ប្រទេសហ្វ៊ីលីពីន ៖ បណ្ដាទីក្រុងស្ថិតនៅជិតភ្នំភ្លើង TAAL គ្របដណ្ដប់ដោយស្រទាប់ផេះដ៏ក្រាស់ ៣ថ្ងៃក្រោយចាប់ផ្ដើមការផ្ទុះភ្នំភ្លើងនេះ។ នាថ្ងៃទី១៥ ខែមករា ឆ្នាំ២០២០ បណ្ដារូបភាពដែលថតដោយដ្រូន បង្ហាញទីក្រុងមួយដែលមានសភាពស្ងាត់ជ្រងំ ដូចដែលគេឃើញតាមវីដេអូមួយ។
ទម្ងន់ផេះដែលជាប់ច្រើន បណ្ដាលឲ្យដើមឈើនិងអគារមួយចំនួនបាក់។ សំណាងដែរដែលបណ្ដាទីក្រុងស្ថិតនៅជុំវិញភ្នំភ្លើង ត្រូវបានជម្លៀសមនុស្សចេញមុនពេលភ្នំភ្លើងផ្ទុះ រួចរហូតមកទល់ពេលនេះ នៅពុំទាន់មានអ្នករងគ្រោះណាម្នាក់នៅឡើយ។
ភ្នំភ្លើង TAAL ស្ថិតនៅចម្ងាយតែ៦៥គីឡូម៉ែត្រពីក្រុងម៉ានីល បានចាប់បញ្ចេញសកម្មភាពកាលពីថៃ្ងទី១២មករា ដោយជះពពកផ្សែងនិងផេះទៅលើអាកាស និងបញ្ចេញកំអែរក្រហម និងនាំឲ្យមានការជម្លៀសមនុស្សចេញច្រើនពាន់នាក់ ដែលរស់នៅតាមតំបន់ភ្នំជិតខាង។
ភ្នំភ្លើងនោះអាចបន្តសកម្មភាពរយៈពេលច្រើនសប្ដាហ៍ទៀត ដោយបញ្ចេញផេះនិងកំអែរនាភាគខាងត្បូងក្រុងម៉ានីល៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា) (ប្រភពវីដេអូ ៖ Le Huffington Post)
ចែករំលែកព័តមាននេះ