រាជធានីភ្នំពេញ ៖ កម្មវិធីប្រដាល់អ្នកតស៊ូគុនខ្មែរឆ្ពោះទៅតាមខេត្តរដូវកាលទី២ ជុំទី១ចាប់ផ្ដើមពីថ្ងៃសៅរ៍ ទី១៨ មករា ស្អែកនេះហើយនៅទីរួមខេត្តកំពង់ចាម ដែលមានទាំងអស់៤គូក្នុងនោះគូប្រកួតជម្រុះដណ្ដើមខ្សែក្រវាត់មានចំនួន២គូ ។ លោក…
រាជធានីភ្នំពេញ ៖ កម្មវិធីប្រដាល់អ្នកតស៊ូគុនខ្មែរឆ្ពោះទៅតាមខេត្តរដូវកាលទី២ ជុំទី១ចាប់ផ្ដើមពីថ្ងៃសៅរ៍ ទី១៨ មករា ស្អែកនេះហើយនៅទីរួមខេត្តកំពង់ចាម ដែលមានទាំងអស់៤គូក្នុងនោះគូប្រកួតជម្រុះដណ្ដើមខ្សែក្រវាត់មានចំនួន២គូ ។
លោក ម៉ា ស៊ីថេត អ្នកគ្រប់គ្រងកម្មវិធីប្រដាល់ប្រចាំស្ថានីយទូរទស្សន៍ស៊ីអិនស៊ីបានឱ្យដឹងថា សម្រាប់ការប្រកួតនេះធ្វើឡើងតាមរូបមន្តចាញ់ធ្លាក់ៗ ដោយក្នុង១ខេត្តចម្រាញ់យកតែ២នាក់ប៉ុណ្ណោះសម្រាប់ឡើងទៅប្រកួតនៅវគ្គបន្ត ហើយចុងក្រោយជម្រុះយកតែ៤នាក់ប៉ុណ្ណោះឡើងទៅប្រកួតនៅវគ្គពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រនៅលើសង្វៀនស៊ីអិនស៊ីឬស្សីកែវដណ្ដើមយកប្រាក់រង្វាន់ធំចំនួន៥ពាន់ដុល្លារអាមេរិក។
ការប្រកួតនៅក្នុងសប្ដាហ៍ទី១ដែលចាប់ផ្ដើមនៅវេលាម៉ោង៥និង៣០នាទីល្ងាចស្អែក នេះសម្រាប់គូប្រកួតដណ្ដើមខ្សែក្រវាត់មានកីឡាករ ឡុង រ៉ាមី មកពីក្លិបខ្លារខិនមានរិទ្ធ ប្រកួតជាមួយកីឡាករ ពុទ្ធ ម៉ាណូយ មកពីក្លិប ពុទ្ធសេរីវង្សពោធិសែនជ័យនិងកីឡាករ សៀវ ង៉ុយ មកពីសមាគមកីឡាប្រដាល់ក្រសួងការពារជាតិប្រកួតជាមួយកីឡាករ ប៊ឺត សង្ឃឹម មកពីក្លិបរ៉ាហាប់ស្វាយប៉ាក ។ តាមប្រភពព័ត៌មាន កីឡាករទាំង៤រូបនេះសុទ្ធតែជាជើងខ្លាំងក្នុងប្រភេទទម្ងន់៥៧គីឡូក្រាម ។ ដូច្នេះការប្រកួតលើកនេះពិបាកទស្សន៍ទាយលទ្ធផលខ្លាំងណាស់ មិនដឹងអ្នកណាអាចឆ្លងផុតពីវគ្គជម្រុះជុំទី១នេះបានទេ។
ក្រៅពីគូដណ្ដើមខ្សែក្រវាត់នៅលើសង្វៀនដដែលក៏មានការប្រកួតលក្ខណៈមិត្តភាពអន្តរជាតិចំនួន២គូទៀតផងដែរ ។ កីឡាករ ឡៅ ចន្ទ្រាមកពីក្លិបកងទ័ពពិសេសឆត្រយោង៩១១ ប្រកួតជាមួយកីឡាករថៃ កងមឿងឆាង សក្ដិឆ័យយុង ក្នុងប្រភេទទម្ងន់៦៧គីឡូក្រាម និងកីឡាករជើងខ្លាំងរឿង សោភ័ណ្ឌ មកពីក្លិបមកុដរាជសីហ៍ប្រកួតជាមួយកីឡាករថៃ ផ្លាំងនុម បៈ.យុទ្ធភូមិក្នុងប្រភេទទម្ងន់៦៣,៥គីឡូក្រាម ៕ (កែសម្រួលដោយ ៖ បុប្ផា)
ចែករំលែកព័តមាននេះ