រាជធានីភ្នំពេញ ៖ បុគ្គលិកផ្ទះសំណាក់បានប្រទះឃើញស្ត្រីជនជាតិខ្មែរម្នាក់សន្លប់ស្តូកស្តឹង ហើយត្រូវបានបុរសជាជនជាតិចិនម្នាក់បីដាក់ចូលក្នុងគូទរថយន្ត ក្នុងគោលបំណងបើកចេញពីផ្ទះសំណាក់ ប៉ុន្តែត្រូវបានបុគ្គលិកផ្ទះសំណាក់ប្រាប់ម្ចាស់ផ្ទះសំណាក់ដើម្បីទូរស័ព្ទរាយការណ៍ទៅសមត្ថកិច្ចខណ្ឌជ្រោយចង្វារចុះមកធ្វើការឃាត់ខ្លួនជនសង្ស័យបានភ្លាមៗដើម្បីយកទៅសួរនាំ ។
ហេតុការណ៍ខាងលើនេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី១៦ ខែមករា ឆ្នាំ២០២០ នៅចំណុចផ្ទះសំណាក់មហាលាភ តាមបណ្តោយផ្លូវជាតិលេខ៦ ស្ថិត ក្នុងសង្កាត់ព្រែកលៀប ខណ្ឌជ្រោយចង្វារ។
ស្ត្រីរងគ្រោះជាជនជាតិខ្មែរមិនត្រូវបានស្គាល់អត្តសញ្ញាណនោះទេ ចំណែកជនសង្ស័យជាជនជាតិចិនក៏មិនស្គាល់អត្តសញ្ញាណផងដែរ ។
តាមប្រភពព័ត៌មានពីសមត្ថកិច្ចប៉ុស្តិ៍ព្រែកលៀបបានអោយដឹងថា មុនពេលកើតហេតុ គឺមានម្ចាស់ផ្ទះសំណាក់មហាលាភ សុំមិនបញ្ចេញឈ្មោះបានទូរស័ព្ទរាយការណ៍ប្រាប់ថា មានបុរសម្នាក់ជាជនជាតិចិនមិនស្គាល់អត្តសញ្ញាណនោះទេ អាយុជាង៤០ឆ្នាំ បានមកជួលផ្ទះសំណាក់របស់គាត់ចំនួន១ម៉ោង ហើយគាត់ក៏បានបើកបន្ទប់ជួលលេខ២១៣ ឱ្យបុរសជនជាតិចិននោះចូលទៅសំរាកជាមួយនិងស្ត្រីខ្មែរម្នាក់មិនស្គាល់អត្តសញ្ញាណនោះទេ ។
តាមប្រភពដដែលបានបន្តថា រហូតជិតដល់ម៉ោងកំណត់ ក៏ស្រាប់តែបុគ្គលិកក្នុងផ្ទះសំណាក់បានប្រទះឃើញបុរសជនជាតិចិនបីស្ត្រីរងគ្រោះចុះមកក្រោម ហើយដាក់ចូលក្នុងគូទរថយន្តមួយគ្រឿង ម៉ាកកាមរីហាយប្រ៊ីដ ពណ៌ស ពាក់ស្លាកលេខ ភ្នំពេញ ២AV-៨៤៩១ ទាំងស្ថានភាពរបស់ស្ត្រីរងគ្រោះសន្លប់ហើយមុខឡើងស្វាយ ទើបម្ចាស់ផ្ទះសំណាក់ទូរស័ព្ទប្រាប់សមត្ថកិច្ច និងឃាត់មិនឲ្យចេញទៅណា។
តាមប្រភពពីសមត្ថកិច្ចបានបញ្ជាក់ថា ដោយសារឃើញស្ត្រីរងគ្រោះមានស្នាមពកចំមុខថែមទៀត ទើបពេលភ្លាមនោះបុគ្គលិករបស់ផ្ទះសំណាក់ធ្វើការហាមឃាត់មិនអោយបុរសជនជាតិចិនបើករថយន្តចេញនោះទេ គឺរង់ចាំសមត្ថកិច្ចប៉ុស្តិ៍ព្រែកលៀបមកដល់ដើម្បីសួរនាំអោយដឹងរឿងហេតុសិន ចាំបើករថយន្តចេញទៅ ប៉ុន្តែបុរសជនជាតិចិននោះនៅតែបើករថយន្តគេចចេញពីផ្ទះសំណាក់រហូតទៅដល់ផ្លូវបេតុងក្បែរនឹងរង្វង់មូលនាងមច្ឆា ដែលស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ ក៏ត្រូវសមត្ថកិច្ចឃាត់បានទាំងបុរសជនជាតិចិន និងស្ត្រីរងគ្រោះ ។
ពាក់ព័ន្ធនឹងករណីខាងលើនេះគេមិនដឹងថា បុរសជនជាតិចិននោះចង់ផ្តាច់ជីវិតរបស់ស្ត្រីជនជាតិខ្មែរ ឬមួយយ៉ាងណានោះទេ បានជាសន្លប់ស្តូកស្តឹងអត់ដឹងខ្លួនទល់តែសោះ លុះបានមួយសន្ទុះក្រោយមកក៏មានរថយន្តសង្គ្រោះរបស់គ្លីនិកឯកជនបានមកដល់កន្លែងកើតហេតុ តែស្ថានភាពរបស់ស្ត្រីរងគ្រោះធ្ងន់ធ្ងរពេក ក៏ត្រូវបានបញ្ជូនបន្តទៅកាន់មន្ទីរពេទ្យកាលម៉ែត ។
តាមប្រភពព័ត៌មានពីសមត្ថកិច្ចបានបញ្ជាក់បន្តទៀតថា បន្ទាប់ពីធ្វើការសាកសួរ បុរសជនជាតិចិននោះបាននិយាយថា មកពីស្ត្រីរងគ្រោះប្រច័ណ្ឌ ហើយលេបថ្នាំប៉ុនប៉ងបញ្ចប់ជីវិតប៉ុន្មានដងមកហើយ ប៉ុន្តែមិនបានសម្រេច ទើបកើតចេញជារឿងបែបនេះឡើងតែម្តង ។
ក្រោយពេលកើតហេតុ ជនសង្ស័យជាជនជាតិចិនខាងលើនេះត្រូវបានសមត្ថកិច្ចជំនាញធ្វើការឃុំខ្លួនជាបណ្តោះអាសន្ន រង់ចាំព្រឹកថ្ងៃទី១៧ មករា ទើបសួរនាំជាបន្តទៅទៀត ៕ (កែសម្រួលដោយ ៖ ធីតា)
ចែករំលែកព័តមាននេះ