ខេត្តមណ្ឌលគិរី៖ ទីតាំងសិប្បកម្មរីកដូចផ្សិតត្រូវទឹកភ្លៀងជាច្រើន កំពុងលួចធ្វើសកម្មភាពកែច្នៃឈើនៅកណ្តាលស្រុកពេជ្រាដា អាជ្ញាធរមូលដ្ឋានហាក់មិនអើតពើពីសកម្មភាពរបស់ក្រុមឈ្មួញទាំងនោះសោះ ដែលត្រូវគេសង្ស័យថា មានការត្រូវរ៉ូវគ្នា ទើបគេអាចរកស៊ីរបរកែច្នៃឈើដោយមិនចាំបាច់មានច្បាប់អនុ ញ្ញាត។ សេចក្តីរាយការណ៍បាននិយាយថា យ៉ាងហោចណាស់មានរោងកែច្នៃឈើប្រមាណជិត១០កន្លែង…
ខេត្តមណ្ឌលគិរី៖ ទីតាំងសិប្បកម្មរីកដូចផ្សិតត្រូវទឹកភ្លៀងជាច្រើន កំពុងលួចធ្វើសកម្មភាពកែច្នៃឈើនៅកណ្តាលស្រុកពេជ្រាដា អាជ្ញាធរមូលដ្ឋានហាក់មិនអើតពើពីសកម្មភាពរបស់ក្រុមឈ្មួញទាំងនោះសោះ ដែលត្រូវគេសង្ស័យថា មានការត្រូវរ៉ូវគ្នា ទើបគេអាចរកស៊ីរបរកែច្នៃឈើដោយមិនចាំបាច់មានច្បាប់អនុ ញ្ញាត។
សេចក្តីរាយការណ៍បាននិយាយថា យ៉ាងហោចណាស់មានរោងកែច្នៃឈើប្រមាណជិត១០កន្លែង កំពុងធ្វើសកម្មភាពរាល់ថ្ងៃក្នុងភូមិពូទឺត ឃុំប៊ូស្រា ស្រុកពេជ្រាដាជាការកត់សម្គាល់ឈើដែលគេយកទៅច្នៃជាទ្វារបង្អូច តុ ទូ ទាំងនោះ គឺដឹកចេញពីព្រៃដែនជម្រក ពោលគឺគ្មានក្រុមហ៊ុនសម្បទានណាមួយជាអ្នកផ្គត់ផ្គង់ឡើយ។ រោងសិប្បកម្មដែលកំពុងធ្វើសកម្មភាពសព្វថ្ងៃនេះ ត្រូវគេដឹងថា ជាសាច់ញាតិលោកអភិបាលរងស្រុកពេជ្រាដាម្នាក់ដ៏មានឥទ្ឋិពល ព្រោះពួកគេអាចបើកកន្លែងច្នៃឈើរាប់ឆ្នាំមកហើយ គ្មានសមត្ថកិច្ចទៅរំខានឡើយ។
ជាក់ស្តែង នៅព្រឹកថ្ងៃទី១៥ មករា ២០២០ ក្រុមអ្នកឃ្លាំមើលបទល្មើសព្រៃឈើបានផ្តិតយករូបភាពទីតាំងកែច្នៃឈើកណ្តាលទីរួមស្រុកពេជ្រាដា ខណៈក្រុមជាងឈើកំពុងអារជ្រៀក ក្រឡឹង បាញ់ថ្នាំលើគ្រឿងសង្ហារឹមដែលគេច្នៃរួច ដើម្បីដឹកចេញទៅលក់តាមបណ្តាលរាជធានីខេត្តនានា ។ នៅពេលចុះដល់ទីតាំងផ្ទាល់គេសង្កេតឃើញក្នុងសិប្បកម្មបានច្នៃឈើជា តុ ទូ សាឡុង ទ្វារ បង្អួច…ជាច្រើនទៅតាមប្រភេទឈើនិមួយៗ។
មហាជនបានស្នើដល់អាជ្ញាធរខេត្តមណ្ឌលគិរី សុំឲ្យមន្ត្រីជំនាញចុះបង្ក្រាបសិប្បកម្មទាំងនោះ ដែលបានធ្វើសកម្មភាពរាល់ថ្ងៃគ្មានខ្លាចញញើតច្បាប់សូម្បីបន្តិច ។ ចំណែកក្រុមអ្នកតាមដានបរិស្ថានបានលើកឡើងថា ហាក់មានអាថ៌កំបាំងអ្វីនៅពីក្រោយខ្នង ព្រោះតែកន្លងមកគេបានឃើញសមត្ថកិច្ចដែលដឹកនាំដោយព្រះរាជអាជ្ញាររងខេត្តមណ្ឌលគិរី ចុះបង្ក្រាបទីតាំងសិប្បកម្មក្នុងស្រុកពេជ្រាដា ជាច្រើនលើកច្រើនសារ ប៉ុន្តែសម្រាប់សិប្បកម្មដែលមានទីតាំងនៅក្នុងទីប្រជុំជនស្រុកពេជ្រាដា បែរជាមិនមានការបង្ក្រាបពីមន្ត្រីជំនាញសោះ ឬដោយសារមានអ្នកកាងពីក្រោយ?
ក្រុមដដែលនេះ ក៏បាននិយាយដែរថា បើមិនមានការទប់ស្កាត់សកម្មភាពសិប្បកម្មទាំងនោះទាន់ពេលទេ វាក៏ជាចំណែកដ៏ធំមួយក្នុងការបំផ្លាញព្រៃឈើ នៅខេត្តមណ្ឌលគិរី ដ្បិតសកម្មភាពនេះមិនខុសពីកណ្តៀពួនដំបូកឡើយ ។
ចែករំលែកព័តមាននេះ