សហរដ្ឋអាមេរិក ៖ សំណុំរឿងចោទប្រកាន់ដកតំណែង លោកដូណាល់ត្រាំបានបញ្ជូនជាផ្លូវការកាលពីថ្ងៃទី១៥ ខែមករា ឆ្នាំ២០២០ ដល់ព្រឺទ្ធសភា ដែលនឹងបើកសវនាការនាថ្ងៃទី២១ ខែមករា សម្រេចដកតំណែងប្រធានាធិបតីឬយ៉ាងណា។ លោកត្រាំជាប្រធានាធិបតីអាមេរិកទី៣ ដែលជួបសវនាការបែបនេះក្នុងប្រវត្តិសាស្ត្រ។
លោកត្រាំត្រួវឆ្លើយចំពោះបទចោទប្រកាន់២ ពីបទរំលោភបំពានអំណាចនិងពីបទរារាំងការងាររបស់សភា មកពីការគាបសង្កត់នានាដើម្បីបង្ខំអ៊ុយក្រែន ឲ្យបើកការស៊ើបអង្កេត លើលោកJOE BIDEN ជាគូប្រជែងសំខាន់របស់លោកក្នុងការបោះឆ្នោតប្រធានាធិបតីអាមេរិក នាខែវិច្ឆិកាខាងមុខនេះ។
លោកត្រាំរងការចោទប្រកាន់កាលពីថ្ងៃទី១៨ធ្នូដោយសភា ដែលគណបក្សប្រជាធិបតេយ្យជាគណបក្សប្រឆាំងមានសំឡេងភាគច្រើន ក្នុងឱកាសនៃការបោះឆ្នោតមួយរបស់សភាមានលក្ខណៈប្រកាន់គណបក្ស។ បណ្ដាសមាជិកសភានាថ្ងៃទី១៥មករា បានសម្រេចបញ្ជូនសំណុំរឿងនេះទៅកាន់ព្រឹទ្ធសភា ហើយប្រកាសពីការតែងតាំងមនុស្ស៧នាក់ក្នុងចំណោមសមាជិកសភា ឲ្យដើរតួនាទីជារដ្ឋអាជ្ញាសម្រាប់សវនាការ។
ប្រធានសភាអ្នកប្រជាធិបតេយ្យ លោកស្រីណានស៊ីពីឡូស៊ី បានចុះហត្ថលេខាលើបទចោទប្រកាន់ ក្នុងពិធីដ៏មហោឡារិកមួយ។ លោកស្រីថ្លែងថា ពេលនេះយើងឈានចូលដល់ដំណាក់កាលប្រវត្តិសាស្ត្រហើយ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ