតអន្តរជាតិនៅល្ងាចថ្ងៃអាទិត្យទី១៩ មករា នៅសង្វៀនទូរទស្សន៍អាស៊ីអាគ្នេយ៍ក៏មានវត្តមានកីឡាករកម្ពុជា និងថៃសរុបចំនួន៤រូបប៉ះគ្នាផងដែរ ។ កីឡាករកម្ពុជា២រូបគឺ សូត្រ…
រាជធានីភ្នំពេញ ៖ មិនខុសពីការប្រកួតអន្តរជាតិកាលពីថ្ងៃសៅរ៍ សម្រាប់ការប្រកួតអន្តរជាតិនៅល្ងាចថ្ងៃអាទិត្យទី១៩ មករា នៅសង្វៀនទូរទស្សន៍អាស៊ីអាគ្នេយ៍ក៏មានវត្តមានកីឡាករកម្ពុជា និងថៃសរុបចំនួន៤រូបប៉ះគ្នាផងដែរ ។ កីឡាករកម្ពុជា២រូបគឺ សូត្រ ប៊ុនធី ដែលទើបសម្រេចចិត្តប្រើឈ្មោះពិតសួន ចាន់នី ជំនួសវិញ និងកីឡាករ ខាំ ខ្លានាង កំពុងរង់ចាំស្វាគមន៍កីឡាករថៃ២រូបដែលសុទ្ធតែជាជើងខ្លាំងដូចគ្នា ។
ការប្រកួតដែលនឹងធ្វើឡើងចាប់ពីម៉ោង៥និង៣០នាទីល្ងាចស្អែកនេះ ត្រូវបានលោកញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា២រូបដែលមានឈ្មោះឡើងប្រកួតមិត្តភាពអន្តរជាតិក្នុងព្រឹត្តិការណ៍ប្រដាល់នោះ សួន ចាន់នី គឺជាកីឡាករជើងខ្លាំងម្នាក់ដែលលោករំពឹងខ្ពស់សម្រាប់ការប៉ះគ្នា ដោយសារតែគេទើបផ្ដួលកីឡាករជើងខ្លាំងថៃមួយចំនួនរួចមកហើយ ។
បើទោះជាគេត្រូវប្រឈមនឹងកីឡាករថៃល្អសម្រាប់ការប្រកួតលើកនេះ តែម្នាក់ៗនៅតែមានទំនុកចិត្តចំពោះសមត្ថភាពរបស់កីឡាករកម្ពុជារូបនេះភាគច្រើន ។ គេត្រូវ ប៉ះប្រកួតជាមួយកីឡាករថៃឈ្មោះ Fa Nimith ក្នុងនាមជាគូឯក ហើយភាគីម្ខាងៗពិតជាចង់ឈ្នះខ្លាំងណាស់ដោយសារអ្នកណាឈ្នះក្រៅពីបានមុខមាត់ និងទឹកប្រាក់តម្លៃខ្លួនខ្ពស់ជាងក្នុងនាមជាអ្នកឈ្នះក៏បានទទួលទំនុកចិត្តពីអ្នកគាំទ្រជាងមុនបន្ថែម ។ ប៉ុន្តែបើការប្រកួតនេះ បែរជាចាញ់ព្រោះតែប្រកួតមិនបានល្អវិញមិនខុសពីត្រូវបាក់មុខ និងរងការរិះគន់ពីអ្នកគាំទ្រនោះទេ។
លោកជឿជាក់ថា កីឡាករកម្ពុជាគូនេះនឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ហើយពិតជាបើកការប្រកួតមិនលាក់ដៃដើម្បីជៀសផុតពីការរិះគន់ណាមួយមិនខាន។ អ៊ីចឹងហើយទើបលោកយល់ថា ជំនួបរវាងជើងខ្លាំង សួន ចាន់នី ឬសូត្រ ប៊ុនធី ជាមួយកីឡាករថៃជាដៃគូនឹងមិនធម្មតាសម្រាប់ការប្រកួតទាំងមូល ដោយសារតែភាគីខាងណាក៏មិន ចង់បាក់មុខ ។
យោងតាមប្រវត្តិប្រកួតលោកថា កីឡាករកម្ពុជាធ្លាប់ប្រកួតបាន១១០លើក ឈ្នះ៨៤លើក ចាញ់២២លើក និងស្មើ៤លើក ខណៈកីឡាករថៃប្រកួតបានតិចជាងគឺបានត្រឹមតែ៧៨លើក ឈ្នះ៦៣លើក ចាញ់១៤លើក និងស្មើ១លើក តែគេខ្លាំងនាពេលចុងក្រោយខណៈកីឡាករកម្ពុជារាងធ្លាក់ដៃជាងមុន។
សម្រាប់កីឡាករជើងខ្លាំងមួយរូបទៀត គឺខាំ ខ្លានាង ត្រូវគណៈកម្មការផ្គូផ្គងឱ្យប៉ះប្រកួតជាមួយកីឡាករថៃLa Fan ក្នុងនាមជាគូរងឯក ។ លោកថា ការប្រកួតរបស់ពួកគេនៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលកីឡាករកម្ពុជារូបនេះនៅតែមានក្រេឌីត តែពិបាកទុកចិត្តពីភាពខ្លាំង១០០ភាគរយ ដោយសារកីឡាករថៃក៏មានសមត្ថភាពមិន ធម្មតា ។
លោកយល់ថា កីឡាករថៃជាដៃគូខ្លាំងម្នាក់ តែគេក៏មិនទាន់ប្រាកដដូចគ្នាថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះដែរ ដោយសារតែបទពិសោធន៍ប្រហាក់ប្រហែលគ្នា ។ កីឡាករកម្ពុជាធ្លាប់ប្រកួតផ្លូវការបាន៩៥លើក ឈ្នះ៧៤លើក ចាញ់១៧លើក និងស្មើ៤លើក ខណៈកីឡាករថៃប្រកួតបានដល់៥៥លើក ឈ្នះ៤០លើក ចាញ់១៥លើក និងមិនដែលស្មើ ៕ (កែសម្រួលដោយ ៖ បុប្ផា)
ចែករំលែកព័តមាននេះ