រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ស្ត្រីជាប់ចោទជាឃាតករដែលត្រូវជាម្តាយតារាចម្រៀង ពេជ្រ សូលីកា កាលពីព្រឹកថ្ងៃទី១៥ ខែមករា ឆ្នាំ២០២០ នេះ ត្រូវបានសមត្ថកិច្ចនគរបាលបញ្ជូនទៅកាន់សាលាដំបូងរាជធានីភ្នំពេញហើយ ហើយសំណុំរឿងនេះបានស្ថិតនៅដៃលោកស្រី ស៊ឺ វណ្ណនី ព្រះរាជអាជ្ញារង បើកការសាកសួរ រួចបានចោទប្រកាន់ជាផ្លូវការពីបទ «ឃាតកម្ម» ។
សេចក្តីរាយការណ៍បន្តទៀតថា បទ «ឃាតកម្ម» តាមមាត្រា ១៩៩ នៃក្រមព្រហ្មទណ្ឌ ដែលបានតម្រូវឲ្យផ្តន្ទាទោសលើជនជាប់ចោទដាក់ពន្ធនាគារចាប់១០ទៅ១៥ឆ្នាំ ។ ក្រោយលោកស្រីព្រះរាជអាជ្ញារង បានចោទប្រកាន់ជាផ្លូវការហើយ ជនជាប់ជាប់ដែលមានឈ្មោះ ស៊ិន ស្រីនាង (តួអង្គជាប្រពន្ធ) អាយុ៤៥ឆ្នាំ ត្រូវបានចាត់បញ្ជូនទៅខាងចៅក្រមស៊ើប ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន រង់ចាំសវនាការផ្តន្តាទោសតាមច្បាប់ជាធរមាន ។
គួររលឹកថា តាមព័ត៌មានចុងក្រោយបានឱ្យដឹងថា សមត្ថកិច្ចខណ្ឌមានជ័យ បាននាំស្ត្រីជាជនដៃដល់ទៅយកចិញ្ចៀនពេជ្រ ដែលបានយកទៅបញ្ចាំនៅហាងមួយក្នុងផ្សារចាស់ នៅរសៀលថ្ងៃទី១៣ ខែមករា ឆ្នាំ២០២០ ដែលមានតម្លៃបញ្ចាំចំនួន២.០០០ដុល្លារ ។ ការរកឃើញចិញ្ចៀននេះ បានបង្ហាញថា ការចោទជនរងគ្រោះធ្វើឱ្យបាត់ចិញ្ចៀននោះមិនមែនជាការពិតទេ តែជនដៃដល់ជាអ្នកប្លន់សម្លាប់យកចិញ្ចៀនជនរងគ្រោះ ។ ប្រភពដដែលបញ្ជាក់ថា នៅសល់ចិញ្ចៀនពេជ្រមួយវង់ទៀត មិនទាន់រកឃើញនៅឡើយទេ ។
សូមរំលឹកទៀតថា កាលពីព្រឹកព្រលឹមថ្ងៃដដែលនោះ ព័ត៌មានខាងលើបានធ្វើឱ្យកក្រើកពេញបណ្តាញសង្គមហ្វេសប៊ុក ដោយសារតែរឿងឃាតកម្មដែលស្មានមិនដល់មួយ គឺស្ត្រីជាម្តាយតារាចម្រៀង ពេជ្រ សូលីកា បានជាប់ចោទពីបទសម្លាប់ស្ត្រីម្នាក់តែងខ្លួនជាប្រុស។ រឿងក្តីនេះ មិនជាប់ទាក់ទិននឹងតារាចម្រៀងរូបនេះទេ តែដោយសារស្ត្រីជាម្តាយរបស់តារាចម្រៀងនាង ពេជ្រ សូលីកា ទើបរឿងនេះមានការភ្ញាក់ផ្អើលជាខ្លាំងផងដែរ ។
អំពើឃាតកម្មមួយនេះ បានកើតឡើងរវាងគូស្នេហាវ័យចំណាស់ស្រីស្រឡាញ់ស្រីដូចគ្នាកើតជាជម្លោះឈ្លោះប្រកែកគ្នា រហូតឈានដល់ការប្រើប្រាស់ហិង្សាបញ្ចប់ជីវិតតួប្រុស និងបង្កឱ្យមានការភ្ញាក់ផ្អើលជាខ្លាំងនៅក្នុងផ្ទះលេខ L42A ស្ថិតនៅបុរីវីឡាថោន ក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ កាលពីវេលាម៉ោង២២យប់ ថ្ងៃទី១១ ខែមករា ឆ្នាំ២០២០ ។
ស្ត្រីដៃដល់ខាងលើឈ្មោះ ស៊ិន ស្រីនាង (តួអង្គជាប្រពន្ធ) អាយុ៤៥ឆ្នាំ ស្នាក់នៅចំណុចកើតហេតុ ចំណែកស្ត្រីរងគ្រោះឈ្មោះ ងិន សុខលី ( តួអង្គជាប្តី ) អាយុ៥០ឆ្នាំ មុខរបរលក់កាហ្វេនៅផ្សារដេប៉ូ មានទីលំនៅសង្កាត់ផ្សារដេប៉ូ២ ខណ្ឌទួលគោក ។ ទាំង២នាក់ជាស្ត្រីស្រឡាញ់ភេទដូចគ្នា ហើយពួកគេមានទំនាក់ទំនងស្នេហាជាមួយគ្នាអស់រយៈពេល៩ឆ្នាំកន្លងមកហើយ ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព។ (កែសម្រួលដោយ ៖ បុប្ផា)
ចែករំលែកព័តមាននេះ