ខេត្តបន្ទាយមានជ័យ ៖ សេចក្តីរាយការណ៍បឋមបានឲ្យដឹងថា មន្ត្រីគយ និងរដ្ឋាករបានសហការជាមួយកម្លាំងនគរបាលប្រឆាំងបទល្មើសដោយឃាត់រថយន្តចង្កូតស្តាំ១គ្រឿង និងឃាត់អ្នកបើកបរ២នាក់ នៅវេលាម៉ោង១១កាលពីថ្ងៃទី១៤ ខែមកនេះ នៅតាមបណ្តោយផ្លូវជាតិលេខ៦ ស្ថិតនៅភូមិតារាងបាល…
ខេត្តបន្ទាយមានជ័យ ៖ សេចក្តីរាយការណ៍បឋមបានឲ្យដឹងថា មន្ត្រីគយ និងរដ្ឋាករបានសហការជាមួយកម្លាំងនគរបាលប្រឆាំងបទល្មើសដោយឃាត់រថយន្តចង្កូតស្តាំ១គ្រឿង និងឃាត់អ្នកបើកបរ២នាក់ នៅវេលាម៉ោង១១កាលពីថ្ងៃទី១៤ ខែមកនេះ នៅតាមបណ្តោយផ្លូវជាតិលេខ៦ ស្ថិតនៅភូមិតារាងបាល សង្កាត់កំពង់ស្វាយ ក្រុងសិរីសោភ័ណ ។
អ្នកបើរបរ២នាក់ ដែលត្រូវឃាត់ខ្លួនមាន១- ឈ្មោះ លន់ វឌ្ឍនា ភេទប្រុស អាយុ៣១ឆ្នាំ រស់នៅភូមិឈូក សង្កាត់សំរោង ក្រុងសំរោង ខេត្តឧត្តរមានជ័យ ២-ឈ្មោះ សាយ រ៉ន ភេទប្រុស អាយុ៣២ឆ្នាំរស់នៅភូមិរថគ្រោះឆេះ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
លោកឧត្តមសេនីយ៍ត្រី ចាប សុផាឫទ្ធិ ស្នងការរង ទទួលផែនប្រឆាំងបទល្មើសសេដ្ឋកិច្ចខេត្តបន្ទាយមានជ័យបានប្រាប់ថា នៅពេលឃាត់រថយន្តរថយន្តចង្កូតស្តាំគ្មានពន្ធ ដែលពាក់ស្លាកលេខក្លែងបន្លំ គឺមន្ត្រីគយ និងរដ្ឋាករចល័តនៃការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ ប្រចាំខេត្តបន្ទាយមានជ័យ បានសហការគ្នាស្រាវជាវ និងកំណត់មុខសញ្ញាហើយឃាត់រថយន្ត១គ្រឿង ម៉ាក់ហ្វូតរីនជ័រ ពណ៌ប្រផេះ ចង្កូតស្តាំ ផលិតឆ្នាំ២០១៣ ដែលពាក់ស្លាកលេខខេមរភូមិន្ទ០៩ ២.១៣៥៧ ដែលជាស្លាកលេខក្លែងក្លាយគ្មានឯកសារពន្ធ និងរកឃើញមានស្លាកលេខរដ្ឋ ០៦ ២.៥៦៨៨ និងស្លាក់លេខខេមរកភូមិន្ទ០៧ ២.២១៩៥ និងកូនស និងវីសមួយចំនួន និងឃាត់ខ្លួនអ្នកបើរបរ និងអ្នករួមដំណើរ២នាក់ ។
លោកបានបញ្ជាក់ថា ក្រោយពេលឃាត់រថយន្តចង្កូតស្តាំ១គ្រឿង និងអ្នកបើកបរ២នាក់បានយកមកស្នងការដ្ឋាននគរបាលខេត្តបន្ទាយមានជ័យ ដើម្បីធ្វើការសាកសួរចម្លើយ គឺជនសង្ស័យទាំង២នាក់បានសារភាពថា ខ្លួនទាំងពីរនាក់បានជិះរថយន្តជាមួយឈ្មោះ កៃ នាំមកលេងខេត្តបន្ទាយមានជ័យ ក្រោយពេលហូបបាយហើយឈ្មោះ កៃ បានដឹកពួកគេទាំងពីរនាក់ទៅទម្លាក់យករថយន្ត១គ្រឿងនៅតាមបណ្តោយផ្លូវជាតិលេខ៥៦ ស្ថិតភូមិកកោះ ឃុំស្លរក្រាម ស្រុកស្វាយចេក ខេត្តបន្ទាយមានជ័យ ។
នៅពេលដែលឈ្មោះ កៃ ដឹកទៅទម្លាក់ឲ្យបើករថយន្តតពីគេ ដែលមិនស្គាល់ឈ្មោះក្នុងគោលបំណងបើកចេញទៅខេត្តសៀមរាប បើកមកដល់ចំណុចភ្លើងស្តាប់ផ្លូវបំបែកជាបួនក្រុងសិរីសោភ័ណ ពេលឈប់ ស្រាប់តែមានមន្ត្រីគយ និងរដ្ឋករចល័តបានឃាត់ប្រគល់ជូនកម្លាំងនគរបាលប្រឆាំងបទល្មើសសេដ្ឋកិច្ចខេត្ត ។
លោកឧត្តមសេនីយ៍ត្រី ចាប សុផាឫទ្ធិ បានបញ្ជាក់ថា ចំពោះរថយន្តចង្កូតស្តាំ១គ្រឿង ដែលគ្មានពន្ធហើយពាក់ស្លាកលេខក្លែងបន្លំ និងជនសង្ស័យ២នាក់ដែលឃាត់តាមចម្លើយសារភាពត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមច្បាប់ និងឈ្មួញរកស៊ីរថយន្តចង្កូតស្តាំល្មើស និងច្បាប់ឈ្មោះ កៃ កម្លាំងសមត្ថកិច្ចកំពុងស្រាវជ្រាវរកចាប់ខ្លួនចាត់ការតាមច្បាប់ ៕ កែសម្រួលដោយ ៖ សុឃាក់
ចែករំលែកព័តមាននេះ