សហរដ្ឋអាមេរិក-ចិន ៖ ប្រធានាធិបតីអាមេរិកលោកដូណាល់ត្រាំបានចុះហត្ថលេខា កាលពីថ្ងៃទី១៥មករា លើកិច្ចព្រមព្រៀងពាណិជ្ជកម្មដំណាក់កាលទី១ ជាមួយឧបនាយករដ្ឋមន្ត្រីចិនលោកLIU HE ដែលនោះជាការបោះជំហានទៅមុខដ៏ធំមួយសម្រាប់ធ្វើឲ្យមានតុល្យភាពឡើងវិញនៃពាណិជ្ជកម្ម រវាងមហាអំណាចទាំង២ ប៉ុន្តែនៅមានការបម្រុងនានាចំពោះសហរដ្ឋអាមេរិក។
ក្នុងពិធីដ៏វែងមូយនៅសេតវិមានលោកត្រាំថ្លែងថា ពេលនេះកំណត់នូវដំណាក់កាលជាប្រវត្តិសាស្ត្រមួយដែលពុំធ្លាប់ឆ្លងកាត់ ឆ្ពោះទៅរកកិច្ចព្រមព្រៀងពាណិជ្ជដ៏ត្រឹមត្រូវនិងមានផលប្រយោជន៍ទៅវិញទៅមក រវាងចិននិងសហរដ្ឋអាមេរិក។
ទោះបីយ៉ាងណាសភាពាណិជ្ជកម្មអាមេរិក ស្នើដល់ក្រុងប៉េកាំងនិងក្រុងវ៉ាស៊ីនតោន ដោះស្រាយបណ្ដាបញ្ហាដែលនៅជាប់គាំងដោយលើកជាពិសេស របបឧបត្ថម្ភធនរបស់ចិន។ ប្រធានសភាពាណិជ្ជកម្មនេះ លោកTHOMAS DONOHUE លើកឡើងថា បញ្ហាដ៏ស្មុគ្រស្មាញកើតមានតាំងពីយូរមកហើយទាំងនេះ ផ្ដល់ផលប៉ះពាល់ខ្លាំងដល់សមត្ថភាពប្រកួតប្រជែង របស់បណ្ដាសហគ្រាសអាមេរិក។
សម្រាប់ពេលនេះកិច្ចព្រមព្រៀងដំណាក់កាលទី១នោះនឹងផ្ដល់ផលជាពិសេសដល់បណ្ដាកសិករ និងឧស្សាហកម្មអាមេរិកដែលជាអ្នករងគ្រោះខ្លាំងដោយសារជម្លោះនេះ។ ចិនបានសន្យាទិញបណ្ដាផលិតផលអាមេរិកមានទឹកប្រាក់២០០ពាន់លានដុល្លារបន្ថែមទៀតរយៈពេល២ឆ្នាំខាងមុខនេះ ដើម្បីកាត់បន្ថយឱនភាពពាណិជ្ជកម្មអាមេរិក ដែលជាការទាមទារខ្លាំងរបស់សេតវិមាន។ កិច្ចព្រមព្រៀងក៏ចែងផងដែរចំណុចទាក់ទិននឹងការការពារកម្មសិទ្ធិបញ្ញា និងបណ្ដាលក្ខខណ្ឌនៃការផ្ទេរបច្ចេកវិទ្យាព្រមទាំងការទាមទារឯទៀតៗរបស់អាមេរិក។
លោកដូណាល់ត្រាំគូសបញ្ជាក់ថា សិទ្ធិពន្ធគយដាក់ទណ្ឌកម្ម ដែលបច្ចុប្បន្នមានទឹកប្រាក់ជាង៣៧០ពាន់លានដុល្លារលើបណ្ដាផលិតផលចិននឹងត្រូវរក្សាទុក ដរាបណាកិច្ចព្រមព្រៀងដំណាក់កាលទី២នៅពុំទាន់ចុះហត្ថលេខា។ លោកថាខ្ញុំនឹងរក្សាវាទុកបើមិនដួច្នេះទេ យើងគ្មានសន្លឹកបៀមួយក្នុងដៃសម្រាប់ចរចាឡើយ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ