ប្រទេសប្រេស៊ីល ៖ យោងតាមទិន្នន័យដំបូងៗប្រមូលបានដោយវិទ្យាស្ថានស្រាវជ្រាវអវកាសINPEថា ផ្ទៃព្រៃឈើដល់ទៅ៩.១៦៦គីឡូម៉ែត្រក្រឡា ក្នុងឆ្នាំ២០១៩ រងការប៉ះពាល់ដោយការកាប់បំផ្លាញព្រៃអាម៉ាហ្សួនក្នុងប្រទេសប្រេស៊ៅល។ នេះជាការកើនឡើងដល់៨៥% បើប្រៀបធៀបទៅនឹងឆ្នាំ២០១៨។ នាឆ្នាំនោះប្រព័ន្ធDETERរបស់INPEផ្អែកលើការប្រកាសអាសន្ននៃការបំផ្លាញព្រៃឈើកំណត់តាមផ្កាយរណប បានកំណត់ពីការបំផ្លាញព្រៃអាម៉ាហ្សួនក្នុងប្រទេសប្រេសីុលថាមាន ៤.៩៤៦គីឡូម៉ែត្រក្រឡា។
ការកាប់បំផ្លាញព្រៃអាម៉ាហ្សួនជារឿងរសើបមួយនៅប្រេសីុល ដែលប្រធានាធិបតីស្ដាំនិយមជ្រុលរបស់ប្រទេសនេះ លោកJAIR BOLSONAROរងការរិះគន់ព្រោះតែនិយាយសម្រាលពីភ្លើងឆេះព្រៃអាម៉ាហ្សួន ដែលនាំឲ្យពិភពលោកទាំងមូលមានការក្ដុកក្ដួល។ ចំពោះការកើនឡើងនៃការកាប់បំផ្លាញព្រៃអាម៉ាហ្សូនបែបនេះ គឺក្នុងឆ្នាំទីមួយនៃការកាន់អំណាចរបស់លោកនៅប្រេស៊ីល។ ប្រធានាធិបតីរូបនេះជាអ្នកគាំទ្រដល់បណ្ដាគម្រោងអភិវឌ្ឍន៍សេដ្ឋកិច្ចពិសេសរ៉ែនៅតំបន់អាម៉ាហ្សួន។
ប្រធាធិបតីរូបនោះអះអាងថាយុទ្ធនាការអន្តរជាតិការពារព្រៃអាម៉ាហ្សូន ជាការប៉ះពាល់ដល់អធិបតេយ្យភាពរបស់ប្រេស៊ីល ហើយជួយបិទបាំងឆន្ទៈរបស់ប្រទេសមួយចំនួន ដែលចង់ទាញយកប្រយោជន៍ពីធនធាននៃតំបន់ព្រៃនេះ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ