រាជធានីភ្នំពេញ ៖ ធនាគារ អេស៊ីលីដា ភីអិលស៊ី និងធនាគារឯកទេសវីង បានចាប់ដៃគ្នាក្នុងការកសាងវិស័យហិរញ្ញវត្ថុនៅកម្ពុជាបន្ថែម ជាពិសេសទៅលើសេវាកម្មផ្ទេរប្រាក់ដែលកំពុងមានការប្រកួតប្រជែងខ្លាំងលើទីផ្សារ ។ កិច្ចសហការនេះ ក៏ដើម្បីសម្រួលដល់ភាពងាយស្រួលរបស់ប្រជាពលរដ្ឋកម្ពុជា ក្នុងការផ្ទេរប្រាក់ទៅកាន់សាច់ញាតិបងប្អូន មិត្តភក្ដិ នៅតំបន់នានាក្នុងប្រទេសកម្ពុជា ក៏ដូចជាការសងត្រលប់របស់អតិថិជនទៅកាន់ធនាគារ អេស៊ីលីដា ជាដើម ។
ថ្លែងនៅក្នុងពិធីចុះហត្ថលេខាសហការរវាងធនាគារ អេស៊ីលីដា និងធនាគារ ឯកទេស វីង កាលពីរសៀលថ្ងៃទី១៥ ខែមករា ឆ្នាំ២០២០ នៅការិយាល័យកណ្ដាលអេស៊ីលីដា លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានមានប្រសាសន៍ថា កិច្ចសហប្រតិបត្តិការរវាងធនាគារ អេស៊ីលីដា និងធនាគារ ឯកទេស វីង នៅពេលនេះនឹងជួយសម្រួលដល់ប្រជាពលរដ្ឋកម្ពុជា ក្នុងការប្រើប្រាស់សេវាកម្មហិរញ្ញវត្ថុ ។
លោកថា «អេស៊ីលីដា មានសាខាតែជាង ២៦២សាខាប៉ុណ្ណោះ នៅទូទាំងប្រទេសកម្ពុជា ហើយនៅពេលដែលចាប់ដៃជាមួយធនាគារឯកទេស វីង ដែលមានសាខារាប់ពាន់នៅកម្ពុជា នោះ អតិថិជនក្ដី និងមិនមែនអតិថិជនក្ដី អាចប្រើប្រាស់សេវារបស់វីង និងអេស៊ីលីដា ។ ម្យ៉ាងទៀត ធនាគារ អេស៊ីលីដា មានម៉ោងធ្វើការ និងមានថ្ងៃឈប់សម្រាក តែសម្រាប់ភ្នាក់ងារវីងវិញ គឺធ្វើការមួយសប្ដាហ៍ ដូច្នេះអតិថិជន អេស៊ីលីដា អាចផ្ញើតាមវីងទៅដៃគូអេស៊ីលីដារបស់ខ្លួនបានដោយងាយស្រួលទៀតផង » ។
លោកបន្តថា កន្លងមក អតិថិជន អេស៊ីលីដា ដែលចង់សងប្រាក់ត្រលប់មកកាន់ធនាគារវិញ ត្រូវធ្វើដំណើរមកកាន់ការិយាល័យ ចំពោះអតិថិជនដែលមិនមានភ្ជាប់ទាន់ចិត្ត ឬប្រព័ន្ធស្មាតហ្វូន តែនៅពេលដែលសហការជាមួយ វីង អតិថិជនរបស់ អេស៊ីលីដា អាចផ្ញើប្រាក់មកាន់ធនាគារ អេស៊ីលីដា តាមភ្នាក់ងារវីង ដែលនៅជិតបំផុត ដោយមិនចាំបាច់ធ្វើដំណើរមកកាន់ការិយាល័យណាមួយរបស់ធនាគារអេស៊ីលីដាទៀតឡើយ ។
ធនាគារ អេស៊ីលីដា ភីអិលស៊ី មានចក្ខុវិស័យជួយដល់អតិថិជន និងប្រជាពលរដ្ឋកម្ពុជា ដោយមិនបន្ថែមការចំណាយរបស់អតិថិជន និងប្រជាពលរដ្ឋកម្ពុជាទៀតនោះទេ ។
លោក ម៉ានូ រ៉ាចាន់ អគ្គនាយក ធនាគារឯកទេស វីង បានអោយដឹងថា ធនាគារ អេស៊ីលីដា ជាធនាគារនាំមុខគេមួយនៅក្នុងប្រទេសកម្ពុជា ហើយមានក្រុមហ៊ុនធំៗជាច្រើនក្នុងប្រទេសតែងតែចង់សហការជាមួយធនាគារធំបែបនេះ ក្នុងការពង្រីកអាជីវកម្មរបស់ខ្លួន ។ បេសកកម្មរបស់ធនាគារ អេស៊ីលីដា និង វីង គឺមានភាពស្រដៀងគ្នាច្រើន ដោយផ្ដោតលើការយកចិត្តទុកដាក់ជួយសម្រួលដល់ប្រជាពលរដ្ឋកម្ពុជា ជាពិសេសអភិវឌ្ឍន៍ប្រទេសកម្ពុជាអោយកាន់តែប្រសើរឡើង ។
លោកបន្តថា បន្ទាប់ពីកិច្ចសហការជាមួយធនាគារ អេស៊ីលីដា យើងរំពឹងថា ប្រជាជនកម្ពុជានឹងកាន់តែងាយស្រួលក្នុងការប្រើប្រាស់សេវាហិរញ្ញវត្ថុ នៅក្នុងប្រទេសកម្ពុជា ជាក់ស្ដែងពលរដ្ឋកម្ពុជា នឹងមានជម្រើសកាន់តែច្រើនក្នុងការប្រើប្រាស់សេវា ហើយកាន់តែមានងាយស្រួល និងទូលំទូលាយបន្ថែមទៀត ។
លោកបណ្ឌិត អ៊ិន ចាន់នី និងលោក ម៉ានូ រ៉ាចាន់ បានបញ្ជាក់ស្រដៀងគ្នាថា កិច្ចសហប្រតិបត្តិការរវាងស្ថាប័នធំទាំងពីរនោះនឹងជំរុញឱ្យពលរដ្ឋកម្ពុជា ងាកមកប្រើប្រាស់សេវាកម្មហិរញ្ញវត្ថុតាមភ្នាក់ងារ និងបច្ចេកវិទ្យា ដោយកាត់បន្ថយនូវការធ្វើដំណើរមកកាន់ការិយាល័យរបស់ធនាគារកណ្ដាល ដែលជាការចំណេញនូវពេលវេលា និងថវិកាអតិថិជនក៏ដូចជាប្រជាពលរដ្ឋកម្ពុជាទាំងមូលផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ