ហុងកុង៖ ការលក់រថយន្តនៅប្រទេសចិនបានធ្លាក់ចុះគួរឲ្យកត់សម្គាល់ ហើយការធ្លាក់ចុះដ៏ធំនេះផងដែរ ក៏នៅបង្ហាញពីសញ្ញាអវិជ្ជមានសម្រាប់ឆ្នាំ ២០២០ ដោយសារតែសេដ្ឋកិច្ចមិនមានសញ្ញាល្អ ។ ទីផ្សាររថយន្តនៅប្រទេសចិនបានធ្លាក់ចុះសម្រាប់ឆ្នាំទី ២ ជាប់ៗគ្នាចាប់តាំងពីឆ្នាំមុននេះម្លេះ ។ នេះបើយោងតាម CNN ផ្សាយកាលពីថ្ងៃអង្គារ៍ ទី ១៤ ខែមករា ម្សិលមិញនេះ ។
អង្គភាពឧស្សាហកម្មរថយន្តជាតិបាននិយាយថាការលក់រថយន្តសរុបបានធ្លាក់ចុះចំនួន ៨,២% គឺនៅសល់ត្រឹមតែ ២៥,៨ លានគ្រឿងក្នុងឆ្នាំ ២០១៩ បន្ទាប់ពីបានធ្លាក់ចុះជិត ៣% ក្នុងឆ្នាំ ២០១៨ នៅក្នុងការធ្លាក់ចុះដំបូងចាប់តាំងពីឆ្នាំ ១៩៩០ មក ។ ការលក់រថយន្តនៅខែធ្នូ កន្លងទៅថ្មីៗនេះក្នុងប្រទេសចិនក៏បានធ្លាក់ចុះ ០,១% ។ នេះបើយោងតាមទិន្នន័យដែលបង្ហាញពីការធ្លាក់ចុះ ១៨ ខែជាប់ៗគ្នា។
វិបត្តិនៃការលក់ធ្លាក់ចុះត្រូវបានធ្វើឱ្យកាន់តែធ្ងន់ធ្ងរឡើងកាលពីឆ្នាំមុនដោយសារកំណើនសេដ្ឋកិច្ចខ្សោយកើតចេញពីសង្គ្រាមពាណិជ្ជកម្មជាមួយសហរដ្ឋអាមេរិកនិងស្តង់ដារនៃការបំភាយឧស្ម័នថ្មីដែលត្រូវបានណែនាំនៅរដូវក្តៅ។ ការស្ទាក់ស្ទើររបស់អតិថិជនក្នុងការជាវរថយន្តថ្មីៗទំនើបៗ នៅក្នុងបរិយាកាសមិនប្រាកដប្រជាមួយនៃការធ្លាក់ខ្សោយវិស័យសេដ្ឋកិច្ចគឺជាផ្នែកមួយដែលត្រូវស្តីបន្ទោស ប៉ុន្តែយុទ្ធនាការរបស់រដ្ឋាភិបាលប្រឆាំងនឹងកម្រិតនៃការបំពុលដ៏សាហាវនៃការបំភាយឧស្ម័នក៏មានផលប៉ះពាល់ផងដែរ។ យ៉ាងណាមិញអ្នកវិភាគនិងអ្នកផលិតរថយន្តមើលឃើញថាស្ថានការណ៍នៅឆ្នាំក្រោយមើលទៅប្រសើរជាងមុនបន្តិច ប៉ុន្តែការលក់នៅតែត្រូវបានរំពឹងថានឹងធ្លាក់ចុះ តែមកត្រឹមកម្រិត ២ ភាគរយ។
សម្រាប់ទីផ្សាររថយន្តនៅប្រទេសចិន «ឆ្នាំ ២០២០ នឹងមានសារសំខាន់នៅពេលដែលក្រុមហ៊ុនផលិតរថយន្តត្រូវដោះស្រាយជាមួយនឹងប្រាក់ឧបត្ថម្ភធនទាបសម្រាប់ការអនុវត្តន៍កាន់តែតឹងរឹងទៅលើបទប្បញ្ញត្តិនៃការបំភាយនិងការរំខានពីការប្រើប្រាស់បច្ចេកវិទ្យា» ។ ការធ្លាក់ចុះនេះបានធ្វើឱ្យក្រុមហ៊ុនផលិតរថយន្តសកលមានការលំបាកយ៉ាងខ្លាំង។ក្រុមហ៊ុនហ្វដ (Ford) បាននិយាយកាលពីថ្ងៃច័ន្ទ ទី ១៣ ខែមករា កន្លងទៅថាការលក់របស់ខ្លួនបានធ្លាក់ចុះ ២៦ ភាគរយកាលពីឆ្នាំមុននៅក្នុងប្រទេសចិន គឺប្រមាណចំនួន ៥៦៧ ៨៥៤ គ្រឿងហើយបានព្រមានអំពីពេលវេលាដ៏លំបាកនៅខាងមុខនេះដែលត្រូវតស៊ូជម្នះនៃការធ្លាក់ចុះនៃការលក់ ។
នៅក្នុងសេចក្ដីប្រកាសព័ត៌មានមួយលោក Anning Chen ប្រធាននិងជានាយកប្រតិបត្តិក្រុមហ៊ុន Ford Greater China បានមានប្រសាសន៍ថា «សម្ពាធពីបរិយាកាសខាងក្រៅនិងនិន្នាការធ្លាក់ចុះនៃបរិមាណឧស្សាហកម្មនឹងបន្តនៅឆ្នាំ ២០២០» ។ គូប្រជែងរបស់ក្រុមហ៊ុនខាងលើគឺ ក្រុមហ៊ុន GM (GM) បានរាយការណ៍កាលពីសប្តាហ៍មុនថាខ្លួនបានលក់រថយន្តចំនួន ៣,០៩ លានគ្រឿងនៅក្នុងប្រទេសចិនកាលពីឆ្នាំមុនគឺធ្លាក់ចុះ ១៥ ភាគរយធៀបនឹងឆ្នាំ ២០១៨ ដូចរថយន្តហ្វដដែរ វាក៏មានទស្សនវិស័យធ្លាក់ចុះសម្រាប់ឆ្នាំថ្មីផងដែរ។
លោក Matt Tsien អនុប្រធានប្រតិបត្តិក្រុមហ៊ុន GM និងជាប្រធានក្រុមហ៊ុន GM China បានមានប្រសាសន៍ថា «យើងរំពឹងថាការធ្លាក់ចុះនៃទីផ្សារនឹងបន្តនៅឆ្នាំ ២០២០ ហើយរំពឹងថានឹងមានបញ្ហាកើតឡើងនៅក្នុងអាជីវកម្មចិនរបស់យើង» ៕ កែសម្រួលដោយ ៖ សុឃាក់
ចែករំលែកព័តមាននេះ