រាជធានីភ្នំពេញ ៖ ធនាគារ អេស៊ីលីដា ភីអិលស៊ី បានប្រាប់អោយអតិថិជន ក៏ដូចជាវិនិយោគិនត្រៀមខ្លួនក្នុងការចូលរួមវិនិយោគជាមួយធនាគារ អេស៊ីលីដា ភីអិលស៊ី ក្នុងពេលដែលធនាគារនេះ…
រាជធានីភ្នំពេញ ៖ ធនាគារ អេស៊ីលីដា ភីអិលស៊ី បានប្រាប់អោយអតិថិជន ក៏ដូចជាវិនិយោគិនត្រៀមខ្លួនក្នុងការចូលរួមវិនិយោគជាមួយធនាគារ អេស៊ីលីដា ភីអិលស៊ី ក្នុងពេលដែលធនាគារនេះ ត្រៀមខ្លួនក្នុងការលក់មូលបត្រកម្មសិទ្ធិជាសាធារណៈនៅក្នុងផ្សារមូលបត្រកម្ពុជា ។
ថ្លែងនៅក្នុងសិក្ខាសាលាស្ដីពី ធនាគារ អេស៊ីលីដា ភីអិលស៊ី គ្រោងនឹងបោះផ្សាយលក់មូលបត្រកម្មសិទ្ធិជាសាធារណៈដល់អតិថិជន និងដៃគូរវិនិយោគនាថ្ងៃទី១៥ មករា ២០២០ នៅការិយាល័យកណ្ដាល ធនាគារ អេស៊ីលីដា ភីអិលស៊ី លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានមានប្រសាសន៍ថា កន្លងមកអត្ថប្រយោជន៍ដែល អេស៊ីលីដា ទទួលបាន គឺបានទៅលើតែភាគទុនិកមួយចំនួនតូចប៉ុណ្ណោះដែលមានភាគហ៊ុននៅក្នុងធនាគារ អេស៊ីលីដា ដូច្នេះធនាគារចង់អោយអត្ថប្រយោជន៍របស់ខ្លួនបានទៅលើអតិថិជនកាន់តែច្រើនបន្ថែមទៀត ទើបធនាគារបោះផ្សាយលក់មូលបត្រកម្មសិទ្ធិជាសាធារណៈ ។
លោកបន្តថា អត្ថប្រយោជន៍ដែលអតិថិជន ក៏ដូចជាវិនិយោគិនទទួលបានពីការវិនិយោគជាមួយធនាគារ អេស៊ីលីដា តាមរយៈការទិញមូលបត្រកម្មសិទ្ធិជាសាធារណៈនៅផ្សារមូលបត្រកម្ពុជារួមមានច្រើន តែសូមលើកយកអត្ថប្រយោជន៍ធំៗដែលនឹងទទួលបាននោះ ដូចជា អតិថិជននឹងទទួលបានភាគលាភពីអេស៊ីលីដា ហើយអាចជួញដូរភាគហ៊ុនជាមួយអេស៊ីលីដា ហើយអ្នកវិនិយោគជាមួយ អេស៊ីលីដា នឹងក្លាយជាម្ចាស់ស្ថាប័នធំជាងគេនៅក្នុងប្រទេសកម្ពុជា និងអាចបង្គាប់បញ្ជាទៅកាន់ស្ថាប័ននោះទៅតាមការចង់បានរបស់គាត់ផងដែរ ។
លោកបន្ថែមថា មុននឹង អេស៊ីលីដា ប្រកាសលក់ជាផ្លូវការ ធនាគារបានធ្វើសិក្ខាសាលាជាបន្តបន្ទាប់ ដើម្បីអោយអតិថិជន និងវិនិយោគិន បានយល់កាន់តែច្បាស់ជាមួយនឹងការសម្រេចវិនិយោគក៏ដូចជាអោយអតិថិជនបើកគណនីជូញដូរអោយបានរួចរាល់មុននឹងធ្វើការជួញដូរជាផ្លូវការ ។ អេស៊ីលីដា មានបំណងចង់អោយមានការជួញដូរជាលក្ខណៈឯកត្តជន ជាជាងជាក្រុមហ៊ុន ឬស្ថាប័ន ។
លោកថា « បន្ទាប់ពីបានរៀបចំនូវសិក្ខាសាលាជាបន្តបន្ទាប់ ឃើញថា អតិថិជនដែលមានសក្ដានុពលបានមកចូលរួម និងបើកគណនី ជួញដូររួចជាស្រេចដើម្បីត្រៀមខ្លួនក្នុងការវិនិយោគជាមួយអេស៊ីលីដានៅពេលដែលយើងប្រកាសជួញដូរនៅពេលឆាប់ៗខាងមុខនេះ » ។
លោកបណ្ឌិត អ៊ិន ចាន់នីបានបន្ថែមទៀតថា ធនាគារ អេស៊ីលីដា ភីអិលស៊ី ចង់អោយមានការទិញមូលបត្រកម្មសិទ្ធិជាសាធារណៈពីឯកត្តជនទាំងអស់តែម្ដង ហើយនេះជាអ្វីដែលអេស៊ីលីដា ប៉ងប្រាថ្នា ហើយជាការកត់សម្គាល់ក៏មានការចាប់អារម្មណ៍ពីឯកត្តជនច្រើនលើសពីអ្វីដែលបានរំពឹងទុកផងដែរ ។
គួរបញ្ជាក់ថា ធនាគារ អេស៊ីលីដា ភីអិលស៊ី បានចាប់ផ្ដើមធ្វើប្រតិបត្តិការអស់រយៈពេលជាង២៧ឆ្នាំមកហើយ ដោយផ្ដើមពីទុនជាង៦០ម៉ឺនដុល្លារអាមេរិកប៉ុណ្ណោះ ។ បច្ចុប្បន្នធនាគារ អេស៊ីលីដា ភីអិលស៊ី មានទ្រព្យសកម្មជាង៦ពាន់លានដុល្លារ សមតុល្យឥណទានសរុបចំនួន ៣,៨៨ ពាន់លានដុល្លារអាមេរិក និងប្រាក់បញ្ញើសន្សំសរុបចំនួន ៤,៣៣ ពាន់លានដុល្លារអាមេរិក និងមានអតិថិជនប្រមាណជាងពីរលាននាក់គិតត្រឹមដំណាច់ខែធ្នូ ឆ្នាំ២០១៩ ៕ (កែសម្រួលដោយ ៖ បុប្ផា)
ចែករំលែកព័តមាននេះ