រាជធានីភ្នំពេញ ៖ សមិទ្ធផលជាច្រើនស្ថិតនៅវត្តបុទមវតី មានតម្លៃជាង២០ម៉ឺនដុល្លាអាមេរិកសម្រាប់បំរើឲ្យវិស័យព្រះពុទ្ធសាសនាត្រូវបានប្រារព្ធពិធីបុណ្យឆ្លងជាផ្លូវការតាមពុទ្ធានុញ្ញតិ។ ពិធីនេះ បានប្រារព្ធនៅថ្ងៃទី១៥ ខែមករា ឆ្នាំ២០២០នេះ ក្រោមព្រះរាជាអធិតីភាពសម្ដេចមហាសុមេធាធិបតីកិត្តិឧទ្ទេសបណ្ឌិត នន្ទ…
រាជធានីភ្នំពេញ ៖ សមិទ្ធផលជាច្រើនស្ថិតនៅវត្តបុទមវតី មានតម្លៃជាង២០ម៉ឺនដុល្លាអាមេរិកសម្រាប់បំរើឲ្យវិស័យព្រះពុទ្ធសាសនាត្រូវបានប្រារព្ធពិធីបុណ្យឆ្លងជាផ្លូវការតាមពុទ្ធានុញ្ញតិ។
ពិធីនេះ បានប្រារព្ធនៅថ្ងៃទី១៥ ខែមករា ឆ្នាំ២០២០នេះ ក្រោមព្រះរាជាអធិតីភាពសម្ដេចមហាសុមេធាធិបតីកិត្តិឧទ្ទេសបណ្ឌិត នន្ទ ង៉ែត សម្ដេចសង្ឃនាយក នៃព្រះជាណាចក្រកម្ពុជា ក្នុងនោះក៏មានការអញ្ជើញចូលរួមជាកិត្តិយសពីសំណាក់លោក ជា ចាន់តូ អគ្គទេសាភិបាល ធនាគារជាតិនៃកម្ពុជា និងលោកជំទាវ ព្រមទាំងក្រុមគ្រួសារដែលជាម្ចាស់ដើមទានផងដែរ។
សមិទ្ធផលដែលដាក់សម្ពោធ និងធ្វើបុណ្យឆ្លងនាឱកាសនេះ រួមមាន ៖ អគារបណ្ណាល័យ១ខ្នង, អគារសេនាសនៈសម្រាប់មន្ត្រីបំពេញកិច្ច១ខ្នង, រោងភ្លើង១ខ្នងអគារផ្ទះបាយ១ខ្នង, អគារឃ្លាំងដាក់សង្ឃភណ្ឌ១ខ្នង, សាលប្រជុំគណៈសង្ឃ១ខ្នង, វច្ចកុដិ១ខ្នង, ផ្លូវបេតុង និងទីសេនាសនៈ។
តាមសង្ឃដីការបស់សម្ដេចព្រះពុទ្ធជ័យមុនី ឃឹម សន ព្រះមេគណរាជធានីភ្នំពេញបានបញ្ជាក់ថា កុសលកើតចេញបុណ្យនៃការកសាងសមិទ្ធផលនេះ មានតម្លៃធំធេងណាស់មិនសម្រាប់តែជាតិនេះទេ បុណ្យនេះក៏បានសម្រាប់អនាគតជាតិ គឺលោកខាងមុខផងដែរ។
សម្ដេចព្រះពុទ្ធជ័យមុនី មានសង្ឃដីកាទៀតថា សមិទ្ធផលដែលធ្វើបុណ្យឆ្លងនាពេលនេះដែរ ទោះបីកកើតឡើងតាមរយៈបុគ្គលអង្គណាក៏ដោយ គឺមិនជាកម្មសិទ្ធិរបស់សង្ឃអង្គនោះទេ។
ផ្ទុយមកវិញ សមិទ្ធផលទាំងនេះ គឺជាគរុភ័ណ្ឌរបស់វត្តទាំងមូលដែលត្រូវថែរក្សាទុកសម្រាប់ប្រើប្រាស់និងបំរើឲ្យវិស័យព្រះពុទ្ធសាសនា។ ទាក់ទងនឹងការផ្ដួចផ្ដើម និងបច្ច័យនៅក្នុងការកសាងសមិទ្ធផលនេះ សម្ដេចព្រះពុទ្ធជ័យមុនី ឃឹម សន មានសង្ឃដីកាឲ្យដឹងថា គឺបានមកទឹកចិត្តប្រកបដោយសុទ្ធាជ្រះថ្លា របស់លោក ជា ចាន់តូ អគ្គទេសាភិបាលធនាគារជាតិនៃកម្ពុជា និងលោកជំទាវ ព្រមទាំងក្រុមគ្រួសារ រួមនឹងកម្លាំងសាមគ្គីរបស់មន្ត្រី បុគ្គលិកគារជាតិនៃកម្ពុជា និង សប្បុរសជនជិតឆ្ងាយ។
នៅក្នុងឱកាសនោះ សម្ដេចបានថ្លែងអំណរគុណយ៉ាងជ្រាលជ្រៅដល់ម្ចាស់ដើមទានទាំងអស់ ពិសេស លោក អគ្គទេសាភិបាល ជា ចាន់តូ និងលោកជំទាវ ដែលកន្លងមកបានផ្ដួចផ្ដើម និងរួមចំណែកដល់ការកសាងសមិទ្ធផលជាច្រើនដល់អារាមវត្តបុទមវតី ដែលជាការចំណែកមួយដល់ការលើកកម្ពស់វិស័យព្រះសាសនាឲ្យសក្តិសមជាសាសនារបស់រដ្ឋនិងជាទីដ្ឋានសម្រាប់គោរពបូជារបស់ពុទ្ធសានិកជនខ្មែរគ្រប់ៗរូប។
ក្នុងឱកាសនោះដែរ លោក ជា ចាន់តូ និង លោកជំទាវ បានវេរភត្តាហារ និងបច្ច័យប្រគេនដល់ព្រះសង្ឃចំនួន១៥០អង្គផងដែរ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ