ខេត្តក្រចេះ ៖ សំបុកសត្វកន្ធាយក្បាលកង្កែប ឬហៅថាល្មិចចំនួន១០សំបុក ស្មើនឹងជាង៤ពាន់ពងត្រូវរកឃើញដោយក្រុមអ្នកអភិរក្សមកពីសហគមន៍នេសាទ រដ្ឋបាលជលផល និងអង្គការដៃគូរអភិរក្ស ស្រាវជ្រាវរកឃើញមាននៅតាមឆ្នេរខ្សាច់នៃកូនកោះតូចធំនៅតំបន់ ព្រៃលិចទឹក ក្នុងឃុំចំនួន៤នៃស្រុកសំបូរ ខេត្តក្រចេះ។
ក្រុមមន្ត្រីអភិរក្សនៃខណ្ឌរដ្ឋបាលជលផលខេត្ត បានចាត់ទុកថា នេះជាការរកឃើញថ្មី មួយទៀត ពីក្រុមអ្នកស្រាវជ្រាវទៅលើសំបុក និងពងសត្វកន្ឋាយក្បាលកង្កែបឬល្មិច ដែលត្រូវ បានកត់ត្រាក្នុងបញ្ជីក្រហមរបស់អង្គការអភិរក្សថា ជាប្រភេទកំពុងទទួលរងការគំរាមកំហែងជាសកលស្ទើរតែផុតពូជ ។
លោក អ៊ូ សុវណ្ណរ៉ា នាយរងផ្នែករដ្ឋបាលជលផលកាំពី និងជាមន្ត្រីសហការជាមួយនិង អង្គការដៃគូរអភិរក្ស បានថ្លែងប្រាប់ឲ្យដឹងនៅថ្ងៃទី១៦ មករា នេះថា ពងសត្វកន្ឋាយ ក្បាលកង្កែបឬល្មិចចំនួន១០សំបុក ក្នុង១សំបុកមានពងចាប់ពី៣៥ទៅ៥០ពង ត្រូវបានក្រុមការងាស្រាវជ្រាវរកឃើញមាននៅតាមឆ្នេរខ្សាច់នៃកោះតូចៗនៅតំបន់ព្រៃលិចទឹកក្នុងឃុំ ចំនួន៤នៅស្រុកសំបូរ ខេត្តក្រចេះ រួមមាន ឃុំខ្សាច់ម្កាក់ ឃុំកំពង់ចាម ឃុំកោះខ្ញែរ និងឃុំវឌ្ឍនៈ។
លោកអ៊ូ សុវណ្ណរ៉ា បានសន្និដ្ឋានថា ពងកូនកន្ឋាយនេះអាចចាប់ផ្តើមពងកូនតាំងពីដើមរដូវពងកូន ក្នុងចន្លោះពីខែវិច្ឆិកា ឆ្នាំ ២០១៩ ដល់ខែមករា ឆ្នាំ២០២០។
ក្រុមអ្នកស្រាវជ្រាវនិយាយថា កន្ធាយក្បាលកង្កែបឬល្មិច (ឬឈ្មោះវិទ្យាសាស្ត្រហៅថា Pelochelys cantorii) ត្រូវបានកត់ត្រាក្នុងបញ្ជីក្រហមរបស់អង្គការអភិរក្សាថាជាប្រភេទកំពុងទទួលរងការគំរាមកំហែងជាសកល។ កន្ធាយប្រភេទនេះ ត្រូវបានគេគិតថា បានផុតពូជហើយនៅតាមដងទន្លេមេគង្គក្នុងប្រទេសកម្ពុជា ក៏ប៉ុន្តែក្នុងឆ្នាំ២០០៧ វត្តមានកន្ធាយប្រភេទនេះ ត្រូវបានរកឃើញសាជាថ្មីនៅក្នុងដែនទឹកនៃដងទន្លេមេគង្គក្នុងខេត្តក្រចេះ ដែលជាតំបន់ព្រៃ លិចទឹក និងសម្បូរដោយជីវចម្រុះគ្រប់ប្រភេទរស់នៅ។
លោក អ៊ូ សុវណ្ណរ៉ា បានលើកឡើងឲ្យដឹងថា ជាច្រើនឆ្នាំមុនៗពូជកន្ឋាយក្បាលកង្កែប ឬល្មិច នេះបានគំរាមគំហែងដោយការបាត់បង់ ពីការធ្វើនេសាទតាមរយៈការរាយសន្ទូច និងការចាប់យកពងដើម្បីទទួលទាន។ តែក្រោយវត្តមាននៃការរកឃើញ ពូជកន្ឋាយទឹកសាបដ៏កម្រនេះត្រូវបានរួមគ្នាអភរិក្សយ៉ាងគត់មុត រួមគ្នាអនុវត្តច្បាប់ស្តីពីជលផលរឹតបន្តឹងការធ្វើនេសាទនៅតំបន់ជីវចម្រុះ។ ការចង់ក្រងជាសហគមន៍ដើម្បីអភិរក្សលើសពីនេះទៅទៀតគឺ មានការលើកទឹកចិត្តដល់សហគមន៍ក៏ដោយមានការគាំទ្រហិរញ្ញវត្ថុពីអង្គការជាដៃគូ នៅពេលពលរដ្ឋរស់នៅតំបន់គោលដៅពីការប្រទះឃើញសំបុក និងថែទាំសំបុករហូតញាស់បានកូន។
លោក អ៊ូ សុវណ្ណរ៉ា បានដឹងទៀតថា រហូតសព្វថ្ងៃក៏មានការបង្កើតជាមណ្ឌលភ្ញាស់កូន កន្ឋាយមួយកន្លែនៅស្រុកសំបូរ ហើយប្រជាពលរដ្ឋសហគមន៍ក៏ទទួលបានប្រយោជន៍ពីមជ្ឃ មណ្ឌលនោះផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ