រាជធានីភ្នំពេញ៖ ក្រសួងរ៉ែ និងថាមពល បានប្រកាសបើកទទួលពាក្យប្រកួតប្រជែងជាសាធារណៈសម្រាប់ទទួលបានអាជ្ញាបណ្ណស្វែងរុករក ចំពោះតំបន់សម្បទានស្វែងរុករ៉ែចំនួន ៨ តំបន់លើផ្ទៃដីសរុបជាង១មពាន់គីឡូម៉ែត្រការ៉េ ក្នុងខេត្តមួយចំនួននៃប្រទេសកម្ពុជា។ យោងតាមសេចក្តីជូនដំណឹងរបស់ក្រសួងរ៉ែ និងថាមពលកាលពីថ្ងៃទី១០…
រាជធានីភ្នំពេញ៖ ក្រសួងរ៉ែ និងថាមពល បានប្រកាសបើកទទួលពាក្យប្រកួតប្រជែងជាសាធារណៈសម្រាប់ទទួលបានអាជ្ញាបណ្ណស្វែងរុករក ចំពោះតំបន់សម្បទានស្វែងរុករ៉ែចំនួន ៨ តំបន់លើផ្ទៃដីសរុបជាង១មពាន់គីឡូម៉ែត្រការ៉េ ក្នុងខេត្តមួយចំនួននៃប្រទេសកម្ពុជា។
យោងតាមសេចក្តីជូនដំណឹងរបស់ក្រសួងរ៉ែ និងថាមពលកាលពីថ្ងៃទី១០ ខែមករា បានឲ្យដឹងថា តំបន់ចំនួន៨មានផ្ទៃដីស្វែងរុករករ៉ែ សរុបចំនួន ១ .៣៩០ គីឡូម៉ែត្រការ៉េ ស្ថិតនៅក្នុងខេត្ត ស្ទឹងត្រែង, ព្រះវិហារ, កំពង់ធំ, សៀមរាប និងមណ្ឌលគីរី គឺក្រុមហ៊ុននានាអាចដាក់ពាក្យស្នើសុំបាន ។
អគ្គនាយកធនធានរ៉ែនៃក្រសួងរ៉ែ និងថាមពលលោក យស មុនីរ៉ាត់ បានឱ្យដឹងកាលពីថ្ងៃទី១៤ ខែមករា ថា «ការបើកឱ្យប្រកួតប្រជែងស្នើសុំអាជ្ញាបណ្ណស្វែងរុករករ៉ែ គឺផ្តោតទៅលើការស្វែងរុករករ៉ែ ប្រភេទលោហធាតុ ហើយកន្លងមកមានក្រុមហ៊ុនដែលទទួលបានអាជ្ញាបណ្ណស្វែងរុករករ៉ែកន្លងមក បានបង្ហាញពីសក្កានុពលលើការស្វែងរុករករ៉ែ»។ លោកបានលើកឡើងថា ការប្រកួតប្រជែងជាសាធារណៈ ស្នើសុំអាជ្ញាបណ្ណស្វែងរុករករ៉ែនេះគឺត្រូវបានធ្វើឡើងជាបន្តបន្ទាប់។ បច្ចុបន្បន្ននេះ ក្រុមហ៊ុនចំនួនជាង៣០ ក្រុមហ៊ុនបានទទួលអាជ្ញាបណ្ណស្វែងរុករករ៉ែ រួចហើយ ដែលភាគច្រើននៃក្រុមហ៊ុនទទួលអាជ្ញាបណ្ណនេះ គឺជាក្រុមហ៊ុនអន្តរជាតិ។ បើតាមលោកអគ្គនាយកក្នុងចំណោមក្រុមហ៊ុនទទួលអាជ្ញាបណ្ណកន្លងមក មានក្រុមហ៊ុនមួយចំនួន បានសិក្សាឃើញសក្កានុពលអាចវិនិយោគបាន។
ពាក់ព័ន្ធការរុករករ៉ែការធ្វើអាជីវកម្មលើធនធានធម្មជាតិនៅកម្ពុជានេះ បើតាមសម្តេចតេជោ ហ៊ុនសែន នាយករដ្ឋមន្ត្រីនៃកម្ពុជាធ្លាប់មានប្រសាសន៍ថាយើងនៅមិនបានប្រើប្រាស់ធនធានធម្មជាតិរបស់យើងនោះទេ ដូចជាប្រេង, ជាឧស្ម័ន, ជាធ្យូងថ្ម ជាដើម។ ឥឡូវធ្យូងថ្មយើងរកឃើញ ហើយយើងនឹងផលិតអគ្គិសនីនៅត្រង់នោះតែម្តងគឺនៅខេត្តឧត្តមានជ័យ។ទន្ទឹមនឹងរាជរដ្ឋាភិបាលគ្រោងផលិតអគ្គិសនីប្រើប្រាស់ដោយធ្យូងថ្មនៅនិងតំបន់ ការធ្វើអាជីវកម្មលើរ៉ែមាសក៏នឹងត្រៀមចាប់ផ្តើមផងដែរនាពេលខាងមុខនេះ។
សម្តេចតេជោ ហ៊ុន សែន បានមានប្រសាសន៍ថា «រ៉ែមាសនៅប៉ុន្មានថ្ងៃមុនដែលខ្ញុំសម្រេច ហើយរ៉ែមាសរបស់យើងនឹងធ្វើអាជីវកម្មក្នុងខ្នាតមួយដែលមានប្រាក់ចំណូលគួរសមដែលទទួលការវិនិយោគដោយក្រុមហ៊ុនអូស្ត្រាលី។តែការរំពឹងរបស់យើងគឺរំពឹងធំទៅលើប្រេងដែលអាចនឹងមានហើយយើងមិនទាន់បានប្រើប្រាស់នោះទេ។
តាមក្រសួងរ៉ែនិងថាមពល បណ្តាក្រុមហ៊ុនជាតិ និងអន្តរជាតិ អាចដាក់ពាក្យស្នើសុំអាជ្ញាបណ្ណស្វែងរុករ៉ែ ចាប់ពីពេលជូនដំណឹង រហូតដល់ ថ្ងៃទី១៥ ខែកុម្ភៈ ឆ្នាំ២០២០ ហើយលទ្ធផលនៃក្រុមហ៊ុនដែលនឹងទទួលបានអាជ្ញាបណ្ណ នឹងត្រូវប្រកាសជាសាធារណៈ បន្ទាប់ពីបានអនុវត្តតាមនីតិវិធីចប់សព្វគ្រប់។
បច្ចុប្បន្នក្រុមហ៊ុន Renaissance Minerals (Cambodia) ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Emerald Resources NL បានទទួលអាជ្ញាបណ្ណធ្វើអាជីវកម្មរ៉ែ នៅឆ្នាំ២០១៨ ហើយក្រុមហ៊ុនគ្រោងចាប់ផ្តើមដំណើរការរុករ៉ែមាសនៅស្រុកកែវសីមា ខេត្តមណ្ឌលគីរី៕ កែសម្រួលដោយ ៖ សុឃាក់
ចែករំលែកព័តមាននេះ