រាជធានីភ្នំពេញ ៖ កម្មវិធីប្រដាល់«កម្ពុជាសង្វៀនគុនខ្មែរ»រដូវកាលទី៣នឹងចាប់ផ្ដើមបើកការប្រកួតជាផ្លូវការនៅលើសង្វៀនទូរទស្សន៍ ស៊ីអិនស៊ី នាថ្ងៃសៅរ៍ ទី១៨ មករា នេះ។
ការប្រកួតលើកនេះធ្វើឡើងក្នុងប្រភេទទម្ងន់៦០គីឡូក្រាមក្រោមការឧបត្ថម្ភផ្ដាច់មុខដោយក្រុមហ៊ុនស្រាបៀរកម្ពុជា ។ សម្រាប់ការប្រកួតនៅជុំទី១នេះមានកីឡាករកម្ពុជា២នាក់និងកីឡាករថៃ២នាក់ឡើងសង្វៀនដណ្ដើមយកចំណាត់ថ្នាក់លេខ១ដើម្បីទទួលបានឱកាសឡើងទៅប្រកួតនៅវគ្គបន្តយករង្វាន់ម៉ូតូZoomer X១គ្រឿង និងទឹកប្រាក់៥០០ដុល្លារ ។
ចំណែកសមាសភាពកីឡាករដែលត្រូវមានមុខប្រកួតលើកនេះមាន កីឡាករ រ៉ែន រាជ មកពីក្លិបអង្គរមានជ័យខេត្តសៀមរាប ប្រកួតជាមួយកីឡាករថៃ ផេតក្រៀងក្រៃ ត.សិលាឆ័យ និងកីឡាករ អេលីត សាន់ មកពីក្លិបប៉ែនកាក់គុនខ្មែរ ប្រកួតជាមួយកីឡាករថៃ វិតថៈយៈយុទ្ធ និធិតណាយក្វាម។
នៅក្នុងការប្រកួតលើកនេះ កីឡាករ រ៉ែន រាជ ដែលមានប្រភពមកពីខេត្តសៀមរាប ហាក់មានជំនឿចិត្តយ៉ាងខ្លាំងក្នុងការយក ឈ្នះការប្រកួតវគ្គជម្រុះជុំដំបូង ។ ប៉ុន្តែអ្នកគាំទ្រ មួយចំនួនបានបង្ហាញក្ដីបារម្ភ ដោយសារតែ កីឡាករថៃជាគូប្រកួតក៏មានវិជ្ជាគុនខ្លាំងមិន ធម្មតា និងធ្លាប់មកប្រកួតនៅលើសង្វៀនស្រុកខ្មែររាប់ភ្លេចគ្រាន់តែមិនធ្លាប់ជួបប្រកួតជាមួយកីឡាករ រ៉ែន រាជ ប៉ុណ្ណោះ ដូច្នេះមានតែរង់ចាំ អ៊ុតមើលការប្រកួតជាក់ស្ដែងប៉ុណ្ណោះអ្នកណា ខ្លាំងជាងអ្នកណាគង់តែដឹងទេ។
មួយគូទៀតកីឡាករ អេលីត សាន់ ដែល ប៉ះជាមួយកីឡាករថៃ វិតថៈយៈយុទ្ធ និធិត ណាយក្វាមវិញត្រូវគេរំពឹងថា នឹងធ្វើឱ្យសង្វៀនប្រដាល់កាន់តែកក្រើកខ្លាំងមិបខាន ដោយសារ កីឡាករទាំងពីរសុទ្ធតែជាជើងខ្លាំងនៅក្នុងពិភពប្រដាល់ដូចគ្នា ។ កីឡាករថៃធ្លាប់មកប្រកួតនៅសង្វៀនស្រុកខ្មែររាប់ភ្លេចថែមទាំងយកឈ្នះកីឡាករកម្ពុជាជាច្រើននាក់ទៀតផង ។ ដូច្នេះ អេលីត សាន់ បើមិនបានត្រៀមខ្លួនទុកមុនទេអាចនឹងជួបសំណាងអាក្រក់មិខាន។
ចំណែកគូប្រកួតមិត្តភាពវិញ កីឡាករ ឡុង សំណាង មកពីក្លិបសាលវ័ន្តកីឡា ប្រកួតជាមួយកីឡាករថៃ យ៉តកុស៊ុន ច.ថាក់វិឆ័យ ក្នុងប្រភេទទម្ងន់៦៣,៥គីឡូក្រាម និងកីឡាករ សេក គឹម រួន មកពីក្លិបអង្គរមានជ័យខេត្តសៀមរាប ប្រកួតជាមួយកីឡាករ ខាំ សូរីយ៉ា មកពីក្លិបរ៉ាហាប់ស្វាយប៉ាក៕ (កែសម្រួលដោយ ៖ បុប្ផា)
ចែករំលែកព័តមាននេះ