រាជធានីភ្នំពេញ ៖ សម្លៀកបំពាក់ជនរងគ្រោះនៅមន្ទីរឃុំឃាំងស-២១ បច្ចុប្បន្នជាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង នឹងធ្វើការអភិរក្ស និងរៀបចំឯកសារកាតាឡុក ដោយប្រើប្រាស់ថវិកាចំនួន ៧៥០០០ដុល្លារអាមេរិក ពីមូលនិធិឯកអគ្គរដ្ឋទូតសម្រាប់ការអភិរក្សវប្បធម៌របស់ក្រសួងការបរទេសសហរដ្ឋអាមេរិក ។…
រាជធានីភ្នំពេញ ៖ សម្លៀកបំពាក់ជនរងគ្រោះនៅមន្ទីរឃុំឃាំងស-២១ បច្ចុប្បន្នជាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង នឹងធ្វើការអភិរក្ស និងរៀបចំឯកសារកាតាឡុក ដោយប្រើប្រាស់ថវិកាចំនួន ៧៥០០០ដុល្លារអាមេរិក ពីមូលនិធិឯកអគ្គរដ្ឋទូតសម្រាប់ការអភិរក្សវប្បធម៌របស់ក្រសួងការបរទេសសហរដ្ឋអាមេរិក ។
ពិធីចុះហត្ថលេខាលើគម្រោងមួយនេះ បានធ្វើឡើងនៅថ្ងៃទី១៦ ខែមករា ឆ្នាំ២០២០ រវាងឯកអគ្គរដ្ឋទូតសហរដ្ឋអាមេរិក W. Patrick Murphy និងលោកជំទាវ ភឿង សកុណា រដ្ឋមន្ត្រីក្រសួង វប្បធម៌ និងវិចិត្រសិល្បៈ នៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ។ គម្រោងស្តីពី ការអភិរក្សវត្ថុជាតិពន្ធ នាសតវត្សទី២០ នៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែងដំណាក់កាលទី២ នៅភ្នំពេញ” រំលេចពីការខិតខំប្រឹងប្រែងរបស់សហរដ្ឋអាមេរិក ក្នុងការអភិរក្សបេតិកភណ្ឌកម្ពុជា និងបង្ហាញពីកិច្ចសហប្រតិបត្តិការ រវាងអាមេរិកជាមួយអាជ្ញាធរនានារបស់កម្ពុជា ក្នុងការចងក្រងឯកសារស្តីពីអំពើឃោរឃៅនៅសម័យខ្មែរក្រហម។
គម្រោងនេះ អនុវត្តដោយសារមន្ទីរទួលស្លែងក្រោមជំនួយបច្ចេកទេសរបស់លោកស្រី Julia Brennanជនជាតិអាមេរិក ដែលជាអ្នកជំនាញផ្នែកការងារអភិរក្សវាយនភណ្ឌ នៅទីក្រុងវ៉ាស៊ីនតោន ។ លោកស្រី Juliaនឹងជួយបណ្តុះបណ្តាលដល់បុគ្គលិកសារមន្ទីរ ឲ្យមានលទ្ធភាពអាចបន្តការងារគម្រោងដោយខ្លួនឯងបាន ។ គម្រោងអភិរក្សវាយនភណ្ឌនេះ នឹងផ្តោតទៅលើសិក្ខាសាលាបណ្តុះបណ្តាលការអភិរក្ស ការកំណត់ស្ថានភាពវត្ថុសម្រាប់អភិរក្ស ការថែទាំវត្ថុទូទៅការរៀបចងក្រងឯកសារកាតាឡុក និងជ្រើសរើសវត្ថុពីសុមច្ច័យវាយនភណ្ឌជាង៥០០០ ដែលអាចដាក់តាំងបង្ហាញបានរយៈពេលយូរ ។
គម្រោងនេះ ជាគម្រោងដំបូងគេបង្អស់ដែលប្រើបច្ចេកវិទ្យានេះ សម្រាប់ការអភិរក្សបេតិកភណ្ឌវប្បធម៌។ កាលពីឆ្នាំ២០១៧ ក្រសួងវប្បធម៌និងវិចិត្រសិល្បៈ បានទទួលថវិកាចំនួន ៥៥.៥០០ដុល្លារអាមេរិកសម្រាប់ គម្រោងអភិរក្សនាដំណាក់កាលដំបូង ។ គម្រោងនេះ ជាសមិទ្ធិផលដំបូងដែលបង្ហាញពីការខិតខំប្រឹងប្រែងរបស់ក្រុមការងារក្នុងការចងក្រងឯកសារ និងអភិរក្សសម្លៀកបំពាក់ជនរងគ្រោះមន្ទីរស-២១ ដែលរក្សាទុកនៅសារមន្ទីរអស់រយៈពេលជាច្រើនទសវត្សរ៍ ។
លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានអះអាងថា អស់រយៈកាលជិត៤០ឆ្នាំកន្លងមកនេះ សមុច្ច័យវត្ថុតាងមួយចំនួនប្រឈមនឹងការខូចខាត ជាពិសេសគឺវាយនភណ្ឌ ឬសម្លៀកបំពាក់និងរបស់ប្រើប្រាស់ប្រចាំថ្ងៃផ្សេងៗ។ ដោយមើលឃើញពីស្ថានភាពនៃការខូចខាតសម្លៀកបំពាក់របស់ជនរងគ្រោះ ក្រសួងបានខិតខំស្វែងរកដៃគូរដើម្បីផ្តល់ថវិកាជំនួយនិងអ្នកជំនាញបច្ចេកទេស។
លោកជំទាវបញ្ជាក់ថា នាអំឡុងដើមឆ្នាំ២០១៤ ក្រសួងបានណែនាំអ្នកជំនាញអភិរក្ស និងជួសជុលវាយនភណ្ឌមកពីសហរដ្ឋអាមេរិក គឺលោកស្រី ជូលា ប៊ីណិន មកជួយសិក្សា វាយតម្លៃ និងលើកគម្រោងសម្រាប់ការអភិរក្សសមុច្ច័យសម្លៀកបំពាក់ទាំងនោះ។ ជាលទ្ធផលមូលនិធិឯកអគ្គរដ្ឋទូតអាមេរិកសម្រាប់អភិរក្សលើវិស័យសម្បត្តិវប្បធម៌ បានយល់ព្រមផ្តល់ថវិកាចំនួន៥៥.៥០០ដុល្លារអាមេរិក ដើម្បីជួយគាំទ្រដល់ដំណើរការជួសជុលនិងអភិរក្សរយៈពេល១ឆ្នាំ កំឡុងឆ្នាំ២០១៨ ។ បើតាមលោកជំទាវ ភឿង សក្កុណា ក្រោយពេលទទួលបានការផ្តល់ថវិកា សារមន្ទីរបានអនុវត្តការងារអភិរក្សវាយនភណ្ឌ បានចំនួន៨៣៦វត្ថុ បំណែកក្រណាត់ចំនួន២១កេស និងការរៀបចំទុកដាក់វាយនភណ្ឌទាំងអស់នោះនៅក្នុងឃ្លាំងសរុបទាំងអស់មានចំនួន៦៧កេស ក្នុងដំណាក់កាលទី១។
ចំណែកការអភិរក្សដំណាក់កាលទី២ នឹងចាប់ផ្តើមអនុវត្តក្នុងខែមករា ឆ្នាំ២០២០នេះ។ លោកជំទាវ បន្ថែមថា ក្រោយទទួលបានលទ្ធផលជោគជ័យ លើគម្រោងអភិរក្សវាយនភណ្ឌនៅដំណាក់កាលទី១ ក្នុងឆ្នាំ២០១៨សារមន្ទីរទួលស្លែង បានរៀបចំស្នើសុំថវិកាចំនួន ៧៥.០០០ ដុល្លាអាមេរិក ពីមូលនិធិឯកអគ្គរដ្ឋទូតអាមេរិកសម្រាប់អភិរក្សវិស័យសម្បត្តិវប្បធម៌ ដើម្បីបន្តអនុវត្តគម្រោងនេះ នាដំណាក់កាលទី២ ចាប់ពីខែមករាឆ្នាំ២០២០នេះតទៅ។
គម្រោងនាដំណាក់កាលទី២នេះ នឹងផ្តោតទៅលើវាយនភណ្ឌនៅជាន់ផ្ទាល់ដីនៃសាលពិព័រណ៍អគារខ្ញុំ” ដែលសម្លៀកបំពាក់ទាំងនោះ ដាក់តាំងគរលើគ្នាក្នុងទូ អស់រយៈកាលជាង៩ឆ្នាំមកហើយ។ ក្រៅពីការងារអភិរក្សនិងចុះបញ្ជី ក្រុមការងារជំនាញនឹងគិតគូរ រកបច្ចេកទេសនៃការដាក់តាំងថ្មី ដោយបង្កើតទូតាំងពិសេសមួយដែលអាចជួយកាត់បន្ថយការខូចខាតពីសត្វល្អិតនិងសំណើមពីអាកាសធាតុ៕
ចែករំលែកព័តមាននេះ