រាជធានីភ្នំពេញ ៖ តាមរយៈវេទិការសាធារណប្រជាពលរដ្ឋនៅក្នុងខេត្តព្រះសីហនុបានស្នើដល់ក្រុមការងារថ្នាក់ជាតិចុះមូលដ្ឋានខេត្តដោះស្រាយចំនួន៥ចំណុច ។ យោងតាមបណ្តាញសង្គមរបស់ក្រុមការងារចុះជួយខេត្តព្រះសីហនុបានឲ្យដឹងថា ប្រធានក្រុមការងារថ្នាក់ជាតិចុះមូលដ្ឋានខេត្តព្រះសីហនុដឹកនាំក្រុមការងារចុះពិនិត្យស្ថានភាពជីវភាព និងការអភិវឌ្ឍក្រុងកោះរ៉ុង នាថ្ងៃទី១៦ ខែមករានេះ ។
លោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមការងារថ្នាក់ជាតិចុះមូលដ្ឋានខេត្តព្រះសីហនុរួមជាមួយលោក គួច ចំរើន អភិបាលនៃគណៈអភិបាលខេត្តព្រះសីហនុបានដឹកនាំក្រុមការងារចុះពិនិត្យស្ថានភាពជីវភាព និងការអភិវឌ្ឍក្រុងកោះរ៉ុង ។ ក្នុងឱកាសនោះដែរ លោករដ្ឋមន្ត្រីបានដឹកនាំធ្វើវេទិកាសាធារណៈដែលមានការចូលរួមពីប្រជាពលរដ្ឋ មន្ត្រីរាជការ កម្លាំងប្រដាប់អាវុធ និងអាជ្ញាធរ មូលដ្ឋានប្រមាណជិត៣០០នាក់ ។
វេទិការនេះបានលើកឡើងពីបញ្ហាប្រឈមមួយចំនួន និងការសំណូមពរដោយលោកអភិបាលក្រុង ចៅសង្កាត់ និងប្រជាពលរដ្ឋដែលរួមមាន ១.សុំការដោះស្រាយពីបញ្ហាដីធ្លីរបស់ប្រជាជនដែលពួកគាត់បានរស់នៅអាស្រ័យផលជាក់ស្ដែង ។ ២.ស្នើសុំបង្កើតគណៈកម្មាធិការក្នុងការកំណត់ព្រំដីសាធារណៈរបស់រដ្ឋ និងដីកម្មសិទ្ធិរបស់ប្រជាពលរដ្ឋ ដើម្បីរដ្ឋបាលសង្កាត់ងាយស្រួលនៅក្នុងការទប់ស្កាត់ការទន្ទ្រានបន្ថែមទៀត ។ ៣.ស្នើសុំជួយសាងសង់អាងប្រព្រឹត្តិកម្មទឹកកខ្វក់នៅតាមភូមិ និងឆ្នេរនីមួយៗ ដែលមានអាជីវកម្មស្រាប់ ដើម្បីបញ្ជៀសកាកសំណល់រាវហូរចូលសមុទ្របង្កឲ្យខូចបរិស្ថានទៅថ្ងៃអនាគត ។
៤-ស្នើសុំឡដុតសំរាមបន្ថែមសម្រាប់ដាក់គ្រប់ភូមិ និងរថយន្តដឹកសំរាម១គ្រឿង ដើម្បីងាយស្រួលក្នុងការប្រមូលសំរាមពីផ្ទះប្រជាពលរដ្ឋ និងតាមអាជីវកម្មមួយចំនួនដែលពុំមានលទ្ធភាពនៅដាក់ឡដុតសំរាមដោយខ្លួនឯង ។ ៥.ស្នើសុំដីបូជាសពមួយកន្លែង ដែលមានស្រាប់ ប៉ុន្តែដីនេះសព្វថ្ងៃមានប្រជាពលរដ្ឋកាន់កាប់ដែលមានទំហំជិត១ហិកតា ។
ជាការឆ្លើយតបនឹងសំណូមពរខាងលើ លោករដ្ឋមន្ត្រីសាយ សំអាល់ បានលើកឡើងនៅចំនុចសំខាន់ដូចជា ១. ទទួលយកនូវករណីទំនាស់ដីធ្លីបញ្ហាកម្មសិទ្ឋិដីធ្លី ដើម្បីដោះស្រាយជាមួយស្ថាប័នពាក់ព័ន្ធ ។ ២.បានដោះស្រាយសំណូមពរ និងយន្តការគ្រប់គ្រងបញ្ហាសំរាមការផ្តល់មធ្យោបាយដឹកជញ្ជូន និងឡដុតសំរាមបន្ថែមនៅលើក្រុងកោះរ៉ុង ។ ៣. បំផុសចលនាចូលរួមថែរក្សាការពារបរិស្ថាន និងធនធានធម្មជាតិ ។ ៤.ជំរុញដល់ការរៀបចំផែនការមេអភិវឌ្ឍន៍ក្រុងជាមួយស្ថាប័នពាក់ព័ន្ធ ។ ៥.ការពង្រឹងភូមិឃុំសុវត្ថិភាព នៅក្នុងមូលដ្ឋានជាពិសេសសម្រាប់ភ្ញៀវទេសចរ ។
ជាមួយគ្នានេះដែរ លោករដ្ឋមន្ត្រីក៏បានផ្ដាំផ្ញើដល់បងប្អូនប្រជាពលរដ្ឋសូមចូលរួមថែរក្សាកេរ្តិ៍ឈ្មោះដ៏ល្បីរបស់ក្រុងកោះរ៉ុ ងដែលត្រូវបានទទួលស្គាល់ដោយភ្ញៀវជាតិ និងអន្តរជាតិថា ជាទឹកដីដែលមានធនធានធម្មជាតិយ៉ាងសំបូរបែបជាមួយឆ្នេរខ្សាច់ដ៏ស្រស់ស្អាត និងទឹកសមុទ្រពណ៌ខៀវស្រងាត់ ដែលទាំងនេះបានផ្តល់ប្រយោជន៍រួមដល់ប្រជាពលរដ្ឋដែលរស់នៅក្រុងកោះរ៉ុងនេះ ៕ កែសម្រួលដោយ ៖ សុឃាក់
ចែករំលែកព័តមាននេះ